Uzye e kampingu yako tungayikolanya ku cani pe vyo-o?

•   mapu

•   mira

•   ciwuza

•   kapingula

 Icasuko icikumanile acakuti tungayikolanya kwe vyonsinyene vyo-o 4. Co-o icipande candi cilondolole umulandu wuno twalandila wo-o.

•  Uzye e kampingu acani?

•  Amulandu ci wuno uzipizile ukusambilizizya e kampingu wako?

•  Ungasambilizya wuli e kampingu?

•  Vino awawuyo wakavwanga

 E kampingu ayino yikakunena ukuti cino ukucita ciwifile nanti cili icetenye. Baibolo ikati e kampingu yawa ngati ‘alisundo lino lyalembwa mu myezo ya wantu’. (Waroma 2:15) E kampingu umuzima angakusoka pe cino ukulonda ukucita nga cakuti ciwifile, swinya angakwavwa nukumanya nga cakuti vino wacisile ku nsizi vyalinji icetenye nanti vitalinji icete.

•   Kampingu yako yawa ngati we mapu. Ingakutungulula munzila inzima pakuti utayitwala mu ntazi.

•   Kampingu yako yawa ngati we mira. Ikalenga umanye imiwele yako na vino wawa mu mwezo mukasi.

•   Kampingu yako yawa ngati we ciwuza. Ingakupandako amano amazima swinya ivintu vingakuzipila nga cakuti ukwivwila vino ikukunena.

•   Kampingu yako yawa ngati we kampingula. Ingakunena nga wacita iviciwipe.

 Icisinka acakuti: E kampingu yako ingakwavwa (1) ukupingulapo icete, ne (2) ukuzumila ukuti uluvinye nukucitapo cimwi pakuti uzifye vino uluvinye.

 E Baibolo ikatunena ukuti ‘muwawa ne kampingu umuzima.’ (1 Peter 3:16) Cikasyupa ukuwa ne kampingu umuzima nga utayisambilizya.

 “Awakwasi wane nga wambuzya, ukuti nga tuli kwi? Nawawapinga uwufi swinya pasi na wino nanenanga. Pakutalika e kampingu wancuzyanga, nomba mukupita kwa mpindi yalesile ukuncuzya.”​—Jennifer.

 Mukupita kwa mpindi e kampingu ya kwe Jennifer yalenzile asolepo ukunena awakwasi wakwe kuno wayanga na vino wacitanga.

 Yelenganya: Ungati ampindi ci pano e kampingu ya kwe Jennifer yatalisile ukumunena ukuti vino wacitanga vitalinji icete?

 “Citazipa ukucita iviwipe ku mbali. E kampingu vye ndi wakuzumilizya ukucita iciwipe umuku wonga, lyo umanye ukuti numuku wunjinye avino yilicita. Uliwacita na vinjinye iviwipe.”​—Matthew.

 Awantu wamwi wasikwivwila e kampingu wawo. E Baibolo ikati ‘wakunkuma nkaninye mukucita iviwipe’. (Waefeso 4:19) Mwe Baibolo wa Izwi Lyakwe Leza wapiliwula ukuti: “ninsoni zyasowela kumwi.”

 Yelenganya: Uzye ungati awantu wano wasikwivwa uwuwi nga waluvyanya wazipapo ukulusye wano wakakwivwa uwuwi nga waluvyanya? Antazi zino wano wasikwivwa uwuwi nga waluvyanya wakakwiza mukukwata?

 Icisinka acakuti: Pakuwa ne kampingu umuzima, uzipizile ukusambilizya ‘amaka yako ayakulekanya icizima ku ciwipe.’​—Waheberi 5:14.

 Pakusambilizya e kampingu yako, uzipizile ukuwa ni cakulolelako cakukulanjizya vino uzipizile ukucita na vyo utazipizile ukucita. Apano nomba ungalinganya vino ukacita ku cakulolelako cino wakwata. Awantu wamwi wakakoncelela:

•   ulupwa ni ntambi

•   awawuye

•   vino awantu awalumbuke wa mu ndwizyo wakalanda

 Nomba vino Baibolo ikalanda pe vino tuzipizile ukwikala nukucita vyalusya pe vyonsinyene vyo-o. Tutanga tuzunguke amuno e Baibolo “yafutilwamo nu mupo wa kwe Leza,” Wino watwelewula, swinya wino wamanya vino vingatuzipila.​—2 Timoti 3:16.

