E Armagedoni ankondo ya kulecelezya muno e Leza alilwisya amawuteko ya wantu. Ya-a amawuteko na wano wakayatunjilila wasilonda ukutungululwa ne Leza. (Amalumbo 2:2) Yo-o inkondo ya Armagedoni yiliyonona amawuteko yonsinye mu nsi.​—Daniel 2:44.

 Izwi lya kuti “Armagedoni” likazanwavye umuku wonga mwe Baibolo pa Ukuwumbulika 16:16. E Baibolo yalandizile lyankani mu kuwumbulika ukuti “mumasyo yano mu ci-Hebere yakakwitwa Armagedoni” amuno ‘izyamfumu munsi yonsi’ zililonganikwa “apaliponga wakatusye isumo pa wanda wukulu uwa kwe Leza wa maka yonsi”​—Ukuwumbulika 16:14.

 Awaweni wano walilwa inkondo ya Armagedoni? E Yesu ni vyelewulwa vya kwi yulu, awano walicimvya awalwani wa kwe Leza. (Ukuwumbulika 19:11-16, 19-21) Pe wa-a awalwani wa kwe Leza pawa wano wasikonka uwutunguluzi wakwe na wano wasicindika izina lyakwe.​—Ezekiel 39:7.

 Uzye inkondo ya Armagedoni yiliwela ku Middle East ku Asia? Awe. Inkondo ya Armagedoni yitaliwelavye ku ncende yonga. Lelo iliwa insi yonsinye.​—Jeremiya 25:32-34; Ezekiel 39:17-20.

 Izwi lya kuti Armagedoni, nanti “Har–​Magedon” mu ciHebere Har Meghiddohnʹ, likasula mukuti “umwamba wa Megiddo.” E Megiddo walinji amusumba wuno wawezile mucitungu ca Israeli. Kaali mwe co-o icitungu amuno walwilanga inkondo, muno wano wacimvyanga awawuye wawalovyanga. Inkondo zimwi pe zyo zyalembwa na mu Baibolo. (Wakapanzya 5:19, 20; 2 Izyamfumu 9:27; 23:29) Lelo nanti ciwe wo-o e, Armagedoni asa ncende yimwi yino yawela mupipi ne Megiddo. Kutawa umwamba uwukulu ku Megiddo pano awantu wano Leza alilwisya wangawungana. Swinya nanti amumupata wa Jezereli wonsinyene mutanga mukumane awantu wano e Yehova aliyonona. Acino e Armagedoni ankondo yakulecelezya muno e Leza alilwisya wonsinye wano wakakanya uwutunguluzi wakwe.

 Uzye inkondo ya Armagedoni yiliwa wuli? Nanti acakuti tutamanya vino Leza aliwomvya pakonona wano wakacita iviwipe. Twamanya ukuti angawomvya vino wawomvizye ku nsizi. Ndi vino imvula ya mawe, icinzumanzi, intalala, ukupanta kwa mvula, nizya ndwala. (Job 38:22, 23; Ezekiel 38:19, 22; Habakuki 3:10, 11; Zakariya 14:12) Inkondo ya Armagedoni yilivulunganya awalwani wa kwe Leza, icakuti walitalika ukukomana awatupunye. Lelo nanti ciwe wo-o, walimanya ukuti e Leza awino akuwonona.​—Ezekiel 38:21, 23; Zakariya 14:13.

 Uzye insi yiliyononwa pa Armagedoni? E Armagedoni yitaliyonona insi amuno ayino Leza wapa awantu ukuti wakwikalamo amanda pe. (Amalumbo 37:29; 96:10; Ekawizya 1:4) E Armagedoni yitaliwelako ku konona awantu lelo yilipususya awantu awavule, amuno kuliwa “iwumba kulu” lino lilipusuka.​—Ukuwumbulika 7:9, 14; Amalumbo 37:10, 11.

 Lelo e Baibolo nga yalanda pa nsi, mpindi zimwi lyo yikulanda pa wantu wano wasikwivwila Leza. (1 Yohani 2:15-17) Fwandi wanye awantu ayili insi yino yili ku ‘nsilo’ yino e Armagedoni yiliyonona.​—Mateyu 24:3, King James Version.

 Ampindi ci pano kuliwa inkondo ya Armagedoni? Pano e Yesu walanzile pi “tamyo lya kutinya” lino lilitwalilila mpaka pa Armagedoni, watili: “Pasi nanti wenga wino wamanya ukwiza kwawanda wowonye nant’ ampindi nanti awangelinye awamwiyulu, nanti a Mwananye; nkandi Umukwasi wenganye-nsu awino wamanya.” (Mateyu 24:21, 36) Lelo nanti ciwe wo-o, vino Baibolo yikalanda vikalanjizya ukuti e Armagedoni yiliwako pampindi ya kuwako kwa kwe Yesu kuno kwatalisile mu 1914.​—Mateyu 24:37-39.