1. Uzye izwi lya kuti “icine” lyasula mwinye?

“UZYE mwivwapo awanawitu nanti wankazi wakuwomvya izwi lya kuti icine. Pamwi namwenye mwawomvyapo lyo-o izwi. Uzye nga twalanda ukuti “Icine” lyo twasula mwinye”? Ilivule nga twalanda pa cine lyo tukulozya pe vyo twazumilamo, inzila yino tukapepelamo e Leza na vino tukacita mu wumi witu. Wano “wawa mu cine” wamanya vino Baibolo ikasambilizya swinya wakavikonka mu wumi wawo. Waleka ukuzumila mwe vino awa mu mipepele ya wufi wakasambilizya. Swinya wawa sana ni nsansa asa mulandu nu kwikala mu nsi yino yikatekwa ne Satana.​—Yoha. 8:32.

2. Ukulingana ni waliko lye Yohane 13:34, 35, acintu ci ica kutalicila cino cingalenga umuntu atalike ukusambilila icine?

² Acani cino calenzile musolepo ukutalika ukusambilila Baibolo? Uzye amulandu wa miwele mizima yino mwaweni ku wantu wa kwe Yehova? (1 Pet. 2:12) Nanti pamwi amulandu wakulola vino awantu wa kwe Yehova wakundana? Awavule wano wakakwiza mukulongana pa muku wakutalicila wakalola vino twakundana. Swinya nga wanyocela ku ng’anda acino wakakwizukapo sana, ukucila na vino tevikulandwa pa kulongana. Tusizunguka nga twalola ica musango wo-o. Amuno e Yesu walanzile ukuti awasambi wakwe waliwamanyicilwa kwe vino wakundana. (Wazyani Yohani 13:34, 35.) Lelo kwawa na vinjinye vino tuzipizile ukucita pa kuwomya isuwilo litu asa kupelelavye pa kulola vino awantu wa kwe Yehova wakundana.

3. Acani cino cingacitika nga ca kuti isuwilo litu lyeyamila pa lukundo lwa wanawitu na wankazi?

³ Isuwilo litu litazipizile ukusintilila pa lukundo luno awanawitu na wankazi wakalanjizya. Amuno nga tweyamila pa wanawitu na wankazi tungawavye ngati anjinga njemeke. Tunganenuka impindi iyili yonsinye. Ku cakulolelako, tungaleka ukuwombela  Yehova nga ca kuti umwanawitu nanti e nkazi, pamwi e eluda nye nanti e painiya awino wacita uluwembu. Swinya wumwi mwi wungwe nga watuluvyanya cingalenga tunenuke amuno lyo akuno tweyamila. Asa coco conga, na wilyanye wino twasuwila angawa amusangu swinya angatalika ukulengulula vino twazumilamo. Awuli umulandu wuno tuzipizile ukusintilila sana pa wuciwuza witu ne Yehova nga tukulonda ukutwalilila ukuwa ni suwilo iliwome. Fwandi tuzipizile ukucenjela sana pa kuti isuwilo litu litasintilila pe vino awanawitu na nkazi wakacita. Amuno isuwilo litu litanga liwome. Kweni vino tukayivwa pe Yehova na pa wantu wakwe vingatwavwa ukuwa ni suwilo. Lelo cino cingatwavwa ukuwa ni suwilo iwome akuyisambilizya Baibolo, ukwivwicisya vino tukusambilila nu kuvwambilapo ivisinka na vinji pa kuti tuyisinincizizye swe weneco ukuti vino tukusambilila pe Yehova avili ivisinka.​—Roma. 12:2.

