E BAIBOLO IKAPILULA AWANTU
Nasambilizile ukuti e Yehova awaluse swinya akatetela
WAKWASILWE MU: 1954
INSI: CANADA
VINO WALINJI WACENJEZYANGA AWANTU SWINYA, WATEYANGA INDWIZYO ZYAKUSITIKAPO
VINO NAKUZILE:
Nakulizile mwi tauni lya Montreal muno mwikalanga nkaninye awantu wano waculanga. Pano nalinji nimyaka 6, e tata wafwile swinya twasyazilevye ne mama, awino wasyazile akutusakamala mwe vyonsinye vino twalondanga. Twakwatwa 8 mu lupwa litu swinya anemuno ne nkwangu.
Pano nakulanga nakunzile nkaninye ukuwomvya imiti yino yikakola nu kwizya na wawunkalwe. Pano nafisizye imyaka 10 natalisile ukuwombako imilimo yimwi kuwa cilende apano nukukongolesya awantu e kaloba. Natemilwe ukuwipa uwufi nu kwiwila awantu mu wucenjezi, nakunkumile.
Pano nalinji ni myaka 14, apano nacizilemo ukwiwila awantu. Kucakulolelako nakalanga inkoloko zye gold izivule, ivingolwa apano na ma lin’gi nanti inindaminwe. Naviyemvyanga nkaninye apano vikazya pa mutengo wuno wakazizyangapo vino wapanjila ne gold yacisinka. Nayanga mukukazya ku ncende kuno kwazanwanga nkaninye awantu. Natemilwe nkaninye ukupanga indalama mu wucenjezi. Wanda wumwi napanzile indalama imvule zino zyafisile ku madola 10,000 (K63,000).
Pano nafisizye imyaka 15 wambinzile ku sukulu kuno wasambilizyanga ukuleka ukuwa ni miwele miwipe. Ntakweti ukwakwikala acino natalisile ukulala mu misewo na mu ma parki apano na ku viwuza.
Ilivule wakapokola wanjitanga nu kuya mukunduwulusya amuno nakunzile sana uwucenjezi. Pa mulandu wakuti vino nakazyanga vitawanga avya wun’go wasitela wanyepepo mu cifungo. Lelo nanti ciwe wo-o wandipilisyanga pa mulandu wawucenjezise apano nu kukazya ivintu ukwaso insambu. Vino nacitanga vitalinji icete swinya mpindi zimwi naseda ni mbundusi, apano mpindi zimwi napo, nawombanga nu tuwungwe twavipondo.
VINO BAIBOLO YAPILUZILE UWUMI WANE:
Nivwile umuku wakutalicilapo awantu wakulanda pe Baibolo lyo ndi myaka 17. Nikalanga nu mwanaci wino twizizyanyanga nawe swinya wizile atalika ukusambilila Baibolo ni Nte zya kwe Yehova. Ntivwile icete pano naweni ukuti watalisile ukukonka vino wasambililanga pa miwele mizima. Co-o calenzile ukuti musye nukuya mukwikala nu mwanaci wuno nalinji nu kutwala.
Ivintu vizile avipiluka pano umwanaci wino nalondanga ukutwala nawenye watalisile ukusambilila Baibolo ni Nte zya kwe Yehova. Natemilwe wo-o vino we-e umwanaci wapilusile amuno watalisile ukuwa amufuke swinya. Wanda wumwi nazumizile ukuya mukulongana ku ng’anda ya wufumu iya nte zya kwe Yehova. Wa Nte wampocelezile icete nkaninye swinya walinji nu mucinzi ni cilela. Wa-a awantu wapusineko na wantu wanji. Walupwa ;lwane watantemilwe, naweni wo-o ukufumililavye ku wutici. Wo-o vino wa Nte walanjizizye ukuti wankunzile avino nalondanga ukufuma na kali. Acino nazumizile ukutalika ukusambilila Baibolo.
