Kwela indupwa zyonsinye pano zyapelela, zyawa na masundo. Amasundo ndi vino, impindi yakunyocelapo pa ng’anda, impindi yino uzipizile ukusumba pano ukuwomvya foni nanti tabuleti, na vyo ufwile uwacita kwe wanji.

 Ungacita wuli nga wakana ukwivwila amasundo yano awakwasi wakunena ukuti uwakonka? Kweni wakati aminzi ndi yitika wasizyola, lelo nanti ciwe wo-o ungacitapo cimwi pakuti ivintu vitawipa nkani. Co-o icipande candi cilande pe vino ungacita.

•  Vino utazipizile ukwelezya nukucita

•  Vino ungacita

•  Vino awacitici wawuyo wakavwanga

•   Awakwasi wako ndi watamanyile ukuti tewakana ukuwivwila, ungati kamfise vye pakuti watamanya cino tenacita.

•   Awakwasi wako ndi watamanyile ukuti tewakana ukuwivwila, ungasolapo ukutalika ukuwipicizya mwe vinji ukuti avino tevyalenga nanti ukupa wanji imilandu pakuti uwuyifumye mu mulandu.

 Ukusolapo ukucita conga pe vyo-o kutazipa. Amuno ukufisa cino tewaluvyanya nanti ukutalika ukuwipicizya munji, kungalenga awakwasi wako wakulola ukuti utani ukuule mu mano.

 “Uwufi wutazipa, amuno icisinka cikakwiza mukumanyikwa. Ndi awakwasi wiza wamanya, ivintu viliwipa ukucila na vino canga ciwe wanga uwanene palyanye icisinka.”​—Diana.

•   Wanene vino ucisile. Baibolo ikati: “Ndi ukafisa uluwembu lwako utanga ufungule ichizima chimwi.” (Imilumbe 28:13) Awakwasi wako wamanya ukuti utapwililika. Nomba wakalonda uwawa ni cisinka.

   “Awakwasi wako walikutetela vye nga usakuwawipa uwufi. Nga wawanena icisinka apano walikusuwila nkaninye.”​—Olivia.

•   Lenga ukuti wakutetele. E Baibolo ikati: “Mwensinye muzwale ichizwalo chakuyichefya.” (1 Peter 5:5) Uzipizile ukuyicefya pakulanda ukuti “Muntetele nduvinye”.

   “Awantu wano wawelela ukuwipichizya munji nga waluvyanya, wakaleka ukwivwa uwuwi pe vino wakucita. Mukupita kwa mpindi e kampingu ikaleka nukucuzya umuntu wa musango wo-o.”​—Heather.

•    Uwazumila vino vyafumamo pe vino tewaluvyanya. Baibolo ikati: “Muwakwivwa nga wamisalapula.” (Imilumbe 8:33, NWT) Utayilizyanya nga wakwasi wakusunda, swinya uwakonka consinye cino wakunena ukucita pe vino ucisile.

   “Nga watalika ukuyilizyanya pe vino wakusunda lyo wandi uleke ivintu viwipileko sana. Lola cino ungacita pakuti uzumile vino wakunena ukuti utati uwacita, swinya utati uwawika amano pe vino wasovya pa mulandu na vino teuluvinye.”​—Jason.

•   Uwawombesya pakuti wakusuwile. Baibolo ikati: “Sumbani ivya myata yinu imikali.” (Waefeso 4:22) Twalilila ukucita icizima nukupingulapo icete pakuti awakwasi wako watalike ukukusuwila ndi vino wakusuwizile pakutalika.

   “Ngu ukwelezya na maka ukupingulapo icete ukulanjizya nukuti usakulonda ukunyocezyapo vino waluvinye, awakwasi walitalika ukukusuwila.”​—Karen.

 VINO VINGAKWAVWA: Uwacita ivintu ukucila na pe vino tewakunenile. Nga ukucita wo-o walikusuwila sana. Ku cakulolelako, uwanda wuno uliya kumwi, uyize utumile awakwasi wako e foni ukuwanena impindi yino wandi uficile pa ng’anda. Ne nga wakatuka uyizye uwamanyisye ukuti uli munzila. Uyize ucite wo-o nanti acakuti walola ukuti wandi ucelwe. Co-o cililenga wamanye ukuti ukulonda wakusuwila naswinya.’