1. Ukulingana ni waliko lya kwe 3 Yohani 3, 4, acani cikalenga twawa ni cimwemwe?

YELENGANYANI vino umutumwa Yohani wasecelezile pano wivwile ukuti, wano wavwizye ukusambilila icine watwalilila ukuwombela e Yehova na wucisinka. Wa-a awina Klistu wacisinka wapitanga mu ntazi invule. Lelo e Yohani wawombesizye nkaninye ukuwomya isuwilo lyawo. Swinya wawalolangavye ngati awana wakwe. Nasweswenye tukawa ni cimwemwe nga ca kuti awana witu nanti wano tukakwavwa ukusambilila icine wasolapo ukuyipa kwe Yehova nu kutwalilila ukumuwombela.​—Wazyani 3 Yohani 3, 4.

2. Amulandu ci wuno e Yohani walembezile amakalata yakwe?

² Mu 98 C E e Yohani ncepamwi wikalanga mu Efeso nanti mupipi nawo-o umusumba. Ali ngati wancitizile ku Efeso pano wafumile vye mu cifungo cino calinji pa Patimosi, incende yino yawezile pe sumbi pakasi. Peyilyanye impindi apano umuzimu wakwe Yehova wamulenzile ukulemba ya-a ama kalata yatatu. Cino walembezile ya-a amakalata, akwavwa awina Klistu wacisinka ukutwalilila ukuwa ni cisinka kwe Yesu, nga nu kuwavwa ukwikalilila mu cine.

3. Amawuzyo ci yano twandi twasuke?

³ E Yohani awili umutumwa wakulecelezya wino wasyazile nu wumi. Acino wasakamile nkaninye pa wina Klistu wacisinka amuno wakasambilzya wawufi wasocelezile mwi wungwe. * (1 Yoh. 2:18, 19, 26) Wa-a wakasambilizya wawufi walandanga vye pa mulomo ukuti wamanya Leza nomba vino wacitanga  vyapusine na masundo yakwe. Akusunda ci kuno e Yohani wapile? Lekani tulole pano twandi twasuke ya-a amawuzyo yatatu aya kuti: Uzye ukwikalilila mu cine kwasula mwi ? Acani cino cingalenga tupotwe ukwikalilila mu cine? Uzye tungavwa wuli wanji ukwikalilila mu cine?

4. Ukulingana ne 1 Yohani 2:3-6 ne 2 Yohani 4, 6, avyani vino tuzipizile ukucita pa kuti twikalilile mu cine?

⁴ Pa kuti tutwalilile ukwikala mu cine, tuzipizile ukumanya icisinka cino cikazanwa mwi Zwi lya kwe Leza Baibolo. Nu “kutontela amasundo ya kwe Yehova” akuli kuti ukuyakonka. (Wazyani 1 Yohani 2:3-6; 2 Yohani 4, 6.) E Yesu watulanjizizye muno mwasula ukwivwila Yehova. Ni nzila yonga iyicindame yino tungalanjizizyamo ukuti tukakwivwila Yehova akukonka sana mu ntampulo zya kwe Yesu.​—Yoha. 8:29; 1 Pet. 2:21.

5. Avyani vino tutazipizile twavwilika?

⁵ Pa kuti tutwalilile ukwikalilila mu kupepa kwa cisinka, tuzipizile ukusinilwa ukuti vyonsinye vino Yehova akatunena ukupitila mwi zwi lyakwe e Baibolo avya cisinka. Swinya tuzipizile ukusinilwa ukuti e Yesu awili e Mesia wino walayilwe. Awavule wakavwilika nga ca kuti e Yesu ayili Imfumu ya Wufumu wa kwe Leza. E Yohani wasocezile lyankani ukuti, kwalinji nu kwiza ‘wacawufi’ awavule wano walinji nu kuwipa wonsinye wano wakavwilika e Yehova ne Yesu. (2 Yoh. 7-11) Walenvile ukuti: “Nga fwandi, cawufi weweni? Cawufi awino akati Yesu asi we Klistu.” (1 Yoh. 2:22) Inzila yino ingatwavwa ukuicinjilila kwa cawufi, akuisambilizya Izwi lya kwe Leza. Nga twacita wo-o apano tulimanya e Yehova ne Yesu. (Yoha. 17:3) Swinya tutaliwavwilika ukuti twawa mu kupepa kwa cisinka.