Vino nasambililanga mwe Baibolo vyanjavwizye nkaninye. Nene na wanji wawili twapangine ukuti tuye mu kwiwa pakuti ndipile inkongole yino nalinji nayo iya ma dola 50,000. Lelo cazifile wo-o vino ntayileko amuno pe wa-a wawunji wawili wano wayileko, wenga wamunyefile ne winji wamukomile.
Pano natwalilizile ukusambilila Baibolo naweni ukuti nazipizile ukupiluka mu vintu ivivule.Kucakulolelako nasambilizile wowo vino Baibolo yikalanda 1 Wakorinte 6:10 pano pakati: “Nanti awakapoka, nanti awamilicisye nanti awakakolwa wipala nanti awakatula nanti awan’go, awamwatanye ndi wo watalipyana Uwufumu wa kwe Leza.” Pano nawazizye lyo-o iwaliko nelenginye pa viwipe vino nacitanga swinya nizilemponya ivilamba. Naweni ukuti nazipizile ukuleka ukucita iviwipe vyonsinyene vino nacitanga. (Waroma 12:2) Nalinji nu lombwa nalinji ne mukali swinya nalinji nu wufi nkaninye.
Nanti ciwe wo-o nasambilizile mwe Baibolo ukuti e Yehova wawa nu luse swinya akatetela. (Ayizeya 1:18) Napepanga nkaninye kwe Yehova nukumulambilizya ukuti anjavwe ukuleka kucita iviwipe vino nacitanga. E Yehova katici katici wanjavwizye ukuleka ukucita iviwipe vino nacitanga. Icicindame cino umwanaci wino nikalanga nawe twacisile, akulembesya itwala litu ku wuteko. Cino calenga ukuti mbe nuwumi pe yo-o impindi apamulandu wakuti nkakonka vino baibolo yikasambilizya.
Nawa nu wumi pe yo-o impindi, amuno nkakonka vino Baibolo yikasambilizya
Nalinji ni myaka 24 swinya twakweti awana watatu. Nazipizile ukuvwamba incito iyizima muno mutalinji ukwiwila awantu. Lelo ntasambilizile nkani, acino ntakweti ivipepala vyakwinjililapo. Nanenanga wano nayangako mukuvwamba incito na wucisinka. Mpindi zimwi nawalondololelanga nu ukuti nasambililanga Baibolo swinya nalondesyanga ukuwa umuntu muzima. Awavule wano nayangako ukuti wanjinjizye incito wakananga. Wanda wumwi pano nayile mukukwamba incito, nalondololezile wano walondanga ukunjinjizya inciti pe vino imiwele yane yalinai kali. Pano namunenile wambuzizye ukuti: “Ntamanyile vino ningalanda, lelo cimwi cikunena ukuti nzipizile ukukwinjizya incito.” Nasinincizizye ukuti e Leza wasusile amapepo yane. Mukupita kwa mpindi nene ne wakwane twabatizizwe nu kuw a inte zya kwe Yehova.
IVIZIMA VINO VYAFUMILEMO:
Cino calenga ukuti imbe nu wumi ukufika na pe yo-o impindi, apamulandu wakuti nkakonka vino Baibolo yikasambilizya swinya nsicita iviwipe. Nawa nu lupwa uluzima. Pamulandu wakusinincizya ukuti e Yehova wantetela, nawa ne kampingu muzima.
Papisile imyaka 14 ukufumilila pano natalisile umulimo wakusambilizya awantu Baibolo uwakuwomba amaawala70 pa mwezi. E wakwane nawenye watalika ukuwomba wo-o umulimo. Pa myaka 30 yino yapita, nawa ni nsansa amuno navwa awantu wano nkawomba nawo 22 ukuwa inte zya kwe Yehova. Ncili nkaya mu vifulo muno mukazanwa nkani awantu, nanti ciwe wo-o, pe yo-o impindi nsiya mukuwiwila ndi vino nacitanga lelo nkaya mukuwanena pe vino nazumilamo. Nkalonda ukuwanenako pi suwilo lino twawa nalyo ilyakwikala mu nsi mkpya muno mutaliwa incenjezi.—Amalumbo 37:10, 11.