4. Ukulingana ne Mateyu 13:3-6, 20, 21, avyani vino wamwi wakacita nga welezwa?

⁴ E Yesu walanzile ukuti wamwi wangapocelela amazwi “ni cimwemwe” lelo isuwilo lyawo lingatonta nga wawa ni ntazi. (Wazyani Mateyu 13:3-6, 20, 21.) Pamwi watenecelanga ukuti waliwasunkanya intazi nga wasolapo ukukonka Yesu. (Mat. 16:24) Nanti pamwi walolanga ngati nga watalika ukuwombela Yehova aliwawacinjilila ku viwipe vyonsinye. Nomba icisinka aca kuti mwe yo-o insi mbipe twandi twapita mu ntazi. Vimwi vingapiluka mu wumi witu ica kuti tungaleka nu kuwa ni nsansa ndi vino twalinji pa kutalicila.​—Amalu. 6:6; Ekawi. 9:11.

5. Avyani vino vikalanjizya ukuti awanawitu na wankazi wasivwilika icine cino wasambilila?

⁵ Awanawitu na wankazi awavule wakalanjizya ukuti wasivwilika nanti katicinye ukuti wazana icine. Amulandu ci wuno twalandila wo-o? Amuno isuwilo lyawo lisinyocela insizi, asa mulandu na vino uwili wensinye mwi wungwe angacita. (Amalu 119:165) Lelo nga wakupita mu ntazi apano isuwilo lyawo likawomelako. (Jem. 1:2-4) Uzye avyani vino mungacita pa kuwa ni suwilo lya musango wo-o?

6. Avyani vino vyalenzile awina Klistu wakutalicila ukuwomya isuwilo lyawo?

⁶ Cino calenzile isuwilo lya wina Klistu wa kutalicilapo ukuwoma, akuyisambilizya Amawaliko nu kukonka vino Yesu wasambilizyanga, akuli ukuti icisinka ci “landwe zima.” (Gal. 2:5) Co-o icisinka, avintu vyonsinye vino swe wina Klistu twazumilamo, muno mwasanzyamo inzuwi ya kwe Yesu nu kuzyulupuka kwakwe. Umutumwa Paulo wasinincizizye ukuti vyo-o ivisambilizyo vyalinji avya cisinka. Amulandu ci wuno tungalandila ukuti e Paulo wasinincizizye ukuti vyo-o ivisambilizyo vyalinji avya cisinka? Amuno wawonvyanga Amawaliko pa kusinincizya ukuti “e Klistu wazipizile ukucula, nu kukatuka ku wafwe.” (Imili. 17:2, 3) Awina Klistu wakutalicila wazumizile vyo-o ivisambilizyo. Swinya weyamizile sana pa muzimu wutele pa kwivwicisya Izwi lya kwe Leza. Wavwambilizyanga ivisinka na vinji pa kuti wasinincizye nga ca kuti vyo wasambililanga vyafumanga mu Mawaliko. (Imili. 17:11, 12; Hebe. 5:14) Cino calenzile wawe ni suwilo iliwome asa vino wayivwanga. Swinya cino calenzile ukuti wawombela Yehova asa pa mulandu ni nsansa zino wawanga nazyo nga wali na wina Klistu wawuye. Lelo cino calenzile ‘akumanya icete icete e Leza.’​—Kolo. 1:9, 10.

7. Uzye ukusuwila sana mwe vino Baibolo ikalanda kulilenga tuwe wuli?

⁷ Ivisinka vya mu Baibolo visipiluka. (Amalu. 119:160) Vikatwalilila ukuwa icili conganye na pano wumwi watuluvyanya nanti wacita uluwembu ulukulu. Swinya nga twawa ni ntazi na ponye visipiluka. Acino tuzipizile ukumanya icete sana vino e Baibolo ikasambilizya  nu kusinincizya ukuti vino ikalanda avya cisinka. Nga twasuwila sana mwe vino Baibolo ikasambilizya tulitwalilila ni cisinka kwe Yehova na pano tukupita mu ntazi. Uzye tungacita wuli pa kuti tutavwilika ukuti vino twazumilamo avya cisinka?

