E mwali amukazyana wino asitela alalepo nu monsi.

 Lelo nanti ciwe wo-o ukulala vye nu monsi asa kuno kungalenga vye wumwi ukukanawa we mwali. Wamwi wangalanda ukuti ne mwali pa mulandu wakuti watalalapo nu monsi uwili wensinye, lelo wakacita uwuzelele ukuwovya inzila zinji.

 Izwi lya kuti “uwuzelele” likalozya na kukulalana kwa wonsi nanti awanaci watupu, ukulalana ku ntungu nu kulema lema ku vilundwa vya wukwasi ivya muntu winji.

 Icisinka acakuti: Awantu wano wakalalana na wonsi nanti awanaci watupu, ukulalana kwa ku ntungu nu kulema lema ku vilundwa vya wukwasi ivya wantu wanji watanga wawe awa mwali.

 E Baibolo yikalanda ukuti umonsi nu mwanaci wano watwalana awano wazipizile vye ukupanga icupo. (Imilumbe 5:18) Fwandi umuntu wino akulonda ukuwasecelesya e Leza, azipizile ukutaluka kwe vyonsinye vino vyasanzyamo mukupanga icupo panka ayize atwalwe.​—1 Watesalonika 4:3-5.

 Wamwi wakalanda ukuti vino Baibolo yikalanda avyakali nkaninye tutazipizile ukuvikonka. Lelo uzipizile uwakwizuka ukuti vino awantu wakacita pe yo-o impindi vyalenga awavule ukulekana, ukupempa amawula nu kwambula indwala zino zyawa mukucita uwuzelele. Icisinka acakuti awantu wa mwe yo-o insi watange watupande amano yakuwa ni miwele imizima!​—1 Yohani 2:15-17.

 Nga welenganya pe vino e Baibolo yikalanda pa kuwa ni miwele imizima, ulizana ukuti vino yikalanda vyawelako kuwuzima witu. Kucakulolelako, tuti umuntu wumwi wakupa indalama imvule, uzye ungazisumbila pa musewo pakuti uwili wensinye wino wazizana asole?

 Wonye avino citanga cizipe na kwe wewe ukusumba wumwali pa mulandu nu wuzelele. E Sierra uwamyaka 14 walanzile ukuti: “Ntanga nkunde ukulala nu monsi wino ntalitwalilila nu kumwizuka pa nsizi vye ya myaka mitici.” E Tammy uwa myaka 17 walanzile ukuti: “Ukupanga icupo ukwa monsi nu mwanaci wano watwalana, cawa acawila ukufuma kwe Leza cino ntanga nkunde ukonona.”

 Icisinka acakuti: E Baibolo yikawomelezya wa mwali ukukana sumba wumwali wawo pano watani watwalwe.​—1 Wakorinte 6:18; 7:8, 9.

•   Uzye ukalola ukuti amasundo ya mu Baibolo yano yakalanda pa kupanga icupo yawa icetenye nanti yawoma?

•   Uzye wazumila ukuti ukulala nu muntu wino utatwalana nawe kwawa icetenye cikulu vye mukundine?

 Pansizi yakwelenganyapo sana, awacitici wamwi wazana ukuti ukuwa ni miwele imizima nu kusunjilila wu mwali wako cawa acintu cimwi icicindame nkaninye. Wasilanguluka pe vino wapinguzilepo ukucita nanti ukuyivwa ukuti pali vino wakasowezya. Lola vino awacitici wamwi walanzile:

•  E Emily uwa myaka 14 walanzile ukuti: “Nkayivwa uwacilumba wo-o vino natwalilila ukuwa ne mwali! Nsilanguluka nanti katicinye pe vino napinguzilepo ukucita amuno ntawa ni ntazi zino zikafuma mukucita uwuzelele.”

•  E Elaine uwa myaka 26 walanzile ukuti: “Nkakwivwa icete nkaninye wo-o vino nsitela ndalepo nu monsi uwili wensinye swinya ntawa ni ndwala zino zikafuma mu kucita uwuzelele.”

•  E Vera uwa myaka 19 walanzile ukuti: “Nkakwivwa awakazyana awavule wakulanda ukuti wakakwivwa uwuwi pe vino wacisile, wakati nanga ndindilile katici. Acino nsilonda nanti katicinye ivyamusango wo-o ukunciticila.”

•  E Deanne uwa myaka 16 walanzile ukuti: “Nalola vino awakazyana awavule wakalanguluka pa mulandu wakusumba wu mwali wawo. Ntanga nkunde ivya musango wo-o ukunciticila.”

