Awe. E Baibolo yisilanda ukuti indalama zyawipa nanti ukuti amusisi wa luwembu. Amazwi yano awantu watemwa ukuwomvya ayakuti “Indalama amusisi wa misango ya wuwipe wonsi” wasiyamalilicizya ukulingana na vino e Baibolo yikalanda swinya yakasovya awavule. E Baibolo yeni yikalanda ukuti “Ukukunda kwa ndalama a musisi wa misango ya wuwipe wonsi.” a—1 Timoti 6:10, King James Version.

•  Avyani vino e Baibolo yikalanda pa ndalama?

•  Amulandu ci wuno e Baibolo yikatusocela pa kukunda indalama?

•  Avizima ci vino tungazanamo nga twakonka vino e Baibolo yikalanda pa ndalama?

•  Amawaliko yano yakalanda pe vino tuzipizile twalola indalama

 E Baibolo yikalanda ukuti indalama zyazipa, amuno nga twaziwomvya icete zingatwavwa swinya ‘zingatusunga.’ (Ekawizya 7:12) Nacinji acakuti, yikasalifya wonsinye wano wakapa awawuye nu kwavwa wanji ukuwomvya indalama.—Imilumbe 11:25.

 Pa mpindi iyili yonganganye yikatusoka ukuti,tutazipizile ukuwika amano sana ku ndalama. Amuno yikalanda ukuti: “Fumyani imyezo yinu kukukundisya indalama, muwatima navino muli navyo.” (Waheberi 13:5) Pa-a tukasambililako ukuti tuzipizile twawomvya icete indalama nu kukana vwambisya ukuwa ni vyuma. Lelo tuzipizile vye ukuteka umwezo kwe vino tukalonda mu wumi ponga ngati, avyakulya, ivizwalo nu mwa kwikala.—1 Timoti 6:8.

 Awantu wano wawa nu lunkumbwa wataliwa nu wumi wa muyayaya. (Waefeso 5:5) Umulandu wonga awakuti, ulunkumbwa anzila yimwi iyaku pepelamo utuluwi nanti ukupepa kwa wufi. (Wakolose 3:5) Umulandu wunji awakuti, ulunkumbwa lwakulondesya ukukwata ivivule, aluno lukalenga awantu wapotwa ukukonka amasundo ya kwe Leza Imilumbe 28:20 yikalanda ukuti “ndi ukalwilichila ukuti uwe ninsawo, ulisundwa.” Amuno wangatunkwa nu kucita iviwipe nu kupanga imilandu ponga ngati ukupoka ivintu pamaka, ukwiwila umuntu vimwi, ukwiwa umuntu pa maka, nanti ukukoma.

 Nanti acakuti ukukunda indalama kusilenga umuntu ukuwa ni miwele imiwipe, lelo kungamuletela intazi. E Baibolo yikalanda ukuti “wano wakulonda ukuwa ninsawo wakaponela mukwelezwa wanyepwa kuvipingo vivule ivyawutumpe nukulonda kuwipe kuno kukakonona awantu.”—1 Timoti 6:9.

 Nga cakuti tusakucita iviwipe pa mulandu vye ni ndalama nu kucita ivintu vino vikasecelesya e Leza, aliwa awatwavwa nu kututunjilila swinya tulicindikwa. Amuno walaya wonsinye wano wakatwalilila ukuwa ni cisinka kwe weliwe ukuti: “Ntalitela nkusye; ntalitela nkulechelezye.” (Waheberi 13:5, 6) Swinya akatuwomelezya nu kuti “umusuwilwa alilanga ali nuwumi wuzima, uwachimwemwe.”—Imilumbe 28:20.