6. Antazi ci yino Awina Klistu awacitici wakakwata?

⁶ Awina Klistu wonsinye wazipizile ukucenjela pa kuti watakawipwe ku mano ya wantu, maka maka awacitici. (1 Yoh. 2:26). E nkazi Alexia, * uwa ku France wino ali ni myaka 25 watili: “Pano nalinji ku sukulu nasambilizile ukuti ivintu vyapilusilevye. Swinya nasambilizile na vinjinye vino vyalenzile ntalike ukuvwilika icine. Impindi zimwi nalolanga ngati vino nasambilizile vyalinji avya cisinka. Lelo nizile ndola ukuti calinji aciwipe ukwivwila vino nasambililanga kusukulu nu kusula kwe vino Baibolo ikalanda. E Alexia wizile atalika ukusambilila  mwi buku lya kuti Life​—How Did It Get Here? By Evolution or by Creation? Pa nsizi ya masabatavye yatici wizile aleka ukuvwilika. Walanzile ukuti: “Nasinincizizye ukuti vino Baibolo ikalanda avya cisinka. Swinya nizile injiluka ukuti ukukonka vino ikalanda kungalenga imbe ni nsansa nu mutende.”

7. Avyani vino Awina Klistu watazipizile ukucita, swinya amulandu ci?

⁷ Awina Klistu wonsinye watazipizile waloleka ngati wakawombela e Yehova lelo ku mbali wakacita iviwipe. E Yohani walanzile ukuti kusi wino angikalilila mu cine swinya pa mpindi iyili yonganye atemwe ni vya mu nsi. (1 Yoh. 1:6) Acino nga tukulonda ukuti e Yehova awasecelela mu miwombele yitu, tuzipizile tuwakwizuka ukuti akalola vyonsinye vino tukucita. Amuno kutawa cino cavwama kwe weliwe.​—Hebe. 4:13

8. Avyani vino tutazipizile ukucita?

⁸ Tutazipizile twalola uluwembu ndi vino awa mu nsi wakalulola. Umutumwa e Yohani walenvile ukuti: “Nditukuti tusi nu luwembu, atutela tukuyiwipa.” (1 Yoh. 1:8) Mu mpindi zya kwe Yohani, wakasambilizya wa wufi watinji umuntu angacita uluwembu umwenzonye nu kutwalilila ukuwa we ciwuza wa kwe Leza. Na mweyanye amanda tukakwikala na wantu wano wawa ngati awanye wakasambilizya wa wufi. Wakalanda ukuti wasuwila mwe Leza, lelo wasikonka vino e Yehova akalanda, maka maka nga ciza kwe wano wazipizile ukulala ponga. Wakacita ivilekanelekane muno mukawa ivyawuzele vino Yehova akalola ukuti aluwembu. Lelo weni wakalola ngati alwizyo vye swinya wano wakulonda wangavicita.

9. Avizima ci vino vingafumamo nga ca kuti awacitici wakukonka vino Baibolo ikalanda?

⁹ Awacitici awavule cingawasyupa ukulola ukucita uwuzelele ndi vino Yehova akalola. Maka maka nga ca kuti wano wakazanwa nawo ku sukulu na ku ncito wasikonka vino Baibolo ikalanda pa wuzelele. Wonye avino calinji kwe Aleksandar. Walanzile ukuti: “Awakazyana  wamwi pa sukulu wampaticizyanga ukuti ncite nawo uwuzelele. Nomba pa mulandu wa kuti nakananga swinya ntakweti umukazyana wa kwizizyanya nawe, walanzile ukuti mfwile napitanga na wonsi.” Na mwemwenye ivya musango wo-o vingamiciticila. Lelo nga mwakonka vino Baibolo ikalanda, muliwa ni nsansa, mulicinjilila uwumi winu, muliwa ne kampingu umusanguluke swinya mulicinjilila na wuciwuza winu ne Yehova. Cinji aca kuti nga mwacinvya amelezyo, ciliwamipepucila ukucita icizima. Mwakwizuka ukuti e Satana awino akalenga awantu walola uwuzelele ndi vino wakawulola. Fwandi nga mwacinvya amelenganyo mawipe yano awa mu nsi wakakwelenganya lyo “mwacinvya umuwipe.”​—1 Yoh. 2:14.

