E Leza akalonda ukutupa ‘impindi yakunkolelo iyizima nisuwilo.’ a (Jeremiya 29:11) Umulandu wonga wuno watupelela e Baibolo apakuti “twalolela nuwuchimyamya mbali ninsimpo zino amawaliko amatele yatupa.” (Waroma 15:4) Ndi vino twandi tulole vino Baibolo ikalanda vingalenga tuwe nisuwilo, swinya amalayo yakalenga tuwe nisuwilo lyampindi yakunkolelo iyizima

Pelyo-o ifwa

•  Uzye e Baibolo ingakwavwa wuli ukuwa ni suwilo?

•  Alisuwilo lya musangoci lino Baibolo ikapa ku wantu?

•  Amawaliko yano yakalanda pi suwilo

 Ikatupanda amano pevyo tungacita mu mikalile yitu nu kutwavwa ukuwalola ivintu munzila inzima. Lekani tulole vino tungacita wo-o.

•   Mwavwamba ukupanda amano mu Baibolo. Pa Amalumbo 119:105 pakati: “Izwi lyako alukozyo lwakuntungulula swinya akuswepa kwanzila yane.” Ulukozyo lukawomba ivintu viwili, lungatukozezya pano tukulyata nu kutukozezya ukulola vino vili kunkolelo. Wonye avino ni visinka vyamasundo ya mu Baibolo vingatwavwa ukumala intazi zino tukupitamo nu kutwavwa ukuwa ni suwilo. Amasambilizyo ya mu Baibolo yangatupa amaka swinya ‘yangatwavwa ukusankana’ (Amalumbo 19:7, 8) Ikatwavwa nu kumanya vino e Yehova akalonda twakwikala na vino akalonda insi ukuwa. Lyo-o isuwilo likalenga twawa ni nsansa nu kuteka imyezo kwe vino tuli navyo.

•   Muwalenga ukwavwa ukufuma kwe wanji. Nga cakuti tusakamisilwe tungayitalusya ku viwuza na kwa lupwa. Lelo e Baibolo yikati ukucita wo-o kutazipa, amuno kungalenga tukane ukupingula icete pa vintu. (Imilumbe 18:1) Waciwuza na walupwa awano wangatwavwa ukupingula icete pa vintu. Wangatunenako vimwi vino vingatwavwa ukucimvya intazi. (Imilumbe 11:14) Swinya wangatuwomelezya nu kutusansamusya napalyanye pano tukwivwa ngati pasi vino tungacita, ukufika mpaka ivintu vize viweko icete.—Imilumbe 12:25.

•   Mwapepa kwe Leza. E Baibolo yikati: “Tayila Imfumu Leza amatamyo yako, wandi akwavwilizye; atalitela aleke umuntu muzima achimvwe.” b (Amalumbo 55:22) Yikalanda nu kuti e Yehova we “Leza wino akaleka tuwalolela nisuwilo.” (Waroma 15:13) Mungapepa kwe weliwe pa “kusaya kwinu konsinye nanti amasakamika” nu kusuwila ukuti akasamisakamala. (1 Peter 5:7) E Baibolo yikati, alileka “muwe ninsimpo, namaka, muwe mulufula lwenecho.”—1 Peter 5:10.

•   Mwaleka intazi zyawomya isuwilo linu. E Baibolo yalaya ukuti, wensi wino akwivwila “[Leza] aliwa nu mutende. Aliw’ umutende, nanti kutina chimwi.” (Imilumbe 1:33) Ku cakulolelako, pano imvula ya cimuza yatonyile ku Australia, ivintu ivivule ivya mwanaci uwizina lya kuti Margaret vyononesile. Lelo ukucila ukuti awawika sana amano kwe vino vyononesile, wizile asambilila isambililo ilicindame ilya kuti ivyuuma vingasila impindi iyili yonsinye. Ukumanya co-o icisinka kwalenzile awavwambisya ukuwikavye amano ku vintu ivicindame ndi vino ku lupwa lwakwe, iviwuza, ku wuciwuza wakwe ne Leza na kwi suwilo lino lyalandwapo mu Baibolo.—Amalumbo 37:34; Jemusi 4:8.

 E Baiolo yalaya ukuti ivintu vilizipa munsi. Swinya vili nu kucitika nombanye. Ukwasowa nu kuvwilika vino vikucitika mu nsi vikulanjizya ukuti tukwikala “mumanda yakupelelecezya” aya kwe yo-o insi. (2 Timoti 3:1-5) Nombanye e Leza wandi atalike ukuzifya ivintu munsi swinya alifumyapo ulufyengo nu kucula. Alicita wo-o ukupitila mu wuteko wuno wuliteka insi yonsinye wuno wukakwitwa ukuti Uwufumu wa kwe Leza. (Daniel 2:44; Ukuwumbulika 11:15) Wonye wo-o awuli wuteko wuno e Yesu walandangapo mwi pepo lya cilanjililo pano walanzile amazwi ya kuti: “Uwufumu wako wize. Ukulonda kwako kuchitwe munsi.”—Mateyu 6:9, 10.

 E Baibolo yalondolola vino e Leza walondanga ukuti awantu wakwikala. Lolani intazi zimwi zino Uwufumu wa kwe Leza wulifumyapo:

•   Ivipowe kutaliwa. ‘Insi yilileta ivizawalo vyakwe.”—Amalumbo 67:6.

•   Indwala kutaliwa. “Pasi wumwi wino akwikalanga munsi yitu wino aliwalwala.”—Ayizeya 33:24, footnote.

•   Imfwa kutaliwa. Leza “wandi awapyele aminsozi yonsi muminso yawo. Kutaliwa imfwa swinya, amalanda yataliwapo, nant’ akulila, nant’ awulumilanye. Ivintu vikali vyasowa napano vyaya.”—Ukuwumbulika 21:3, 4.