Twakwasilwe 10, nene anemuno nalinji ne songo pe wonsinye. Natalisile ukuwomba incito lyo ndi vye ni myaka 13 pakuti nakwavwa awa mu lupwa lwane. Pa mulandu wakuti ntafisile apatali na masambililo ya kumuwili, nawombelanga vye mu mafarmu. Po nafisyanga imyaka 15, natalisile ukuwomba incito ya kusakamala nu kusambilizya wakavwalo.

Nakunzile sana ukuwombela mu mafarmu. Impindi zimwi uwusiku nikalanga vye pa londe, inkoota umulilo pano nkutamba intanda nu mwezi. Lyo na kamuza akatalale kakupupa, kakuleta na kaceena ka mumpanga akazima. Nkwizuka nkwelenganya ukuti kufwile kwawa wino wapanzile vyonsinye vyoo ivizima. Nomba muno nawombelanga mwaciticilanga ivintu iviwipe, awantu wapepanga nkaninye e fwaka, swinya nivwanga vye intusi ntupunye. Patazimvile naninye natalisile ukutukana nu kupepa fwaka.

Pano nafisizye imyaka 18, nayile ku musumba wa Sydney. Navwambisyanga nkaninye ukwinjila uwusoja, nomba wankanizile pa mulandu wakuti ntalinji ne musambilile. Nanti cingawa wo-o nazanile incito yinji swinya nisile mu Sydney umwaka wonga. Pano nalinji ko-o apano nasunkine ni Nte zya kwe Yehova. Walile wanjita ukuti njize nzanweko mukulongana nazumizile, swinya vino nayile injivwa mukulongana, vyalenzile nzumile ukuti vino wakasambilizya avya cisinka.

Nomba patazimvile nafumile ku Sydney nu kuncintila mwi tawuni lya Goondiwindi mu Queensland. Kulyanye naile intalika ukuwomba, intwala nu kutwala, nomba cino cawifileko sana acakuti natalisile ukumwa ipaala.

Twapafile awana wawili awonsi. Pansizi yakupapa awana natalisile ukwelenganya nkaninye pe vino uwumi wane walinji nu kuwa. Nizusile vino nivwile pano naile mukulongana ni Nte zya kwe Yehova mu Sydney swinya nelenginye ukuti nzipizile ukupilula imiwele yane.

Nalile nazana Ulupungu lwa kwe Malonda, pano palinji adelesi ya maofesi ya Nte zya kwe Yehova mu Australia, nalemvile kalata ukuwanena ukuti nkulonda uwakunsambilizya Baibolo. Wantumizile e Nte uwa cikuku, swinya wino walinji nukutemwa. Patazimvile twatalisile ukusambilila Baibolo nawe.

Nasozilepo ukuleka ukupepa fwaka nukumwa sana ipaala. Cansyufile nkaninye ukuvileka amuno natalisile we kaali. Naponye cino nalondanga, akucita vino Leza akalonda. Cino canjavwizye nkaninye aliwaliko lya Waroma 12:2, lino likati: “Mutize muyikolanie na wa mu nsi yoo: ukuwa sangukani, musenule imyezo yinu iwe a mipya.” Nilusile ukuti pakuti impilule imiwele yane, nazipizile ukupata iviwipe ndi vino Leza wavipata. E Leza wanjavwizye ukuleka ukupeepa fwaka nukumwa sana ipaala.

Cino cansyufile nkaninye pe vyonsinye, akuleka ukutukaana. Namanyile amazwi amazima yano yawa pe Waefeso 4:29 pano pakati: “Mutaleka izwi iliwipe liwafuma mu mulomo winu.” Kweni papisile impindi pakuti indecelele ukutukana. Amazwi ya pe Ayizeya 40:26 yanjavwizye nkaninye. Lyo-o iwaliko likati: “Punamila mupela! Nga weweni wino welewuzile intanda zino ukalola? Wino akazikolelela ngati awavita; awino wamanya ukuvula kwakwe zyolizyo, swinya akazyita zyonsi mumazina yawo! Amaka yakwe yakula wuli-mwe—pasi nanti longa-longa luno lukasowa!” Nelenginye ukuti nga cakuti e Leza wawa na maka yakupanga ivintu ivivule vino vyawa mwi yulu, vino nkakwivwa ni cete ukutamba, lyo naninye angampa amaka yakupiluka pa kuti ndacita vino akalonda. Vino vyalenzile ndecelele ukutukaana, akupepa lyonsinye kwe Leza nukucita vino nasambililanga.

Nkakwivwa icete ukumanya ukuti pa myaka imivule yino yapitapo nkawomba wueluda mwi wungwe swinya alongo nkaninye ukwavwa awanawitu na wankazi. Ulongo ulukulu luno nawa nalo, alwakuwombela e Yehova ponga na wana wane, ne wakwane wino nakunda nkaninye swinya wino akantunjilila lyonsinye.

Nanti aca kuti ntafika apatali na masambililo ya ku muwili, nkasalifya nkaninye e Yehova pa kunsambilizya izwi lyakwe. (Ayizeya 54:13) Amazwi yano yawa pa Imilumbe 10:22, yano yakati: “Ipaalo lya kwe Yehova likacindamika,” ayacisinka nkaninye. Nene nu lupwa lwane tukulondesya ukutwalilila ukusambilila pe Yehova nu kumuwombela amanda Pe!