Awantu wamwi wakalola ukuti wawa ni nsambu zya kulandula, lelo ukucita wo-o kwapusana na vino e Baibolo yikalanda: amuno yikati “Chisi achizima ukuti: ‘Nandi muchite ndivino wanchisile! Nkumulozya!” (Imilumbe 24:29) Ko-o ukupanda amano kwa mu Baibolo kwavwa awantu awavule ukuleka ukwelenganya pa kulandula.

Mwe co-o icipande twakwasuka ya-a amawuzyo yano yakonkapo

•  Awuwipe ci wuno wawa mu kulandula?

•  Uzye e Leza akasunda awantu?

•  Uzye ningacita wuli pakuleka ukwelenganya pa kulandula?

•  Uwufi wuno wakalanda pa kulandula

 Cawa acacikwatilwe ukwivwa uwuwi nga cakuti wumwi watuluvyanya nu kwelenganya ukuti azipizile ukusundwa pe vino wacisile. Lelo nanti ciwe wo-o, ukuvwambisya ukulandula kwapusana na vino Baibolo yikalanda. Amulandu ci?

 Nga cakuti awantu wakuyilandulila, e Leza asitemwa. Mu Baibolo e Yehova a Leza walanda ukuti: “Ukulandula akwane nenenye; ndilandula.” (Waroma 12:19) E Baibolo yikawomelezya wonsinye wano wawaluvinye ukupanga umutende ukucila ukuvwamba ukulandula. (Waroma 12:18) Avyani vino mungacita nga cakuti kusi inzila zino mungapanjilamo umutende, nanti mwelezya inzila zyonsinye pakuti mupange umutende lelo visakuwomba? Amawaliko yakatuwomelezya ukuti tuzipizile ukusila mwe e Yehova nu kusuwila ukuti awino alizifya ivintu.—Amalumbo 42:10, 11.

 Pe yo-o impindi, e Leza wazumilizya amawutekob ya wantu ukusunda wano wakacita iviwipe. (Waroma 13:1-4) Nombanye, e Leza wandi alete umulinganya nu kusinincizya ukuti kusi wino akucula pa mulandu na wakacita wa viwipe.—Ayizeya 11:4.

•   Mutacita ivintu pano mutani mwelenganyepo nga cakuti mufuzilwe. (Imilumbe 17:27) Awantu wano wakacita ivintu pano wafuzilwe wakakwiza mukulanguluka pa nsizi. Lelo wano wakatalicila awelenganyapo pano watani wacitepo cimwi, wakapingula icete pa vintu.—Imilumbe 29:11.

•   Mwavwambilizya ivisinka. (Imilumbe 18:13) Wino wamufyenzile azipizile ukuyikolowozya ukuti, ‘Uzye pali ivisinka vino ntamanyile vino vyalenzile acite wo-o? Uzye pali vino vimusakamisile? Nanti wacisilevye mukukana manya?’ Amuno mpindi zimwi tungakwelenganya ukuti wacisilevye ku mufulo, fwandi lyo wapanzilevye impuso.

 Uwufi: Pa mulandu wakuti e Baibolo yitazumilizya ukulandula tutazipizile ukuyipokolola nga watusansa.

 Icisinka: Umuntu nga wa musansa wawa ni nsambu zya kuyipokolola nanti ukuya ku wakuwuteko ukuti wamwavwe. Lelo nanti ciwe wo-o, e Baibolo yatunena ukuti tutazipizile ukutalika ukulwa na wano watusansa.—Imilumbe 17:14.