 Lola ivyakulolelako vino vyakonkapo.

 VINO UZIPIZILE UKUKONKA: “Tukalonda ukuwa awacisinka mwe vyonsinye.”​—Waheberi 13:18, NWT.

•   Uzye ya-a amazwi yangakwavwa wuli nga wati uwavwamba ukuwipa pe tesiti, ukuwipa awakwasi wako nanti ukwiwa?

•   Avizima ci vino ukulola ukuti ungawa navyo pe yo-o impindi na kunkolelo nga e kampingu yako yakunena ukuwa ni cisinka mwe vyonsinye?

 VINO UZIPIZILE UKUKONKA: “Lewukanji uwuzelele.”​—1 Wakorinte 6:18.

•    Uzye ya-a amazwi yangakwavwa wuli nga umwezo wako wati wavwamba ukutamba ivya misiku nanti ukulala nu muntu wino mutatwalana nawe?

•   Avizima ci vino ukulola ukuti ungawa navyo pe yo-o impindi na kunkolelo nga e kampingu yako yakunena ukulewuka uwuzelele?

 VINO UZIPIZILE UKUKONKA: “Muwawelana inkumbu muwe nimyezo mizima, swinya muwatetelana, ndivino Leza wawatetela mwemwe mwakwe Klistu.”​—Waefeso 4:32.

•    Uzye ya-a amazwi yangakwavwa wuli nga mwapusana pa ng’anda nu muzuna wako, e songo wako, nanti e ciwuza wako?

•   Avizima ci vino ukulola ukuti ungawa navyo pe yo-o impindi na kunkolelo nga cakuti e kampingu wako wakunena ukumutetela nukuwa ni nkumbu?

 VINO UZIPIZILE UKUKONKA: ‘Yehova . . . wapata wensinye wino wakunda uwunkalwe.’​—Amalumbo 11:5.

•    Uzye ya-a amazwi yangakwavwa wuli ukusola icete amafilimu yano ungatamba, amaprogramu ya pa TV ni ndwizyo zyakuteya izya pa mavidyo?

•   Avizima ci vino ukulola ukuti ungawa navyo pe yo-o impindi na kunkolelo nga cakuti e kampingu wako wakunena ukukanatamba nanti ukuteya indwimbo zyonsinye muno muli uwunkwalwe?

 VINO VYACITICIZILE UWACITICI WUMWI: “Nawa na wa wunji wano wateyanga indwimbo muno mwawa uwunkwalwe, naninye nateyanga. Nomba e tata wandesizye ukuteyako zyo-o indwizyo. Nayanga vye mukuteya nga natandalila iviwuza vyane. Nga nanyoka pa ng’anda nayilinganyanga nge pasi nacino tencisile. E tata wankolowozya umulandu wuno nikalilanga vye mya. Nani namunenanga ukuti indi icetenye. Wanda wumwi nawazizye vino Amalumbo 11:5 yakalanda, nalile nawazyapo, nivwile uwuwi pe vino nacitanga. Paponye nilusile ukuti nzipizile ukuleka ukuteya zyo-o indwizyo, avyo nalesile wowonye. E wunji wumwi pe wano twateyanga nawo zyo-o indwizyo, wasozilepo ukuleka ukuteya pa mulandu wakulola icakulolelako cane.”​—Jeremy.

 Teyelenganya: Ampindi ci pano e kampingu ya kwe Jeremy yatalisile ukumunena ukuti vino wacitanga vitalinji icete? Ampindi ci pano watalisile ukwivwila vino yamunenanga? Avyani vino ukusambililako kwi lyasi lyakwe Jeremy?

 Icisinka acakuti: E kampingu wako akalanjizya vino wawa na vino wacindamika. Uzye e kampingu yako ikakunena ukuti wewe wawa wuli?