8. Ndi vino vyawa pe 2 Timoti 3:14, 15, cani calenjile Timoti ukusinincizya ukuti wamanyile icisinka?

⁸ E Timoti wasinincizizye ukuti wamanyile icisinka. Acani cino calenzile asinincizye ukuti vino wazumizile vyalinji avya cisinka? (Wazyani 2 Timoti 3:14, 15.) Amuno e nyinakulu ne mama wakwe awano watalicizile ukumusambilizya “amazwi matele.” Asa co-o conga, afwile nawenye wayisambilizyanga amawaliko amatele nu kwelenganyapo sana. Co calenzile “asuwile” nu kusinincizya cino wasambililanga ukuti calinji acisinka. Mukupita kwa mpindi e Timoti, e mama wakwe, ne nyinakulu wizile awamanya amasambilizyo ya wina Klistu. Ukwasowa nu kuvwilika e Timoti afwile wivwanga icete pa lukundo luno awasambi wa kwe Yesu walanjizyanga ica kuti wavwambisyanga ukuwa ponga nawo. (Flpi. 2:19, 20) Lelo cino calenzile isuwilo lyakwe liwome akuyisambilizya amawaliko. Ukucita wo-o kwalenzile awe e ciwuza wa kwe Yehova. Namwemwenye muzipizile mwayisambilizya Baibolo nu kuyisinincizizya mwe weneco ukuti vino ikasambilizya pe Yehova avya cisinka.

9. Avisinka ci vitatu ivicindame vino muzipizile ukumanya?

⁹ Kwawa ivisinka vitatu vino muzipizile ukumanya pa kuti muwe ni suwilo iliwome. Muzipizile ukutalicilapo ukuzumila ukuti e Yehova awino wapanzile ivintu vyonsinye. (Ukuf 3:14, 15; Hebe. 3:4; Ukuwu. 4:11) Ica citi wili muzipizile ukumanya umulandu wuno mwazumilila ukuti e Baibolo ali zwi lya kwe Leza. (2 Tim. 3:16, 17) Icakulecelezya muzipizile ukuzumila ukuti e Yehova wawa ni wumba lya wantu lino likamupepa. Swinya e Yesu ayili intunguluzi. Nu kuti lyo-o iwumba alya Nte zya kwe Yehova. (Ayize. 43:10-12; Yoha. 14:6; Imili. 15:14) Ukumanya vyo o ivisinka kusisula ukuti lyo mwamanya vyonsinye pe Baibolo. Lelo muzipizile  mwawonvya “amaka yinu aya kupelulula” pakuti muwomye isuwilo linu.​—Roma. 12:1.

10. Ukulunda pa kumanya icisinka avyani vinji vino tuzipizile twacita?

¹⁰ Nga mwamanya ivisinka pe Yehova, awantu wakwe na pe Baibolo. Muzipizile ukuwonvya Amawaliko pa kulenga na wanji wasinilwe ukuti vino vyawa mwenemo avya cisinka. Amulandu ci? Amuno swe wina Klistu twapwa umulimo wakusambilizya ivisinka kwe wano wakalonda ukwivwa. * (1 Timoti 4:16) Nga tukwavwa wanji ukumanya ivisinka vya mwe Baibolo isuwilo litu likawomelako.

11. Acakulolelako ci cino Paulo watusizile pano wasambilizyanga awantu, swinya tungamukolanya wuli?

¹¹ E Paulo ‘watonsyanga tonsyanga awantu pa kuwasambilizya ukufuma mu masundo ya kwe Musa na mwa kasesema.’ (Imili. 28:23) Uzye tungacita wuli pa kumukolanya? Tutazipizile ukupelela vye pa kuwasambilizya vino Baibolo ikalanda. Tuzipizile nu kuwavwa ukwelenganya nkaninye pe vino wakusambilila. Cino tukalonda akuwavwa ukuyisinincizizya aweneco ukuti vino wakusambilila pe Leza witu uwa lukundo avya cisinka. Asa pa mulanda wa kuti watukunda nanti watucindika.