10. Uzye iwaliko lya kwe 1 Yohani 1:9 likatwavwa wuli ukutwalilila ukuwombela Yehova ne kampingu umusanguluke?

¹⁰ Twamanya ukuti e Yehova awino wawa ni nsambu zyakutunena icizima ni ciwipe. Swinya tukawombesya sana pa kuti tutacita uluwembu. Lelo nga twacita uluwembu, tuzipizile ukupepa kwe Yehova ukuti atutetele. (Wazyani 1 Yohani 1:9.) Swinya nga twacita uluwembu ulukulu, tuzipizile ukunena waeluda, amuno awano Yehova wasonta ukuti watwavwa. (Jemu. 5:14-16) Nomba tutazipizile twayipa imilandu pe vino twaluvinye kaali. Amulandu ci? Amuno umukwasi witu uwalukundo watupa inzuwi ya mwana wakwe wino wakunda pa kuti imembu zitu zyatetelwa. Asipiluka, na nombanye acili akatetela wano wakalapila. Fwandi kutawa icili consinye cino cingalenga tupotwe ukumuwombela ne kampingu umusanguluke.​—Yoha. 2:1, 2, 12; 3:19, 20.

11. Tungaicinjilila wuli ku visambilizyo vino vingatonsya isuwilo litu?

¹¹ Tuzipizile ukukana ivisambilizyo vya wasangu. Ukufumilila pano iwungwe lya wina Klistu lyapanjizilwe, e Satana watwalilila ukutonsya isuwilo lya wina Klistu wacisinka ukuwomvya wakasambilizya wawufi. Acino  tuzipizile ukumanya icisinka nu wufi. * Awalwani witu wangawonvya intaneti pa kulanda ivya wufi pa wanawitu na pe Yehova. Lelo mutazipizile ukukutika nanti katicinye kwe ya-a malyasi, amuno yakafuma kwe Satana.​—1 Yoh. 4:1, 6; Ukuwu. 12:9.

12. Amulandu ci wuno tuzipizile ukuwomezya isuwilo litu mwe vino twasambilila?

¹² Pa kucinvya amelezyo ya kwe Satana, tuzipizile ukuwomya sana isuwilo litu mwe Yesu wino Yehova akuwomvya ukuficilisya ukulonda kwakwe. Tuzipizile nu kusuwila wano e Yehova akuwonvya pa kutungulula iwungwe lyakwe. (Mat. 24:45-47) Swinya ukuyisambilizya Baibolo cila wanda, kulilenga isuwilo litu ukuwomelako. Liliwavye ngati amuti wuno walimba imisisi, Wuno wutanga wunyunkuke. Umutumwa Paulo walanzile pa cisinka icili conganye pano walembezile awina Klistu mu Kolose. Walanzile ukuti: “Acaleka vino mwapocelela Klistu Yesu kuno Amfumu, aleni yikalilanji apali ponga nawe. Zisyani imisisi yinu mwa kwe weliwe, simpani uwumi winu mwa kwe weliwe, swinya muwomesye mwi suwilo linu, ndi muno mwasambilizizwe.” (Kolo. 2:6, 7) Nga ca kuti tukuwombesya ukuwomya isuwilo litu, e Satana na wano akawonvya walipotwa ukutufumya mu kupepa kwa cisinka.​—2 Yoh. 8, 9.

13. Avyani vino tuzipizile ukwenecela, swinya amulandu ci?

¹³ Tuwakwenecela ukupatwa ku wa mu nsi. (1 Yoh. 3:13) Amuno umutumwa Yohane watwizusizye ukuti “insi yonsi ili mu maka ya muwipe.” (1 Yoh. 5:19) E Satana akuya akufulilwakovye pamulandu wa kuti asyazile ni mpindi yitici. (Ukuwu. 12:12) Akawomvya imicenjelo imilekane lekane pa kutufumya mu cine ndi vino uwuzelele, ivisambilizyo vya wasangu nga nu kutucuzya. Manda yamwi angatucuzya mu kulungatikanye. Awuli umulandu wuno tusizungucila nanti katicinye nga twalola vino wakulesya umulimo witu mu nsi zimwi. Cino akucitila wo-o amuno amanyile ukuti asyazilevye ni mpindi intici iyakulesya umulimo wakuwizya nu kutonsya isuwilo litu. Lelo nanti ciwe wo-o awanawitu na wankazi mwe zyo-o insi wasinenuka. Co-o cikulanjizya apatiswenye ukuti na sweswenye tungatwalilila ukuwa ni cisinka asamulandu na vino e Satana angacita.

