Yehova angawa we ciwuza wako nga cakuti wamumanya icete sana, wati uwacita na vino vikamuselesya. Ngu kucita wo-o, apano ‘alipalamila kwe wewe.’ (Jemusi 4:8) Baibolo ikatunena ukuti Leza atawa “ukutali” ku muntu wenga na wenga.—Imilimo 17:27.

•  Vino ungacita pakumanya Leza

•  Uwufi wuno awantu wakawipa pakumanya Leza

 Uwawazya Baibolo

•  Vino Baibolo ikavwanga: “Amazwi matele yonsi yafutilwa nu-mupo wakwe Leza.”—2 Timoti 3:16.

•  Muno cikusula: E Leza awili umweneco wa mazwi ya mwe Baibolo. Watunguluzile wano walembanga ukuwalika amelenganyo yakwe. Mwe lyo-o ibuku ilipusaneko amuno watusokololela vino akalonda twakwikala. Swinya watunena na vino wawa, ukuti awalukundo, uluse nu mulinganya.—Ukufuma 34:6; Amasundo 32:4.

•  Vino ungacita: Uwawazya Baibolo cila wanda. (Joshua 1:8) Uwakwelenganya pe vino ukuwazya nukuyikolowozya ukuti: ‘Avyani vino vikunsambilizya pe Leza?’—Amalumbo 77:12.

   Kucakulolelako wazya e Jeremiya 29:11, nukuyikolowozya ukuti: ‘Avyani vino Leza akanjelenganizizya? Uzye amutende nanti awuwipe? Uzye akalonda ukunsunda pa viluwo vyane nanti akalonda ukuti ivintu vize vinzipile ku nkolelo?’

 Uwawa ni mpindi yakulola vino Leza welewula

•  Vino Baibolo ikavwanga: “Vino visiloleka ivya kwe Leza vikuloleka pa lwenze, vilukwa kwa kwe vino welewula.”—Waroma 1:20.

•  Muno cikusula: Vino tukalola vikatwavwa ukumanya imiwele ya kwe Leza. Cawa nge tukutamba e mashini nanti icikope cino wumwi wadrowa. Kweni nanti tutamumanyilenye, vino twalola vingalenga tumanyeko vimwi pe weliwe. Ku cakulolelako, vino uwongo wamuntu wapangwa vikatwavwa ukumanya ukuti e Leza wawa na mano kutaluwa. Ne nga twalola intanda, na maka yano ilanzi lyakwata tukakwiluka ukuti e Leza awa maka nkaninye.—Amalumbo 104:24; Ayizeya 40:26.

•  Vino ungacita: Uwasyako impindi yakulola nukwelenganyapo pe vino Leza welewula. Pano ukucita wo-o, uwayikolowozya ukuti, ‘Uzye inzila yino co-o icelewulwa capanjilwamo yikunsambilizya cani pe Leza?’ a Kweni ukulanda vye icisinka, asa miwele yonsi yino tulisambilila pe Yehova ngatwawikavye amano pakutamba vino wapanga. Wo-o awuli umulandu wuno watupelela nu Baibolo.

 Uwawomvya izina lya kwe Leza

•  Vino Baibolo ikavwanga: “Nditula wano wankunda nukuchinjilila wano wamanya. Ndiwankutila inkuuta ndiwatolelela.”—Amalumbo 91:14, 15.

•  Muno cikusula: E Leza uwizina lyakuti Yehova, akawikako sana amano kwe wano wamumanya akuli ukuti wano wamanya izina lyakwe, swinya wakaliwomvya na mu mucinzi. b (Amalumbo 83:18; Malakayi 3:16) Wayitalicilako umweneconye ukutunena izina lyakwe ukuti: “Nene ne Yehova. Alili izina lyane”.—Ayizeya 42:8.

•  Vino ungacita: Uwawomvya izina lya kuti Yehova pano ukulanda pe weliwe.

 Uwapepa kwe Yehova

•  Vino Baibolo ikavwanga: “[Yehova] akuyanga kwakwe wonsi wano wakumwita.”—Amalumbo 145:18.

