E Adamu ne Eva awano walinji awakutalicilapo ukuwembuka. Pano wakanile ukwivwila e Leza ukupitila mukulya “ku muti wakumanyila ivizima ni viwipe,” wacisile uluwembu luno lukakwitwa ukuti uluwembu lwa kutalicila. a (Intaliko 2:16, 17; 3:6; Waroma 5:19) E Adamu ne Eva wawakanizye ukulyako kwe coco icimuti, amuno cimililangako insambu zino Leza wakwata izyakusolela awantu icizima ni ciwipe. Wowo vino walile kwe wowo umuti, E Adamu ne Eva wayilemezilevye nu kuyipa insambu aweneco izya kuyipingulilapo icizima ni ciwipe. Pano wacisile wo-o, wakanile uwutunguluzi wa kwe Leza.

•  Uzye “uluwembu lwa kutalicila” lwakumile wuli e Adamu ne Eva?

•  Uzye “uluwembu lwa kutalicila” lwatukuma wuli sweswe?

•  Uzye tungaluwuka kwe lo-o “uluwembu lwa kutalicila”?

•  Uwufi wuno wakalanda pe lo-o “uluwembu lwa kutalicila”

 Pamulandu wakuti wawembusile e Adamu ne Eva wakosile nu kufwa. Wasovizye wuciwuza wawo ne Leza na co-o calenzile wapulumule ulongo lwa kwikala umuyayaya swinya nu wumi uwuzima.​—Intaliko 3:19.

 Uluwembu luno Adamu ne Eva wacisile lwambucila awana wawo wonsinye. Lo-o uluwembu lwawa ngati andwala yino yikakwambucila yino umwana angambula ukufuma ku wakwasi wakwe. (Waroma 5:12) Awuli umulandu wuno awantu wonsinye wakwatwa nu ‘luwembu,’ b co-o cikusula mukuti swensinye tutapwililika swinya cawa acipepuke nkaninye ukuluvyanya.—Amalumbo 51:5; Waefeso 2:3.

 Pamulandu na lo-o uluwembu luno twapyana nanti ukukana pwililika, kwalenga tuwalwala, ukukota nu kufwa. (Waroma 6:23) Swinya tukacula pamulandu ni viwipe vino tukacita na vino wanji wakaluvyanya.​—Ekawizya 8:9; Jemusi 3:2.

 Ee. E Baibolo yikalanda ukuti e Yesu watufwizile pakuti ‘mwakwe weliwe uluwembu lwitu luwatetelwa.’ (1 Yohani 4:10) Inzuwi ya kwe Yesu yingalenga tuluwuke ku viwipe vino vikafuma mu luwembu luno twapyana, nu kutupa ulongo ulwakuwa nu wumi wa muyayaya wuno e Adamuu ne Eva wasovizye.—Yohani 3:16. c

 Uwufi: Pamulandu nu luwembu lwa kutalicila tutanga tuwe swe viwuza vya kwe Leza.

 Icisinka: E Leza asitupa imilandu pamulandu na vino e Adamu ne Eva wacisile. Wamanya ukuti tutapwililika, swinya asikwenecela ivicilemo vino sweswe tutanga tukumanisye ukucita. (Amalumbo 103:14) Nanti acakuti tukacula pamulandu nu luwembu luno twapyana, twawa nu longo lwa kuwa iviwuza vya kwe Leza ivipalamisye.—Imilumbe 3:32.

 Uwufi: Ukubatizwa kukatuluwula ku luwembu lwa kutalicila, acino awana awanya wazipizile ukubatizwa.

 Icisinka: Nanti acakuti ukubatizwa kwawa pavintu vino tuzipizile ukucita pakuti twize tupusuke, ukusuwila munzuwi ya kwe Yesu akuno kungalenga tuluwuke kwe lo-o uluwembu. (1 Peter 3:21; 1 Yohani 1:7) Citanga cicitike akanya ukuwa ni suwilo, amuno pakuti umuntu awe ni suwilo lya cisinka azipizile ukumanya vino vyasanzyamo. Fwandi e Baibolo yisizumilizya ukubatizya awana awanya. Wonye avino calinji na ku wina Klistu wakutalicila, watabatizyanga utunya lelo wabatizyanga “awonsi nawanachi” wano walinji ni suwilo mwi Zwi lya kwe Leza.—Imilimo 2:41; 8:12.

 Uwufi: E Leza watipa awanaci pamulandu wakuti e Eva awino watalicizile ukulya ku cikomwa.

 Icisinka: Mucifulo cakutipa awanaci, e Leza watifile “ichinzoka chikali, chino chikakwitwa muwipe pamwi Satana,” cino calenzile Eva ukuwembuka. (Ukuwumbulika 12:9; Intaliko 3:14) Cinji acakuti, e Leza wapile lyo-o isundo lya kukanalya ku cimuti cakumanya uwuzima nu wuwipe kwe Adamu asa kwe Eva.—Waroma 5:12.

 Amulandu ci wuno e Leza wanenezile e Adamu ukuti awino aliwatungulula umuci? (Intaliko 3:16) Pano Leza walanzile wo-o, citasulanga mukuti wasuzilekovye kwe vino wacisile. Lelo co-o calanjililangavye iviwipe vino vyalinji nu kufuma mu luwembu luno wacisile. E Leza akalonda awonsi wakunda nu kucindika wawakwawo apano nu kulanjizya ukuti wacindika awanaci wonsinye.​—Waefeso 5:25; 1 Peter 3:7.

 Uwufi: Uluwembu lwa kutalicila luno Adamu ne Eva wacisile akupanga icupo.

 Icisinka: Imulandu yino yakonkapo yikalanjizya ukuti uluwembu lwa kutalicila luno e Adamu ne Eva asakupanga icupo.

•   E Leza wapile e Adamu isundo lya kukanalya ku muti wa kumanya uwuzima nu wuwipe lyo acili ali wenganye.—Intaliko 2:17, 18.

•   E Leza wanenile e Adamu ne Eva ukuti “kavulanji muwakwatana” akuli ukuti, walinji nu kukwata awana. (Intaliko 1:28) E Leza wanga asunde e Adamu ne Eva pe vino wawazumilizizye ukucita ngacalanjizizye ukuti wakalala swinya atawa nu lukundo.

•   E Adamu ne Eva watawembucizile ponga, e Eva awino watalicizile apano umulume awembuka pansizi.—Intaliko 3:6.

•   E Baibolo yazumilizyavye umonsi nu mwanaci wano watwalana ukupanga icupo.—Imilumbe 5:18, 19; 1 Wakorinte 7:3.