Ungacita wuli mwe vyo-o vino vyakonkapo?

1.   E ticha wakukalipila pa mulandu na vino te ukucita mu kilasi.

    Uzye ungalenga uwelelo kwe ticha nanti acakuti ukulola ngati wakufyengavye?

2.   Umuwuyo wivwa kuno te ukulanda iviwipe pe weliwe.

    Uzye ungalenga uwelelo ku muwuyo nanti acakuti ukulola ngati acisinka cino walanzile?

3.   Wafulilwa e tata wako swinya walanda amazwi ya musamu.

    Uzye ungalenga uwelelo kwe tata wako nanti acakuti ukulola ngati awino tewaluvyanya?

 Icasuko ku mawuzyo yonsinyene ya-a yotatu we ee. Nomba amulandu ci wuno uzipizile ukulandila ukuti “Munteteleko,” napano ukulola ukuti asa we muno uli ni ciluwo?

•  Amulandu ci wuno uzipizile ukulenjela ukuti wakutetele?

•  Ungalenga wuli itetelwa?

•  Vino awacitici wawuyo wakavwanga

•   Cikalanjizya ukuti we songo mu mano. Nga wacita wo-o pe vino te ulanzile nanti ukucita lyo ukulanjizya ukuti utalisile ukuwa ni miwele yino uliwalondekwa ukuwa nayo mu wusongo.

   “Ukuyicefya nukutekanya avino vililenga tulenge ukuti watutetele swinya tuliwikako sana amano ukwivwa kwe vino wino tuluvinye akulanda.”​—Rachel.

•   Cikalenga amupanga umutende na wanji. Awantu wano wakalanda ukuti “Munteteleko” wakalanjizya kuno wawisile sana amano pakupanga umutende ukucila na pa kulola wino ali ni ciluwo.

   “Nanti acakuti ukulola ngati winjinye awino aluvinye, cino cifwile ukucindama pe vyonsinye akupanga umutende. Ukulanda vye ukuti “Mutenteleko” kungalenga muwe iviwuza na wino mupusine. Swinya kusi wino akakala ukulanda lyo-o izwi.”​—Miriam.

•   Kukawa ukwivwa ni cete. Cingakuluma nga walola ukuti wumwi wivwa uwuwi pe vino tewacita nanti ukulanda. Nomba nga walenga ukuti wakutetele, nu mutwe wukapepuka. a

   “Kwawanga impindi zimwi pano nalandanga amazwi amawipe ku wakwasi wane, ntivwanga icete nga nacita wo-o. Kweni cantalilanga ukulanda ukuti munteteleko. Nomba ndi nalanda nivwanga ni cete amuno twatalikanga ukwivwana.”​—Nia.

 Pakuti yanye amazwi yakuti “munteteleko” yafume mu mulomo, cikapinda ukuwombesya.E Dena umukazyana wa myaka 26 wino walenzile uwelelo ukucila pa muku wonga pansizi yakulanda amazwi amawipe kwe mama wakwe ukucila pa muku wonga, watili: “Ukulanda vye ukuti munteteleko, cawoma nkaninye. Nkakwivwa ngati pa munkolomilo pali cimwi cino cikulesya na mazwi ukufuma pa mulomo!”

•   Yanga kalenge uwelelo pa minso. Nga waya mukulenga uwelelo, cikalenga wino ukulengako amanye nga uyivwile uwuwi nanti awe. Nomba nga wasolapo ukulemba meseji pakulenga uwelelo, wino ukulengako atanga akusuwile. Nanti ungawikapo akamuntu kano kakulanjizya ukuti uli nu wulanda pe vino ucisile, vino ukulenga angavilola vye ngu ukuvipanga vye.

   Cino cingakwavwa: Nga wapotwa ukuya mukulenga uwelelo pano mukulolana, ungamutumila vye foni nanti ukumulembela kalata. Asa mulandu ninzila yino wawomvya, uzipizile ukusola icete amazwi yakuwomvya.

   Icisinka ca mu Baibolo: “Awantu wazima wakatela awelengania pakutolelela.”​—Imilumbe 15:28.

•   Utalema na kwisote ukulenga itetelwa nga waluvyanya. Nga wazimba ukuya mukulenga ukuti wakutetele, intazi yingakulilako swinya mungaleka ukwivwana icete na wino waluvinye.

   Cino cingakwavwa: Panga ivyakucita—Ku cakulolelako, ‘Nkuya mukulenga ukuti wanteteleko ilelonye.’ Solapo pano uliya mukulenga ukuti wakutetele swinya cita na wowonye vino upinguzilepo.

   Icisinko ci sundo: ‘Uwakalawuka ukwivwana na wino akulonda ukukutwala ku cilye.’​—Mateyu 5:25.

•   Uwalenga uwelelo ukufuma pansi ya mwezo. Ukulanda vye ukuti “Unteteleko ntamanyile ukuti avino ukuyivwa” lyo utalenzile uwelelo awe! Umukazyana wumwi uwizina lyakuti Janelle watili, “Wino uluvinye alikucindika sana nga walola ukuti ukulonda ukucitapo cimwi pe vino uluvinye swinya usakuyipokolola nukuyipololola”.

   Cino cingakwavwa: Utati uwalengavye uwelelo nga cakuti wino uluvinye wacitapo cimwi. Utati uwacita ngati ukuti, “Ndiyiza ndenge uwelelo pe vino naluvinye nga watalicila walenga uwelelo pe vino wanduvinye.”

   Icisinko ca mu Baibolo: “Twazipila ukucita ivintunye . .  vino vikaleta umutende.”​—Waroma 14:19.