 Icisinka acakuti: Uzipizile ukumanya vino wazumilamo pano watani watalike ukukupaticizya nanti ukukutunka ukucita uwuzelele.​—Jemusi 1:14, 15.

 Uzye ungacita wuli nga wumwi wakukolowozya pe vino wazumilamo pa kupanga icupo? Kweni pa kwasuka cikawa vye na vino umuntu wakolowozya.

 E Corinne uwa myaka 23 walanzile ukuti: “Nga cakuti wumwi akunseting‵avye, ningalandavye ukuti ‘vitakukwatizile incito’ nu kufumapo.”

 E David uwa myaka 19 walanzile ukuti: “Kucawulanda awavule wakakwivwa icete ukucuzya awawuye. Nga namanya ukuti acino akunkolowozezya ningamyalalavye.”

 Cino uzipizile ukumanya acakuti? Mpindi zimwi e Yesu wapingulangapo “ukunayasuka” wano wamupumyanga.​—Mateyu 26:62, 63

 Uzye ungacita wuli nga cakuti wino akukukolowozya akulonda ukumanya vino wazumilamo? Nga walola ukuti weyo umuntu akulondesya sana ukumanya vino Baibolo yikalanda, ungamuwazizyako iwaliko lye 1 Wakorinte 6:18, pano pakalanda ukuti umuntu wino akacita uwuzelele akawembucila umuwili wakwe.

 Asa mulandu ungawomvya Baibolo paponye pano wakukolowozya iwuzyo nanti pole, lelo icicindame acakuti uzipizile ukulanda ukwasowa intete. Uzipizile ukwizuka ukuti wemweneco awe muno wawa ninsambu zya kusolapo ukutwalilila ukuwa ni miwele imizima.​—1 Peter 3:16.

 E Jill uwamyaka 20 walanzile ukuti “nga cakuti ukwasuka ukwasowa intete ulilanjizya ukuti usivwilika nanti katicinye vino wazumilamo swinya utazumila vye pa mulandu wakuti avino wakunena ukucita, lelo ukakonka vino Baibolo yikalanda amuno wamanya ukuti avyacisinka.”

 Icisinka acakuti: Nga cakuti wasinincizya ukuti vino wazumilamo pa kupanga icupo avya cisinka, utalilwa uwapotwa ukunenako wanji vino wazumilamo. Swinya ungazunguka vino wangakwasuka. E Melinda uwamyaka 21 walanzile ukuti “Wano nkawomba nawo wansalifizye nkaninye pe vino nayinsuzile. Wasindola ukuti nashishita, lelo wakalanda kuti e mwali amuntu wino wayicindika nkaninye.”

 Yelezya ukucita wo-o! Nga cakuti ukulonda ukumanya vino ungacita pa kulondolola vino wazumilamo pa kupanga icupo, kopolola apakulemba pano pali amazwi ya kuti “Vino ungalondolola vino wazumilamo pa kupanga icupo.” Swinya ungalola ni buku lya kuti Vino Awacitici Wakakolowozya—Nivyasuko Vino Vingawavwa.

•    Icipande 24 mwe Volume 1 cawa nu mutwe wakuti “Uzye nga nalala nawe apano alinkunda nkani?”

•    Icipande 5 mwe Volume 2 cawa nu mutwe wakuti “Amulandu ci wuno nzipizile ukutwalilila ukuwa ne mwali?”

E Victoria uwa myaka 19 walanzile ukuti :“Nakunda nkaninye vino ama buku yano yakati ‘Vino Awacitici Wakakolowozya yakalanda. Kucakulolelako, pifwa 187 mwe Volume 1 pawa icilanjililo cino cikalanda pa kucita uwuzelele nu muntu wino mutani mutwalane nawe ukuti kwawa ngati akusumbila iciya ca mutengo mu luzi. Koko lyo akuyisula. Pifwa 177 pakalanda vino ukucita uwuzelele kwawa ngati akusenda icikope icizima amuwika pa mulyango ngati we domati. Lelo icilanjililo cino nakunda sana aco-o cino cikazanwa pifwa 54 mwe Volume 2. Amazwi ya pa cikope yakalanda ukuti: ‘Ukupanga icupo nu muntu wino mutani mutwalane nawe cawa ngati akwiyula icawupe pano watani wakupe insambu zya kwiyula.’ Swinya cikawa ngati ukwiwila wino aliwa we wakwako kunkolelo.”