AWACITICI WAKAKOLOWOZYA UKUTI
Uzye Nkasakamikwa pe Vino Nkaloleka?
Amawuzyo: Uzye nkasakamikwa?
Acili kwinye pe vyo-o cino cikulondolola vino ukayivwa?
Ntatemwa vino nkaloleka.
Mpindi zimwi nkakunda vino nkaloleka.
Lyonsinye nakunda vino nkaloleka.
Nga cakuti walinji na maka yakupilula vino ukaloleka, acili kwi cino ungakunda ukupilula?
Iciimo
Vino nang’wama
Uwukulu wa muwili
Inyele
Vino nkalololeka pa minso
Vino inkanda ikaloleka
Nanti vinji
Malicizya amazwi yano yakonkapo.
Ntakunda vino nawa nga . . .
nakwela pa sekelo.
nayilola mu cilola.
nayilinganya kwe wanji (ku viwuza, wano wakapanga ama fashoni, na kwe wano wakawa mu mafilimu).
Malicizya amazwi yano yakonkapo.
Nkaya mukukwela pa sekelo . . .
cila wanda.
cila sabata.
impindi zimwi mwe sabata.
Acili kwinye pe vyo-o cino cikulondolola vino ukayivwa?
Napata vino nkaloleka. Kucakulolelako, e Serena walanzile ukuti: “Lyonsinye nga nayilola mu cilola, nkayilola nge ne mwine nkaninye swinya insi ne muzima. Nkayipanika nu kuleka ukulya pakuti injondeko.”
Uzipizile ukutima na vino ukukaloleka. Kucakulolelako, e Natanya walanzile ukuti: “Lyonsinye kukawa vimwi vino tusikunda pe vyo tukaloleka, uzipizile ukutima vino wawa. Citawa icete ukusakamala pe vino utanga upilule.”
E Baibolo yikatuwomelezya ukuti mutazipizile ukuwika sana amano kwe vino mukaloleka “ukulusya pano mwawela.” (Waroma 12:3) Cawa acicindame ukuwika amano kwe vino mukaloleka, lelo asakucila mu cipimo. Fwandi awuli umulandu wuno tukayisunga awa wusaka nu kucuma amino yitu pakuti twaloleka icete.
Nomba acani cino cingacitika nga ukuwika nkani amano kwe vino ukaloleka? Nga cakuti avino ukayivwa ungelenganya pa ya-a amawuzyo . . .
‘Amulandu ci wuno nkasakamikwa pe vino nkaloleka?’
Kwawa imilandu imivule yino yingalenga uwasakamikwa pe vino ukaloleka. Yimwi pe yo-o yingawa:
Avyakutamba vino vyawa pa intaneti. E Kellie walanzile ukuti “Ivikope vino awacitici awavule wakatamba pa intaneti vikalenga wakwelenganya ukuti wazipizile ukonda nu kuwa numuwili uwuzima pakuti waloleka icete lyonsinye. Na cino cikafumamo acakuti, ungatalika ukuyilola ukuti utacindama nga vino ukulonda vitacitisile!”
Vino awakwasi wakacita. E Rita walanzile ukuti “Awakwasi nga wakuwika sana amano kwe vino wakaloleka, wonye avino na wana wawo wakatalika ukucita.”
Akuyilola ukuti utacindama. E Jeanne walanzile ukuti “Awantu wano wakawika amano pe vino wakaloleka wakalonda lyonsinye awalanga wakuwasalifya. Kukawa ukwivwa uwuwi nga ukuzanwa na wantu wamusango wo-o!”
Asamulandu na cino cingalenga, ungayikolowozya ukuti . . .
‘Uzye nzipizile ukupilula vino nkaloleka?’
Lola vino awaciti wawunyo wakalanda.
E Rori walanzile ukuti: “Asawe lyonsi pano ungapilula vino ukaloleka, acino utazipizile ukuwika nkani amano kwe vino ukaloleka. Nga wacita wo-o ulilenga na wantu wanji walola ukuti ukaloleka icete.”
E Olivia walanzile ukuti: “Uzipizile ukuwacita vino vingalenga uwawa nu wumi uwuzima. Nga uli nu wumi uwuzima uliwaloleka icete. Swinya nga wumwi atakunda vino ukaloleka, akulonda nukuti uwaloleka vino utawa, lyo weyo umuntu asa we ciwuza wako.”
Vino uzipizile ukucita: Uzipizile ukuwayisakamala pa kuti uwaloleka icete, lelo utazipizile ukusakamikwa pe vino ukaloleka. Amuno ukusakamikwa pe vino ukaloleka kungakuletela intazi. (Lolani pano watili “ Vino Julia walanzile.”)
E Erin wazanile ukuti nga ukutima na vino ukaloleka ukuti avino wawa, utaliwa uwasakamikwa.Walanzile nukuti: “Kweni nga nawika sana amano kwe vino nkaloleka, nkakwivwa uwuwi. Acino pe yo-o impindi nkawika vye amano ku kutukusya umuwili nu kulya ivyakulya ivizima. Vyo vyasyala vikayizila vye.”
Icintu icicindamisye cino ungacita!
Nga utakuwika nkani amano kwe vino ukaloleka, utaliwa uwasakamikwa. Na co-o cililenga uwayilola ukuti wacindama swinya ukaloleka icete. E Baibolo yingakwavwa amuno yikatuwomelezya ukucita vino vya konkapo:
Ukuteka umwezo. “Achavye: chili ngati akuwinga umuza. Chazipa ukutima navino uli navyo ukulusya ukuvwamba choo-nachoo penye.”—Ekawizya 6:9, Izwi lya kwe Leza.
Ukutukusya umuwili. “Nukuwelezya umuwili nakonye akuzima.”—1 Timoti 4:8.
Ukuwa ni miwele imizima. “Umuntu weni akalola umuwili kulonde kutupu, ukuwa nenji nkalola mumwezo.”—1 Timoti 4:8.
E Sarah walanzile ukuti “vino tukuloleka pa minso vingalanjizya vino tukayivwa pe vyo tukaloleka. Umuntu nga ali ni miwele imizima awantu wanji wakalola swinya wakavwambisya ukuwa e ciwuza wawo.”
E Phylicia walanzile ukuti “Ukuyemba kungalenga awantu wakuwikako amano zuwa. Lelo imiwele yako imizima ayino awantu walitwalilila ukwizuka.”
Lolani na Imilumbe 11:22; Wakolose 3:10, 12; 1 Peter 3:3, 4.
