Indwala zikakwiza mu nzila indekane ndekane. Indwala

•   zimwi zikaloleka ne zimwi zisiloleka.

•   Zimwi “zikakwizavye” pa mpindi ntici ne zimwi “zikatwalilila.”

•   Zimwi zikapola ne zimwi zisipola icakuti azifisya nu muntu kumfwa.

 Awacitici nawonye wakalwala imisango yonsinye iya ndwala yino twalandapo. Mwe co-o icipande, twalanda pa wacitici wano walwalapo. Nga cakuti namwemwe mukalwalilila, vino wa-a awacitici walanzile vingamiwomelezya.

•  E GUÉNAELLE

•  E ZACHARY

•  E ANAÏS

•  E JULIANA

 Nkakwivwa uwuwi nkaninye wo-o vino nkapotwa ukuwomba ivintu vimwi. Nkalonda ukucita ivintu vimwi, lelo pa mulandu wandwala yane nkapotwa.

 Nalwala indwala ya ku wongo yino wakakwita ukuti motor-neuromuscular disorder yino yikalenga ivilundwa vimwi ivya ku muwili ukukana womba icete. Yo-o indwala yikalenga ivilundwa ukuzakaza nu kufwa uwanzi ukufuma ku mutwe mpaka ku nsalala. Cikantalila ukucita nu tuntu ututicinye ponga ngati akupita, ukulanda ukuwazya, ukulemba nu kukanayivwicisya vino awantu wanji wakulanda. Nga cakuti nivwa uwuwi nkani, wa eluda mwi wungwe muno nawa wakantandalila nu kumbomelezya. Ukucita wo-o kukalenga injivwako icete.

 Mu ntazi zyonsinye zino nkapitamo nkakwivwa ukuti e Yehova ali nani swinya akanjavwa. Nsilonda nanti katicinye ukuti indwala yino nalwala yilenge napotwa ukuwombela e Yehova nu mwezo wane wonsinye. Cino nawikako sana amano pe yo-o impindi akwavwa awantu ukumanya vino Baibolo yalaya ukuti nombanye e Yehova ali nu kulenga insi ukuwa we paradaise, muno mutaliwa ukuyimba.​—Ukuwumbulika 21:1-4.

 Iwuzyo lya kwelenganyapo: Uzye ungakolanya wuli e Guénaelle, wino wawikanga amano kwe wanji?​—1 Wakorinte 10:24.

 Pano nalinji ni myaka 16 nalwile e kansa ya kuwongo. Wa dokota wanenile ukuti kwasyazilevye imyezi 8 lyo nafwa. Ala yo-o indwala yancuzizye nkaninye ukufuma pe yilyanye impindi.

 Pamulandu na kuno yo-o indwala yawela, ivyawi vyonsinye ivya kwi kasa lya kwe ndilo visiwomba. Pe yo-o impindi nsipita, acino pa nga‵anda pakasyala wumwi uwa ku nsakamala.

 Yo-o indwala yalenga cambomela ukulanzyanya icete na wanji. Kali nalinji icete nkaninye, nakunzile ukwizya indwizyo zino wakakwita ukuti waterskiing (akuli ukuti ukusyelemuka pa minzi), basketball ne volleyball. Pano ne Nte ya kwe Yehova, nawombesyanga mu mulimo wa kuwizya. Kweni awantu awavule watanga wivwicisye vino cikakwivwika ukuleka ukuwomba ivintu vino wakunzile nkaninye pa mulandu ni ndwala.

 Amazwi yano yawa pe Ayizeya 57:15 yakambomelezya nkaninye amuno yakalenga manya ukuti e Yehova wawa mu pipi na wano wawa ni ‘myezo ya wulanda’ swinya akansakamala. Uwulayo wuno wawa pe Ayizeya 35:6 nawo wukanjavwa ukumanya ukuti, wanda wumwi ndiwa napita icetenye nu kuwombela e Yehova nu wumi uwuzima.

 Nanti acakuti nkakwivwa uwuwi pa mulandu ni ndwala yino nalwala, nasuwila ukuti e Yehova wandi awanjavwa. Nga indi ni ntete nanti nsakamisilwe nkapepa kwe Yehova nu kumunena vyonsinye vino nkuyivwa. Kusi nanti cimwinye cino cingatufumya ku lukundo lwa kwe Yehova.​—Waroma 8:39.