12-13. Uzye awakwasi wangavwa wuli awana wawo ukutwalilila ukuwa mu cisinka?

¹² Ukwasowa nukuvwilika awakwasi wakalonda awana wawo ukutwalilila ukuwa mu cine. Pamwi mungalola ngati nga wali ni viwuza ivizima mwi wungwe apano wangawa ni suwilo iliwome. Lelo nga mukulonda ukuti awana winu wasuwile vino Baibolo yikalanda ukuti avya cisinka watazipizile ukupelela vye pakukwata iviwuza ivizima. Wazipizile ukucitapo cimwi pa kuti wawe iviwuza vya kwe Leza. Nu kusuwila ukuti vino Baibolo ikasambilizya avya cisinka.

¹³ Awakwasi wazipizile wayisambilizya Baibolo nukwelenganya pe vino wakuyisambilizya. Nga wakucita wo-o apano waliwasambilizya icete awana wawo ivya kuyisambilizya Baibolo. Wazipizile ukusambilizya awana wawo ukuwonvya iviwombelo vino vingawavwa pano wakuyisambilizya Baibolo. Pe vyo-o iviwombela pawa Ica Kutwavwa Ukuzana Ivyewo, e Watchtower Laibulale ya pa inteneti, ama vidyo, ne JW Library app. Wazipizile wa wasambilizya wulyanye vino wakacita nga wakutungulula isambililo lye Baibolo. Nga wakucita vyonsinye vyo-o walilenga awana wawo ukukunda nkaninye e Yehova. Swinya walisuwila ukuti akawonvya umuzya wa cisinka swinya uwa mano pakutwavwa ukuvwicisya ivya mu Baibolo. (Mat. 24:45-47) Awakwasi watazipizile ukupelelavye pakusambilizya awana wawo amasambililo yamwe Baibolo ayakutalicilapo. Wazipizile ukuwavwa ukuwomya isuwilo lyawo ukupitila mu kuwasambilizya ni  ‘vizike ivya kwe Leza’vino wangivwicisya ukulingana ni cimo cino wafisilepo.​—1 Kor. 2:10.

14. Amulandu ci wuno tuzipizile ukusambilila pa masesemo ya mwe Baibolo? (Lolani na kambokosi kano kakuti “ Uzye Mungalondolola Ya-a Amawusesemo?”)

¹⁴ Amasesemo yamwe Baibolo yacindama nkaninye amuno yakawomya isuwilo litu. Amasesemo ci yano yawomya isuwilo linu? Pamwi mungati awusesemo wuno wukalanda pa “manda ya kulecelezya.” (2 Tim. 3:1-5; Mat. 24:3, 7;) Amasesemo ci aya mu Baibolo yano yaficiliswa yano yangawomya isuwilo linu? Uzye mungalondolola amasesemo yano yakazanwa mwe Daniel ivipandwa 2 ne 11 vino yaficilisizwe ku nsizi na vino yakuficiliswa mwe ya-a manda? * Fwandi nga ca kuti isuwilo linu lyasintilila pe vino Baibolo yikalanda litalitela lyoneneke. Lolani ica kulolelako ca wanawitu awa ku Germany wano wawacuzizye nkaninye pano kwalinji inkondo ya citi wili iya Nsi Yonsinye. Nanti aca kuti wacilinji ukwivwicisya amawusesemo yano yakalanda pa manda ya kulecelezya, wasuwizile nkaninye Izwi lya kwe Leza.

15-17. Uzye ukuyisambilizya e Baibolo kwawomizye wuli awanawitu wano wa wacuzyanga ku wuteko wa ci Nazi?

