Uzye e Leza Wawa Apali Ponsinye?
Vino Baibolo ikakwasuka
E Leza akalola vyonsinye swinya angacita icili consinye konsinye kuno akulonda. (Imilumbe 15:3; Waheberi 4:13) Lelo e Baibolo isisambilizya ukuti e Leza wawa apali ponsinye na mu cili consinye. Ikalanjizya ukuti amuntu swinya wawa na kuno akakwikala.
Vino Leza akaloleka: E Leza amuzimu. (Yohani 4:24) Atanga aloleke ku wantu. (Yohani 1:18) Ivilolwa ukufuma kwe Leza vino vyawalikwa mwe Baibolo vikalondolola e Leza ukuti wawa na kuno wikala. Visimulondolola ukuti wawa apali ponsinye.—Ayizeya 6:1, 2; Ukuwumbulika 4:2, 3, 8.
Akwinye kuno Leza akakwikala?: E Baibolo ikalanda ukuti e Leza akakwikala “mwiyulu.” (1 Izyamfumu 8:30) Co-o cikusula ukuti e Leza asikwikala munsi lelo wawa na kuno akakwikala, kwi yulu. E Baibolo ikalanda ni mpindi pano ivyelewulwa vya kumuzimu ‘vyalolesile pe Yehova, a ukulanjizya ukuti e Leza wawa ni cifulo kuno akakwikala.—Job 1:6.
Nga cakuti e Leza atawa apali ponsinye, uzye kweni angansakamala pa lwane?
Ee. E Leza akasakamala nkaninye umuntu wenga na wenga. Nanti aca kuti akakwikala kwi yulu, akalola awantu munsi wano wakalonda ukumusecelesya, swinya akawapususya. (1 Izyamfumu 8:39; 2 Imilandu 16:9) Mulole vino e Leza akasakamala wakapepa wakwe:
Nga mwapepa: E Yehova akakwivwa ipepo palyanye pano mukulanda nawe.—2 Imilandu 18:31.
Nga muli na masakamika: ‘E Yehova ali mupipi na wano wawa ni myezo ya wulanda; swinya akapususya awasakamikwe imyezo.’—Amalumbo 34:18.
Nga mutamanyile ivya kucita: E Yehova ‘alimisambilizya inzila ino muzipizile ukupitamo’ ukuwomvya Izwi lyakwe e Baibolo.—Amalumbo 32:8.
Vino awantu wakalanda pa cisambilizyo ca kuti Leza wawa ukuli konsinye
Vino awantu wakalanda: E Leza wawa ukuli konsinye mu vyelewulwa.
Icisinka: E Leza asikwikala mu nsi nanti ukuli konsinye mu lwelele. (1 Izyamfumu 8:27) Kweni acisinka ukuti intanda ni vintu vinji vino welewula vikalumbula “uwukakankala wakwe Leza.” (Amalumbo 19:1) Lelo e Leza asikwikala mwe vino welewula wulyanye vino umuntu wino wamanya ivya ku drowa asikwikala mwe cino wadrowa, nanti cingaloleka icete wuli. Kweni cino wadrowa cingatunena cimwi pe wino wacipanzile. Wonye avino ni vintu vino Leza welewula vikatunena cimwi pa ‘miwele ya kwe Kelewula yino yisiloleka’ ndi vino amaka, amano nu lukundo.—Waroma 1:20.
Vino awantu wakalanda: E Leza azipizile ukuwa apali ponsinye pa kuti amanya vyonsinye nu kuwa na maka yonsinye.
Icisinka: Umuzimu uwutele nanti amaka yakwe, avino akawomvya. E Leza akawomvya umuzimu wakwe ukumanya nu kucita icili consinye, ukuli konsinye, pa mpindi iyili yonsinye ukwasowa nukuti aweko.—Amalumbo 139:7.
Vino awantu wakalanda: Amalumbo 139:8 yakasambilizya ukuti e Leza wawa apali ponsinye wo-o vino yakalanda ukuti: “Ndi achino ngaya mwi yulu, ungalanga akun’ uli; ndinalambalala munsi yawafwe [mu nkungwe] ungalanga akun’uli.”
Icisinka: Lyo-o iwaliko lisilanda pa cifulo kuno Leza akakwikala. Amvwango vye iya kutwavwa ukumanya ukuti kusi nanti kumwi kuno e Leza angapotwa ukutulola nu kutwavwa.
a E Yehova ali izina lya kwe Leza ndi vino lyasokololwa mwe Baibolo.
Mungakunda na vyoo
AMASAMBILIZYO YA MU BAIBOLO AMACINDAME
Uzye Leza Awakusimicila?
Sambililani pa wusinincizyo wuno wukalanjizya ukuti cawamo amano ukuzumila mwe Leza.
IVYASUKO KU MAWUZYO YA MU BAIBOLO
Uzye Umuzimu Uwutele Acani?
E Baibolo ikalanda pa muzimu uwutele ukuti “umunwe” wa kwe Leza.
PA NTE ZYA KWE YEHOVA
Lengani uwa Kumitandalila
Lanzyani pi wuzyo lino mwakwata pe Baibolo, nanti sambililani na vinji pa Nte zya kwe Yehova.