14. Anzila ci yonga yino tungavwilamo awanawitu na wankazi ukwikalilila mu kupepa kwa cisinka?

¹⁴ Tuzipizile ukuwa ni cikuku ku wanawitu na wankazi pa kuti tuwavwe ukwikalilila mu cine. (1 Yoh. 3:10, 11, 16-18) Tuzipizile twakundana impindi yonsinye pano ivintu vili icete na pano visi icete. Kucakulolelako awanawitu na wankazi wamwi wakaponelwa ni mfwa swinya wakalonda ukuwasansamusya. Ne wanji nawo wakaponelwa na masanso pa mulandu wa vizumanzi vino vikakonona ama ng’anda yawufumu nu mwakwikala. Fwandi tungalanjizya ukuti twawakunda nkaninye swinya twawikako amano ukupitila mukuwavwa.

15. Ukulingana ne 1 Yohani 4:7, 8, avyani vino tuzipizile ukucita?

¹⁵ Nga tukukundana lyo tukukolanya Umukwasi witu uwa lukundo. (Wazyani 1 Yohani 4:7, 8.) Inzila yonga iyicindame yino tukalanjizizyamo ulukundo akupitila mu kutetelana. Ku cakulolelako, wumwi nga watuluvyanya swinya walenga nu kuti tumutetele, tungalanjizya ukuti twamukunda nga twamutetela nu kwiwililako. (Kolo. 3:13) E Aldo uwa myaka 29, camulumile nkaninye pano umwanawitu wino wacindisile walanzile iviwipe pa mutundu wakwe. Walanzile ukuti: “Napefile kwe Yehova  ukuti anjavwe ukutwalilila ukwelenganya ivizima pe we-e umwanawitu.” Asa co-o conga. Wasozilepo ukuwomba na we-e mu mulimo. Pano walinji mu mulimo, wamunenile vino wayivwile pa mazwi yano wawonvizye. E Aldo walanzile ukuti “Paponye walenzile ukuti imutetele. Swinya vino izwi livwikanga pano akulanda calolesile apatiswenye ukuti ativwile icete pe vino wacisile. Ukufuma panye twizile atuwa iviwuza nkaninye.”

16-17. Avyani vino tuzipizile twapampamilapo ukucita?

¹⁶ Umutumwa e Yohani wakunzile nkaninye awanawitu na wankazi ica kuti walondanga ukuti wawe ni suwilo iliwome. Amakalata yatatu yano wawalembezile ayano yakalanjizya vino wawakunzile na vino wawawisileko amano. Tukakwivwa icete ukumanya ukuti awonsi na wanaci wano waliwateka ne Yesu nawonye wawa nu lukundo. Swinya wakawika amano kwe wanji ndi vino Yohani wacitanga.​—1 Yoh. 2:27.

¹⁷ Twalililani ukuwonvya ko-o ukusunda kuno twasambilila penepo. Mutwalilile ukwikalilila mu kupepa kwa cisinka, akuli ukuti ukwivwila e Yehova mwe vyonsinye vino tukucita. Mwayisambilizya Baibolo, mwasuwila vino yikalanda nu kusuwila sana Yesu. Swinya mwakana ivisambilizyo vya wantu ni vya wasangu. Mutawombela Yehova pa mpindi iyili yonganye nu kucita iviwipe ku mbali. Swinya mutize mwelezye nanti katicinye ukwivwila wano wakaminena ukutalika ukucita iviwipe. Muwakwivwila amasundo ya kwe Yehova lyonsinye. Swinya muwatetela wamunyonko nga wamiluvyanya nu kwavwa wonsinye wano wakusowezya. Nga mukucita wo-o mulitwalilila ukupita mu cine asa mulandu na vino mungapitamo.