E Yesu walanzile pi lyasi lyakwe ilya pa mwamba ukuti: “Achaleka ivintu vino mukalonda wanji wawachitila, avino namwe wachitilanji.” (Mateyu 7:12; Luka 6:31)

•  Uzye ukucitila wanji vino tukalonda watucitile kukasula mwi?

•  Amulandu ci wuno ukucita wo-o kwacindamila?

•  Uzye ya-a amazwi yakalanda pe vino tungapoka kwe wanji?

•  Uzye tungayawomvya wuli?

 Ya amazwi yakatuwomelezya ukucitila wanji vino tukalonda watucitila. Kucakulolelako, awavule wakakwivwa icete nga tukuwacindika, ukuwalanjizya icikuku nu lukundo. Fwandi wonye avino tuzipizile ‘twachitila’ wanji.—.Luka 6:31

 Ya-a amazwi yangatwavwa muvintu ivivule. Kucakulolelako,  . . .

•   Yangawomya itwala litu.—Waefeso 5:28, 33.

•   Yangavwa awakwasi ukukuzya icete awana.—Waefeso 6:4.

•   Kungalenga twakwivwana icete ni viwuza vitu, awina mupalamano, nawano tukawomba nawo,.—Imilumbe 3:27, 28; Wakolose 3:13.

 Ya-a amazwi ayaliyonga nayano tukazana mwi layano kali (Old Testament). Amazwi yano Yesu walanzile pe vino tuzipizile twacitila wanji “ayano tukazana mu ma buku ya masundo [amabuku yakutalicilako 5 aya mwe Baibolo] na ya wakasesema.” (Mateyu 7:12) Munzila yinji, mwe ya-a amazwi mwawa isundo ilicindame lino tukazana mwi Layano Kali ilyakuti: Uwakunda umuwuyo ndi vino wayikunda.—Waroma 13:8-10.

 Awe. Icikulu nkani cino yakalandapo, akupa wanji. Pano e Yesu walanzile ya-a mazwi wasulanga mukuti, tuzipizile ukucita ivizima ku wantu wonsinye ukuwikakovye na walwani witunye. (Luka 6:27-31, 35) Fwandi yakatuwomelezya ukucita ivizima kwe wonsinye.

1.  1. Uwakwiluka. Uwawika amano kwe wanji nukwiluka vino wakuyivwa nanti ukupitamo. Kucakulolelako, ungalola ukuti wumwi wasyupikwa ukunyamula vino wafuma mukukala, ne mpamwi kungawako umwina mupalamano wino ali mu cipatala nanti ungalola ukuti wino mukawomba nawe asakamisilwe. Nga cakuti ukalonda ‘ukusechelesya wanji,’ ulivwamba inzila yakulandilamo nanti ukucitako vimwi vino vingawavwa.—Wafilipi 2:4.

2.  2. Mwawivwicisya. Mwakwelezya ukuyivwa ndi vino wakuyivwa. Uzye ungayivwa wuli nga cakuti awemuno ukupita mwe vino wakupitamo? (Waroma 12:15) Nga cakuti ukwivwicisya vino wanji wakuyivwa, cililenga uwavwambisya ukuwavwa.

3.  3. Mutayimwamya. Uwakwizuka ukuti twapusana pusana. Vino wanji wangakunda ukuwacitila asa vino wewe ungakunda ukuti wakucitile. Acino pa vintu ivivule vino ungakunda ukuwacitila, uwasolapo vino wangakunda nkani.—1 Wakorinte 10:24.