Awe mukwai, lyo asa vino cawa

 Icisinka: Ilivule ukukumbwa umwanaci nanti umonsi muwuyo kukawavye akwa pa ka mpindi.

 Wonye avino calinji na kwe Lisette uwa myaka 16 wino impindi yimwi wakumvilwepo umwanaci muwuye. Watili: “Nasambilizile ku sukulu mwe sayansi ukuti pano umuntu akuya akukula, umuwili wukaya ukwivwika ivipusane pusane. Nkalola ukuti awacitici awavule nga wamanyile vino vikacitika ku miwili yawo, wangalola ukuti ukukumbwa umwanaci nanti umonsi muwuyo akwa pa ka mpindivye swinya watanga wayivwa ukuti wawa pe wano wakalala na wonsi nanti na wanaci wawuye.”

 Nomba nga nga cacilamo ukukumbwa umwanaci nanti umonsi muwuyo? Uzye e Leza waluvyanya wo-o vino wakanya ukuti umonsi nanti umwanaci atazipizile ukulala nu mwanaci nanti umonsi muwuye asa mulandu nu kuti awino akakumbwa?

 Nga temwasuka ukuti waluvyanya, muzipizile ukumanya ukuti mukalola ivintu ngati awantu wano wakalola ukuti umuntu azipizle ukulala nu wili wensinye wino akulonda nga cakuti wivwa inyengwa. Lelo Baibolo yikalanjizya ukuti awantu wacindama wo-o vino yikalanda ukuti wangasolapo ukukana cita uwuzelele nga cakuti avino umuwili wawo wukulonda ukuti wacite.​—⁠Wakolose 3:5.

 Vino Baibolo yikalanda avya cisinka. Vino yikalanda pe wano wakalala na wonsi nanti na wanaci wawuye vyakolana na vino yikalanda pa wonsi wano wakakumbwa awanaci na wanaci wano wakakumbwa awonsi ukuti “Lewukanji uwuzelele.” (1 Wakorinte 6:18) Awonsi awavule wano wakakumbwa awanaci na wanaci awavule wano wakakumbwa awonsi, wakakwelezya na maka ukukonka vino Baibolo yikalanda, ukupitila mukuyilama pakuti watakacite uwuzelele nga welezwa. Fwandi na walyanye wano wakakumbwa awanaci nanti awonsi wawuye, wazipizile wakwelezya na maka ukuyilama pakuti wasecelesya Yehova.​—⁠Amasundo 30:19.