E Baibolo yalandapo pa wuwipe wuno wukafumamo mukukana wombelapo zuwa pa vintu. Yikati: “Ndi ukulindilila umuza nukuti impindi nzima iyize, utanga ulime chimwi, swinya utanga uyize ulonge chimwi.”​—Ekawizya 11:4.

 Lekani tulande pe vimwi vino vingalenga mutawombela zuwa pa vintu na vino vingamyavwa ukucimvya yo-o intazi.

 Imilimo yimwi yikawoma nkaninye icakuti cikapepuka nu kuleka ukuyiwomba. Vyo-o vino vyakonkapo vingamyavwa.

•   Tantikani vino mwandi mwawomba. E Melissa watili “Nanti acakuti ncezilwe ukuwomba imilimo yimwi, nsilemela ivintu ivivule pa muku wonga, lelo nkakwelezya na maka ukuwomba conga conga.”

•   Talika ukuwomba paponye. E Vera watili “Nga wakupa imilimo, uwatalika ukuwombelapo paponye. Nga kuli na yinji yino uli nayo kaali, pano utani uyiwilile ungayilemba ponga yonsinye nanti ukutantika vino wandi uwawomba.”

•   Uwanenako wanji ukuti wakwavwe. Awakwasi nanti awasambilizya wako wafwile wapitapo mu ntazi yino ukweti. Wangakwavwa ukutantika icete imilimo nu kumanya vino wandi uwawomba.

 Vino ungacita. E Abbey watili “Uwatanticila lyankani ivyakucita. Co-o cikusula mukuti uzipizile ukuwombesya pakuti uficilisye vyovyo vino watantika. Nga wacita wo-o, uliwawombela zuwa pa vintu.”

 Ivyamusango wo-o vikacitika nga cakuti umulimo wuno uli mukutalika ukuwomba wusanzizyemo ukucita vino vikakwivwisya uwukata. Ungacita wuli nga wakupa ukuwomba umulimo wuno utatemilwe? Yelezya ukucita vyo-o vino vyakonkapo.

•   Yelenganya pa mulandu wuno cicindamizile ukutalika zuwa. Ku cakulolelako, yelenganya pe vino uliyivwa icete nga wamala. E Amy watili, “Nkakwivwa icete nkaninye nga namala zuwa ukuwomba umulimo, icakuti nkakwatako ni mpindi yakupuza.”

•   Uwakwelenganya pe vino vingafumamo nga cakuti utawomvile zuwa. Nga cakuti ukuwaya waya ukuwomba umulimo wumwi, uliwasakamikwa swinya uliwapotwa ukuficilisya ukuwuwomba. Amuno e Baibolo yikati: “Chino umuntu akatanda achino akasinza.”​—Wagalatiya 6:7.

•   Uwalola ukuti uwanda wakulecelezya ukuwomba wo-o umulimo wupalamizile. E Alicia watili, “Cikanjavwa nkaninye nga nkuvipanga ngati kwasyala uwanda wonga nanti yawila ukuti male ukuwomba umulimo. Namukulecelezya nkakwiza mukuzana ukuti nsyazile nu wanda wonga nanti yawili ayakupuzavye.”

 Vino ungacita “Vino ukwelenganya vingalenga uwavwambisya ukuwomba. Uwayinena ukuti ndiwomba vyonsinye vino vikulondekwa swinya kusi icili consinye cino cilindesya. Nga nayinenavye wo-o nkawomba vyonsinye vino nkupanga ukucita.”​—Alexis.

 E Nathan watili, “Awantu wakanena lyonsinye ukuti nsiwombela zuwa pa vintu. Lelo nsitemwa wo-o vino wakanena, amuno watamanya ukuti nawa ni vyakucita ivivule.” Nga cakuti ukuyivwa ngati we Nathan, yelezya ukucita vyo-o vino vyakonkapo.

•   Uwatalicila ukucita ivipepuke. E Amber watili, “Wumwi wansambilizizye ukuti nga cakuti umulimo wutandi wumale ama nineti 5, uzipizile ukutalika ukuwuwomba paponye. Pe vyo-o pangawa ukupyela, ukwanika ivizwalo, ukupizya iviya nu kutumila wumwi e foni.”

•   Uzipizile ukumanya ivicindamisye. E Baibolo yikati: “Mumanye ivicilepo ukucindama.” [NWT] (Wafilipi 1:10) Mungawomvya wuli ya-a amazwi mu wumi winu? E Anna walanzile ukuti “Nkalemba imilimo yonsinye yino indi nayo ni mpindi yino nzipizile ukumalilapo. Ni cicindamisye acakuti nkalemba pano nditalika na pano ndimala ukuwomba umulimo wumwi.”

 Uzye vyo-o vikuloleka ngati vyawoma? Nga vino ukulola uwakwizuka ukuti nga watantika ivyakucita, impindi yitaliwakutungulula lelo awemuno uliwayitungulula. Na co-o cililenga utasakamikwa. E Kelly watili, “Nga natantika ivyakuwomba, nkateka umwezo nu kusuwila ukuti ndimala.

•   Utazipizile ukuleka ivili vyonsinye vyakupumvyanya. E Jennifer walanzile ukuti, “Nkanena wonsinye pa ng’anda pano nditalika ukuwomba vimwi. Nga kuli vino wakulonda ukuti ncite, nkawanena ukuti wanene ncite pano ntani ntalike ukuwomba. Swinya nkazimya ne foni pakuti yitampumvyanya.”

 Vino ungacita E Jordan watili, “Nga utawomvile umulimo wuno uli nawo, uweneco wutanga wuyiwombe. Fwandi ukucila cilange cikukucuzya mu wongo, uzipizile ukuwombelapovye. Na co-o cingalenga usyale ni mpindi yakupuza.”