¹⁵ Pano uwuteko wa Germany uwa ci Nazi watalisile ukuteka, awanawitu na wa nkazi awavule wa watwazile mu nkambi zyakuculilamo. E Hitler ne Heinirich Himmler wino walumbusile sana mu wuteko wa Germany wapasile nkaninye Inte zya kwe Yehova, atazilondanga na pa-a. E nkazi wumwi walanzile ukuti e Himmler wanenile wankazi wano walinji mu nkambi ya kuculilamo ukuti: “E Yehova winu akateka kwi yulu, ne naswe tukateka mu nsi, tulilola wino alicinvya umuwuye pe mwemwe na sweswe!” Uzye acani cino cavwizye awanawitu ukutwalilila ukuwa awacisinka?

¹⁶ Wa-a awasambi we Baibolo wamanyile ukuti Uwufumu wa kwe Leza watalisile ukuteka mu 1914. Acino watazungusile nanti katicinye pano wa wacuzyanga. Swinya wasinincizizye ukuti kutawa uwuteko wuno wungacilicila ukulonda kwa kwe Leza. Nanti we Hitler nye  atalinji na maka ya kufumyapo ukupepa kwa cisinka nu kuwikako uwuteko wuno wungalusya Uwufumu wa kwe Leza. Awanawitu wasinincizizye ukuti nanti citale wulinye, uwuteko wa kwe Hittler walinji nukufumapo.

¹⁷ Vyonsinye vyo-o vizile avicitika. Papisile vye imyaka mitici uwuteko wa Nazi wizile awawucimvya. Ica kuti e Heinrich Himmler wino walandanga ukuti swe “tukateka mu nsi e Leza winu kwi yulu,” wasamazile asya nu wuteko nye wuno wayivwilanga penepo. Pano wasamalanga, wasunkinye Umwanawitu Lübke wino wanyefilwepo ku nsizi. Camulumile nkaninye pano waweni umwanawitu. E Himmler wakolowozizye umwanawitu Lübke ukuti; “We musambi we Baibolo, acani cino candi cicitike?” Umwanawitu wamulondololezile ukuti Inte zya kwe Yehova watavwilikanga ukuti uwuteko wa Nazi walinji nu kufumapo. Wamanyile nu kuti walinji nu kufuma mu nkambi ya kuculilamo. E Himmler wino wawanga na pankolelo ukulanda iviwipe pa Nte zya kwe Yehova wamyalilevye. Patazimvile nu kuzimba e Himmler wayinyonzile. Acani cino tukusambililako? Ukuyisambilizya e Baibolo na mawusesemo yano yawamo, kungawomya isuwilo litu nu kutwavwa ukuwa awasipe pano wakutucuzya.​—2 Pet. 1:19-21.

18. Ukulingana ne Yohani 6:67, 68, amulandu ci wuno tuzipizile ukuwela “nu kumanya ukweneco kweneco nu kwiluka” kuno Paulo walenvile?

¹⁸ Swensinye tuzipizile ukuwa nu lukundo pa kulanjizya ukuti swe wina Klistu wacisinka. Lelo tuzipizile ukuwa ‘nu kumanya ukweneco kweneco nu kwiluka.’ (Flpi. 1:9) Nga tutacisile wo-o tungawa ngati awano “wakasendwa na mang’wimbi awatwalwa konsi konsi kuno umuza wasenucila,” akuli ukuti “umuza wamasambilizyo ya wantu wamucenjelo” ukuwikako na wasangu. (Efes. 4:14) Pano awasambi we Yesu awavule walesile ukumukonka, umutumwa Peter walanjizizye vino wasinincizizye ukuti e Yesu awino walinji “na mazwi yano yakapa uwumi wamuyayaya.” (Wazyani Yohani 6:67, 68.) Nanti aca kuti pe yoyo impindi e Peter wacilinji atani ayivwicisye ya-a amazwi, watwalilizile ni cisinka amuno wamanyile icisinka pe Klistu. Na mwemwenye nga musakuvwilika vino mwazumilamo, isuwilo linu lilitwalilila ukuwa aliwome swinya muliwawomelezyako na wanji.​—2 Yoh. 1, 2.