Co-o icipande candi cilande pe vino uzipizile ukumanya pe

•  Wano ukalembela ama meseji

•  Vino mukalembezyanya

•  Impindi yino ukalembelapo ama meseji

Swinya calanda na pe:

•  Vino vingakwavwa pano ukulemba ama meseji

•  Ivya kwelenganyapo

 Awacitici awavule wakalola ukuti ukulembezyanya ama meseji anzila iyizima nkaninye iyakulanzyanizizyamo. Ukulembezyanya ama meseji kungalenga uwalanzyanya na wonsinye wano wawa mwe foni yako, sukavye nga cakuti awakwasi wako wakulesya.

 “E tata asilonda ukuti nene nu muzuna wane twalanzyanya na walumendo pa foni. Nga kuli umulumendo wino tukulonda ukulanda nawe, lyo tuzipizile ukuwomvya e foni ya mu ng’anda nanti nga pali awantu.”​—Lenore.

 Vino uzipizile ukumanya: Nga cakuti ukupa e namba yako cipepe, ungayiwika mu ntazi.

 “Nga cakuti ukupa e namba yako umuntu uwili wensinye, waliwakutumila ama meseji ni vikope vino utakulonda.”​—Scott.

 “Nga cakuti ukulembela ama meseji wino asa monsi muwuyo nanti wino asa mwanaci muwuyo, patanga pazimbe ungatalika ukumukunda.”​—Steven.

 E Baibolo yikati: “Umuntu wamano akalewuka ndi walola intazi zikwiza.” (Imilumbe 22:3) Nga cakuti we mucenjele uliwayicinjilila ku ntazi izivule.

 Vino vyacitisile: “Napanzile iciwuza nu mulumendo wumwi swinya twalembezyanyanga nkaninye ama meseji. Nene nalolanga ngati twamanyanavye. Fwe nkuyiletelela. Nizile njiwucilavye wambuzya ukuti ankunzile. Yo-o impindi nkayiseka nukuyiseka nga nizuka, amuno anemo nalenzile. Nanga ntasumba nkani impindi nawe nukulembezyanya amameseji ncepamwi nga vitafisile na ko-o.”​—Melinda.

 Yelenganya pe co-o: Uzye ungati wuciwuza walinji nukuwa wuli pe wa-a wawili?

 Lemba vino wanga acite: Avyani vino e Melinda wazipizile ukucita pakutalikanye pano umulumendo atani amukunde pakuti watwalililevye ukuwa aviwuza?

 Ama meseji yapepuka swinya yakakwivwika icete ukulembezyanya, lelo ngutacenjezile wino mukulanzyanya nawe angavivwila munji.

 Vino uzipizile ukumanya: Mpindi zimwi awantu wakakwivwila munji nga cakuti wawalembela e meseji.

 “Nga mukulembezyanya nu muntu ama meseji, kusiwa ukumanya vino umuntu akuyivwa, vino akuloleka pa minso na vino izwi likufuma. Pe vyo pawa ni vikope na tunjivye tuno ungawikamo pano ukulemba e meseji. Ukulanzyanya kwa musango wo-o kungalenga umuwuyo avivwile mwe vinji.”​—Briana.

 “Ama meseji yano awakazyana awavule wakalemba ayano yalenga wayononele amazina nu kulenga wawalola ukuti wakasengasenga.”​—Laura.

 E Baibolo yikati: “Awantu wazima wakatela awelengania pakutolelela.” (Imilumbe 15:28) Avyani vino ukusambililako? Uwawazyamo mwe mesenji yino walemba pano utani utume.

 Ngu kulonda ukuyicinjilila ku ntazi, ungayiwicila we mweneco ivyakukonka, ndi vino wamwi wakacita.

 Vino uzipizile ukumanya: Nga cakuti usi nu mucinzi pano ukulemba ama meseji, wangakulola ngati wawa ni cilumba swinya waciwuza wako wangakusamala.

 “Capepuka ukwiwilila vino watantika ukukonka. Nkayizana ntalisile ukulembezyanya ama meseji na pano nkulya.”​—Allison.

 “Citazipa nanti katici ukulembezyanya ama meseji ko-o ukupisya e motoka. Nga waleka ukulolecesya kuno ukuya ukungayiwika mu wusanso.”​—Anne.

 E Baibolo yikati: “Ivintu vyonsinye vino vikapona munsi vikachitwa mumpindi . . . impindi zyakulepulania nimpindi zyakulimba; impindi zyakumyalala nimpindi zyakuvwanga.” (Ekawizya 3:1, 7) Co-o icisinka cingawomba na ku ma mesejinye, amuno ndi wulyanye vino cawa kukulanda avino cawa nakukulembezyanya ama meseji

Wano ukalembela ama meseji

•  ;-) Uwakwivwila vino awakwasi wakukunena.​—Wakolose 3:20.

•  ;-) Utawapa e namba yako cipepe. Nga cakuti utakunenako wanji ivyankama vino watazipizile ukumanya pe wewe ukuwikako nu kupa wanji e namba, cilikwavwa na pano wakulanye.

•  ;-) Utalemba ama meseji yano yangalenga wanji walola ngati wawa ni ciwelezi nanti ukuwasengasenga. Nga cakuti ukulemba ama meseji ya musango wo-o, cingalenga ukunde umuntu na vino vingafumamo vingakulumisya umwezo.

 “Akwasi wane wamanya ukuti nkawomvya icete e foni, Na co-o calenga wasuwile ukuti ningasola icete awakupa inamba yane.”​—Briana.

Vino mukalembezyanya

•  ;-) Pano utani utalike ukulemba e meseji, uwayikolowozya ukuti, ‘uzye ukulembezyanya ama meseji ayili inzila iyizima iyakulanzyanizizyamo pe yo-o impindi?’ Mpindi zimwi cingazipa ukutuma e foni nanti ukwizalanzyanya nga mwalolana.

•  ;-) Mutalemba vino mutanga mulande nga muli nu muntu. E Sarah uwa myaka 23 watili, “Nga cakuti vino ukulonda ukulemba utanga uvilande, lyo utazipizile nu kuvilembanye”.

 “Nga acakuti wumwi wakutumila ivikope vino vitazifile, uzipizile ukunena awakwasi wako. Ukucita wo-o kulikucinjilila swinya kulilenga na wakwasi wakonye ukukusuwila.”​—Sirvan.

Impindi yino ukalembelapo ama meseji

•  ;-) Tantika impindi yino wandi uwalecelapo ukuwomvya e foni. E Olivia walanzile ukuti, “Nsiwa ne foni pano nkulya nanti pano nkuwazya. Swinya nga ndi pakulongana nkazimya pakuti itampumvyanya.”

•  ;-) Uwawika amano kwe wanji. (Wafilipi 2:4) Utalemba ama meseji pano ukulanzyanya na wantu wanji wano uli nawo.

 “Natantika ukuti ntandi nalemba ama meseji pano indi pa wantu, sukavye nga catala. Swinya nsipa awantu e namba wano ntamanyana nawo nkani.”​—Janelly.