 E Zachary wafwile lyo ali nimyaka 18 pansivye ya myezi yiwili ukufuma pano walondolozile pa ndwala yino walwile. Watwalilizile ukuwa ni suwilo iwome mu malayo ya kwe Yehova aya kuti ali nukuzyulupula awafwe nu kulenga insi ukuwa paradaise ukufika nu wanda wuno wafwile.

 Iwuzyo lya kwelenganyapo: Uzye ipepo lingakwavwa wuli ukutwalilila ukukunda e Leza ndi vino calinji kwe Zachary?

 Pano papisile amanda matici ukufuma pano nakwatizilwe, uwazi wizile awuzwila ku wongo na co-o calenzile indemale maka maka amanama.

 Pe yo-o impindi nsiya ukutali nga nkuwomvya ivinsonzo vya cilema, suka nga nkupitila pa kanjinga ka cilema. Ivyawi vikaluma icakuti nkapotwa nu kuwomba utuntu ututicinye ponga ngati akulemba

 Inzila zino wawomvyanga pa kumpozya zyalundanga uwulumila pa ndwala yino nalwile. Nsikwizuka ni miku yino nayanga mwe sabata ku cipatala mukulola e dokota wino wansambilizyanga pakuti nakwelezya ukuyipitila (akuli ukuti physiotherapy). Pano nalinji ni myaka 5 wandepuzile umuku wa kutalicila swinya wizile awandepula ni miku na yinji yitatu. Imiku yiwili yino wandepuzile iyakulecelezyako yasyufile nkaninye amuno nsitela ndolane na wa lupwa lwane pa myezi yitatu.

 Wa lupwa lwane wakanjavwa nkaninye. Nkawa ni mpindi yakuwa nawa lupwa nu kwizizya ponga nawo, na co-o cikalenga ntasakamikwa sana. E mama na wa nkazi zyane wakansakamala pakuti naloleka icete, amuno ntanga ncite vyo palwane. Nkakwivwa uwuwi wo-o vyo nsizwala insapato intali. Pano nalinji ne mutici nalezyanga ukuzwala insapato ku makasa lyo nkusela, co-o calenganga twaseka!

 Nkakwelezya ukuwika amano kwe vyo ningakumanisya ukucita ukulusya kwe vino ntanga nkumanisye. Nkasambililako ivitundu vinji. Nanti ntanga nciteko ivintu vinji, lelo nkakwivwa icete ukucowa. Pa mulandu wakuti ne Nte ya kwe Yehova nakunda ukuwomba umulimo wa kuwizya. Awantu awavule wakawikako amano nu kuteyelezya nga nkuwawizizya.

 Awakwasi wane wansambilizizye lyo ne mutici ukuti indwala yino nalwala ayapa ka mpindi vye katici. Ukufuma pe yilyanye impindi nasuwila sana e Yehova na malayo yakwe, ukuti alifumyapo ukucula konsinye ukuwikako ni ndwalanye yino nalwala. Co-o cikampa amaka ya kusipicizya.​—Ukuwumbulika 21:3, 4

 Iwuzyo lya kwelenganyapo: Uzye ungakolanya wuli e Anaïs wino “atasakamikwanga” nkani pa ndwala yino walwile?

 Nalwala indwala yino wakakwita ukuti autoimmune yino yikakonona umwezo, wapwapwa nu wazi. Kali kali yo-o indwala yafika kumfyo.

 Pano nalinji ni myaka 10 nalwile indwala yino wakakwita ukuti lupus. Yo-o indwala yikalenga nakwivwa uwulumila, ukutonta nu kwivwa uwuwi mumpindi mu mpindi. Manda yamwi nkayivwa ukuti ntacindama.

 Pano nalinji ni myaka 13, Inte ya kwe Yehova wumwi wizile atutandalila. Wambazizizye iwaliko lye Isaiah 41:10, pano Yehova walanda ukuti: “Mutize muwatina – indi namwe. . . . Nandi ndawachinjilila nukuwatula.” Peyilyanye impindi apano natalisile ukusambilila Baibolo ni Nte zya kwe Yehova. Imyka 8 yino yapita nkawombela e Yehova nu mwezo wane wonsinye, swinya nsilonda indwala yino nalwala yalenga napotwa ukumuwombela. E Yehova akampa “amaka makulu nkani,” yano yakanjavwa ukuwika amano ku vizima.​—2 Wakorinte 4:7.

 Iwuzyo lya kwelenganyapo: Uzye iwaliko lya kwe Ayizeya 41:10, lingakwavwa wuli ukuwika amano ku vizima ndi vino calinji kwe Juliana?