E Baibolo yalandizile lyankani ukuti kuliwa izya ndwala zino ziliwapona (ukusanzyako na zyonye zyo tukulola) mu manda ya kulecelezya. (Luka 21:11) E Leza asa wino akaleta zyo-o indwala pa kuti atusunde. Watulaya ukuti aliwomvya Uwufumu wakwe ukwizyafumyapo indwala zyonsinye.

•  Uzye e Baibolo yalandizile lyankani ukuti kuliwapona izya ndwala?

•  Uzye e Leza akatela asundilapo awantu ku ndwala?

•  Uzye indwala zino zikupona we Leza akutusunda?

•  Uzye zyo-o izya ndwala zilitela zisile?

•  Amawaliko yano yakalanda pa zya ndwala

 E Baibolo italandizile lyankani amazina ya ndwala zino zyalinji nukuwako ndi vino wa Korona (COVID-19), AIDS, nanti icisukusila cino witanga ukuti Spanish flu. Lelo yalandizile lya nkani ukuti kuliwapona “ivifwanga [nanti ivikuko]” ni “ndwala.” (Luka 21:11; Ukuwumbulika 6:8) Vyonsinye vyo-o vyawa acimanyilo ca “manda ya kulecelezya,” yano yakakwitwa nu kuti “impindi ya nsilo.”—2 Timoti 3:1; Mateyu 24:3.

 E Baibolo yalumbula vye impindi zya kupenda pano e Leza wasundizilepo awantu ku ndwala. Ku cakulolelako, walenzile awantu wamwi ukulwala amambombo. (Impendwa 12:1-16; 2 Izyamfumu 5:20-27; 2 Imilandu 26:16-21) Nanti ciwe wowo zyo-o izya ndwala zitambucilanga awantu wakaele. Lelo zyawangavye kwe walyanye wano wapondocelanga e Leza.

 Awe. Awantu wamwi wakalanda ukuti e Leza awino akaleta zyo-o indwala pa kuti asunde awantu. Lelo wo-o asa vino Baibolo ikalanda. Acani cino twalandila wo-o?

 Icintu cimwi cino tuzipizile twakwizuka aca kuti, na wakapepa wa kwe Leza nye wamwi awa kunsizi na wa mweyanye amanda wakalwala. Ku cakulolelako, umuntu wa cisinka e Timoti, ‘walwalililanga.’ (1 Timoti 5:23) Lelo e Baibolo italanda ukuti cino walwalilanga amulandu wa kuti e Leza wamupasile, awe. Na mweyanye amanda awawomvi wa kwe Leza wamwi awa cisinka nawonye wakalwala nanti ukwambula indwala. Impindi imvule vyo-o vikacitika pa mulandu ni vintu ivyasowa ukwenecela.—Ekawizya 9:11.

 Cinji aca kuti, e Baibolo ikasambilizya ukuti impindi ya kwe Leza iya kusunda awawipe yitani yifike. Lelo tukwikala “mu wanda wakutulwa” akuli ukuti impindi yino e Leza akwita wonsinye ukuti wawe iviwuza vyakwe pa kuti wize wapusuke. (2 Wakorinte 6:2) Inzila yonga yino akawomvya pa kwita awantu, akupitila mu mulimo wa kuwizya wuno wukuwombwa insi yonsinye. Wo-o umulimo awakulanda pi “landwe lizima ilya Wufumu.”​—Mateyu 24:14.

 Ee. E Baibolo ikalanda ukuti kusyazile vye katici lyo awantu waleka ukulwala. E Leza aliwomvya Uwufumu wakwe pa kufumyapo indwala zyonsinye zino zyatuteka imfine. (Ayizeya 33:24; 35:5, 6) Alifumyapo uwuyimvi, uwulumila ni mfwa. (Ukuwumbulika 21:4) Swinya alizyulupula awafwe pa kuti nawonye wize wayitopwe uwumi uwuzima mu Paradise.—Amalumbo 37:29; Imilimo 24:15.

 Ukuwumbulika 6:8: “Indola kavwalo umuwutuluke: wino wisile penepo, izina lyakwe walinji we Mfwa; nga ni Hadesi [inkungwe] lyakonkine nawe. Vyapilwe amaka . . . alya kuti viwakoma . . . ni cikumbili [icinkunka ca mfwa].”

 Muno cikusula: Uwusesemo wa mu Ukuwumbulika wuno wukalanda pa kavwalo wukalanjizya ukuti mu mpindi yitu kuliwapona izya ndwala.