•  Muno cikusula: E Yehova akapalamila kwe wonsinyene wano wakamupepa mu cisinka. Ipepo aluwali lumwi ulwa kupepa luno lukalanjizya ukuti twacindika sana e Leza.

•  Vino ungacita: Uwapepa lyonsinye. (1 Watesalonika 5:17) Uwanena e Leza vino ukuyivwa na vyonsinye vino vikukusakamika.—Amalumbo 62:8. c

 Uwawomya isuwilo lyako mwe Leza

•  Vino Baibolo ikavwanga: “Pasi wumwi wino angasecelesya Leza ndi asi nisuwilo.”—Waheberi 11:6.

•  Muno cikusula: Pakuti tupalamile kwe Leza, tuzipizile ukusuwila ukuti akuno wawa. E Baibolo yikati ukuwa ni suwilo asakupelelavye pa kusuwila ukuti e Leza akuno wawa. Lelo tuzipizile nukusuwila ukuti vino walaya vilicitika nukuti vyonsinyene vino akatunena vyawelako ku wuzima witu. Ndi wulyanyene vino pakuti tuwe swe viwuza nu muntu wumwi tuzipizile ukumusuwila.

•  Vino ungacita: Ukuwa ni suwilo kwasintilila pakuwa na mano. (Waroma 10:17) Acino talika ukusambilila Baibolo pakuti uyisinincizizye wemweneco ukuti ungasuwila Leza nukupanda amano kwakwe. Inte zya kwe Yehova wangakunda ukusambilila Baibolo na wewe d

 Uwacita vino vikasecelesya Leza

•  Vino Baibolo ikavwanga: “Amuno loo a lukundo lwa kwe Leza, kuno tukatontela amasundo yakwe.”—1 Yohani 5:3.

•  Muno cikusula: E Yehova akawa we ciwuza wa wantu wano wamukunda swinya wano wakawombesya na maka ukukonka amasundo yakwe.

•  Vino ungacita: Pano ukuya ukusambilila Baibolo, uwalola vino Yehova wakunda na vino wapata. Swinya uwayikolowozya ukuti, ‘Amwinye muno ningapilukamo pakuti ndasecelesya e kelewula wane?’—1 Watesalonika 4:1.

 Lola uwuzima wa kwe Leza ukupitila mukukonka amasundo yakwe

•  Vino Baibolo ikavwanga: “Vwamba-vwamba wemweneco ulole ukuzipa kwa Mfumu Leza vino kuli.”—Amalumbo 34:8, The Bible in Basic English.

•  Muno cikusula: E Leza akukwita pa kuti ulole uwuzima wakwe. Nga walola ulukundo lwakwe na vino akukusakamala, uliwavwambisya ukupalamila kwe weliwe.

•  Vino ungacita: Pano ukuwazya Baibolo, uwawomvya vino ukusambilila nukulola ivizima vino vikafumamo. (Ayizeya 48:17, 18) Cinji acakuti, uwasambilila ku vyakulolelako vya wantu wano Yehova wavwa ukusipicizya intazi, ukuzifya ivintu mu wumi ponga nu lupwa lwawo, nga na vino wiza wawa ni nsansa zyacisinka . e

 Uwufi: Tutanga tuwe swe viwuza vya kwe Leza amuno tutamanya nge wawako.

 Icisinka: Ivintu vimwi pe Leza vyasyupa ukwivwicisya, ponga nge awowo vino Baibolo yikati Amuzimu. Lelo nanti ciwe wo-o, tungawa swe viwuza vyakwe. E Baibolo yikalanda ukuti pakuti twize tuwe nu wumi wa muyayaya tuzipizile ukumumanya. (Yohani 17:3) Yikawomvya namazwi amapepuke pakutunena imiwele ya kwe Yehova, ukulonda kwakwe nga na pa masundo yakwe. (Ayizeya 45:18, 19; 1 Timoti 2:4) Swinya yatunena na pi zina lyakwe. (Amalumbo 83:18) Acino tutanga tumanyevye Leza lelo tungawa ni viwuza vyakwe.—Jemusi 4:8.