Icinyamana ica mitwe 7 cino calumbulwa pa Ukuwumbulika 13:1 cikakwimililako imitecele yonsinye iya mapolitiki.

•   Cawa nu wulasi, amaka, ni cilimba ca wufumu, co-o cikusula ukuti amitecele yonsinye iya mapolitiki.​—Ukuwumbulika 13:2.

•   Capwa amaka pa wantu “wamyiko yonsi, awansi zyonsi nindimi zyonsi,” acino asa wuteko vye wonga uwa nsi yonsinye.​—Ukuwumbulika 13:7.

•   Vino cikaloleka vyakolana ni vinyamana 4 vyo vyalandwapo mu wusesemo wa mwe Daniel 7:​2-8. Cikaloleka ngati ambwili, cawa na matamba ya kwe bere, umulomo wa nkalamu, ni mpembe 10. Ivinyamana ivya muwusesemo wa kwe Daniel wavilondolola ukuti azyamfumu 4, nanti amawuteko yano yakwatisya amaka. (Daniel 7:​17, 23) Acino icinyamana cino calumbulwa mwi buku lya Ukuwumbulika icipandwa 13 cikakwimililako utuwungwe tonsinye utwa mitecele ya nsi.

•   Icinyamana cikafuma “mwe sumbi,” akuli ukuti mu wantu na wantu wano wakapanga ya-a amawuteko ya wantu.​—Ukuwumbulika 13:1; Ayizeya 17:12, 13.

•   E Baibolo ikalanda ukuti inambala ya kuti 666, nanti izina lya cinyamana, “a ciwazizyo ca muntu [inambala ya muntu].” (Ukuwumbulika 13:17, 18) Ya-a amazwi yakalanjizya ukuti icinyamana cino calandwapo mwi buku lya Ukuwumbulika icipandwa 13 akawungwe ka wantu, asa muzimu nanti iviwa.

 Nanti aca kuti impindi zimwi insi zikavilwa ukwivwana, lelo ilivule zikalemenkana pa kuti zitwalilile ukuteka ukucila ukutontela Uwufumu wa kwe Leza. (Amalumbo 2:2) Swinya zililemenkana ponga pakuti zize zilwe na wangeli wa kwe Leza wano walitungululwa ne Yesu Klistu pa nkondo ya Armagedoni, lelo zyonsinyene zyo-o ziliyiza zyononwe.​—Ukuwumbulika 16:14, 16; 19:19, 20.

“Impembe 10 ni mitwe 7”

 Mu Baibolo amanambala yamwi yakakwimililako ivintu vimwi. Ku cakulolelako amanambala ye 10 ne 7 yakakwimililako ivintu vino vitasowezile. Cino cikatwavwa ukumanya muno mwasula amazwi ya kuti “impembe 10 ni mitwe 7” iya cinyamana ca mu Ukuwumbulika icipandwa 13, acilikolanya “ca cinyamana” cino calandwapo mu Ukuwumbulika, co-o, acinyamana iciwenzu cino cawa ni mitwe 7 ni mpembe 10. (Ukuwumbulika 13:​1, 14, 15; 17:3) E Baibolo ikalanda ukuti imitwe 7 iya cinyamana iciwenzu “a mfumu munenula mbali [7],” nanti amawuteko.​—Ukuwumbulika 17:​9, 10.

 Fwandi imitwe 7 iya cinyamana cino calumbulwa mwe Baibolo pa Ukuwumbulika 13:1 yikakwimililako amawuteko 7: ya-a amawuteko, nanti insi zino zyakwatisya sana amaka munsi swinya zino zikacuzya awantu wa kwe Leza. Zyo-o insi zyatalicizile pe Egypt, Assyria, Babiloni, Medo-Persia, Greece, Rome, mpaka pano tufisile pe Anglo-America. Pa mulandu wakuti impembe 10 zikakwimililako insi zyonsinye, inkulu ni ntici, lyo ivisote vya wufumu nanti utwawi [utwamba], vino vyawa ku lupembe longa longa vikalanjizya ukuti zyo-o insi zikateka impindi iyili yonganye ni nsi yino yakwatisya amaka pe yo-o impindi.