Awina Klistu wazumila ukuti e Yesu wafwizile awantu pa mulandu wa membu zyawo. (1 Peter 3:18) Lelo nanti ciwe wo-o, pa kuti umuntu apusuke atazipizile vye ukupelela pa kuzumilavye ukuti e Yesu wekatula. Amuno nimizimu yiwipe yamanya ukuti e Yesu ‘amwana wakwe Leza,’ lelo yiliyononwa yitalipusuka.—Luka 4:41; Yuda 6.

•  Avyani vino nzipizile ukucita pa kuti njize mpusuke?

•  Avyani vino awantu wakalanda pa “Ipepo lya Muwembu”?

•  Akwinye kuno “Ipepo lya Muwembu” lyafumilila?

•   Muzipizile ukuzumila ukuti e Yesu wapile uwumi wakwe pamulandu ni membu zyitu. (Imilimo 16:30, 31; 1 Yohani 2:2) Co-o casanzyamo nu kuzumila ukuti e Yesu walinji amuntu swinya na vino e Baibolo yikalanda pe weliwe avya cisinka.

•   Mwasambilila vino e Baibolo ikalanda. (2 Timoti 3:15) E Baibolo yikalanda ukuti e Paulo ne Silasi wanenile e kasunga wa ng’anda ya vingololo ukuti: “Suwila mu Mfumu e Yesu wandi utulwe.” Pasinzi yakwe co-o wizile awatalika ukumusambilizya ‘izwi lya kwe [Yehova]’ a. (Imilimo 16:31, 32) Co-o cikulanjizyavye ukuti we-e umufungwa walinji nu ku suwilavye mwa kwe Yesu nga wasambilila izwi lya kwe Leza. Amuno walondekwanga ukwivwicisya icisinka ca mu mawaliko.—1 Timoti 2:3, 4.

•   Muzipizile ukulapila. (Imilimo 3:19) Namwemwenye muzipizile ukulapila, nanti ukwivwa uwuwi pe vino mwelenganyanga nu kucita kali. Mulilanjizya ukuti mulapizile nga cakuti mwaleka ukucita vino e Leza wapata, nu ‘kulanjizya imilimo ya kutontolokwa kwinu.’—Imilimo 26:20.

•   Muzipizile ukubatizwa. (Mateyu 28:19) E Yesu walanzile ukuti wano wakulonda ukuwa awasambi wakwe wazipizile ukubatizwa. We-e umufungwa wino tulanzilepo kali wizile abatizwa. (Imilimo 16:33) Wonye wo-o avino calinji na ku mutumwa Peter, pano wawizizizye awantu icisinka pakwe Yesu, “awavule awakwe woliwo awasuwila amazwi yakwe awabatizwa.”—Imilimo 2:40, 41.

•   Mwakonka vino e Yesu walanzile. (Waheberi 5:9) Wonsinye wano ‘wakasunga vyonsi’ vino e Yesu wawanenile, wakalanjizya ukuti awasambi wakwe ukupitila mwe vino wakacita. (Mateyu 28:20) Acino waliwa ‘awakatontela wa mazwi, nanti kuwa wakivwa.watupu ’—Jemusi 1:22.

•   Mwazizimicizya ukufika ku nsilo. (Marko 13:13) Awasambi wakwe Yesu wakalondekwa ‘ukuzizimicizya’ pa kuti wize wapusuke. (Waheberi 10:36) Kucakuloleko umutumwa Paulo watwalilizile ukuwa uwacisinka kwe Leza, swinya wivwilanga vyonsinye vino e Yesu wasambilizyanga ukufika na kumfwa.—1 Wakorinte 9:27.

 Awa mu mipepele wamwi wakapepa amapepo ponga ngati “Ipepo lya Muwembu” nga na “Ipepo lya Kulapila.” Wakakwelenganya ukuti ya-a amapepo yakalenga awalondolola uluwembu lwawo nu kuzumila ukuti e Yesu wa wafwizile pa membu zyawo. Swinya wakapepa nu kuti e Yesu ayize mu myezo yawo nanti muwumi wawo. Lelo nanti ciwe wo-o e Baibolo yitalandapo nanti ukuzumilizyako kwe lyo-o “Ipepo lya Muwembu” lino wapanga.

 Awantu wamwi wakakwelenganya ukuti nga wapepa lyo-o “Ipepo lya Muwembu” lye calala casila wapusuka. Lelo kusi nanti wumwinye wino alipusuka pa mulanduvye ni pepo. Amuno tukatwalilila ukuluvyanya pa mulandu wakuti tutapwililika. (1 Yohani 1:8) Fwandi awuli umulandu wuno e Yesu wanenezile awasambi wakwe ukuwapepa lyonsinye pa kuti watetelwa imembu zyawo. (Luka 11:2, 4) Lelo nanti ciwe wo-o, awina Klistu wano walinji ni suwilo lya kupusuka wasovizye lo-o ulongo amuno walesile ukukonka amasundo ya kwe Leza.—Waheberi 6:4-6; 2 Peter 2:20, 21.

 Wano wakalemba amalyasi ya kali wakalanda ivipusane pusane pe kuno kwafumilila “Ipepo lya Muwembu.” Wamwi wakalanda ukuti ulutambi lwi pepo lya Muwembu lwatalisile pano kwalinji ukupawukana kwa mipepele. Newamwi wazumila ukuti lyo-o “Ipepo lya Muwembu” lyatalisile pano kwalinji ukusalanga kwa mipepele ukufumilila mu ma 1700 ukufika mu ma 1800. Nakuwa co-o icisambilizyo cisikwivwana na vino amawaliko yakalanda, swinya e Baibolo yisituwomelezya ukuwanyocezya amapepo nanti ukuyasunjila.