Swe Nte zwa kwe Yehova, tukakwelezya namaka ukucita vino awina Klistu wazipizile ukucita ukulingana navino Yesu wasambilizyanga apano navino awatumwa wacitanga. Co-o icipande calanda pe vimwi vino twazumilamo.

1.   Leza. Tukapepa e Leza uwacisinka uwamaka yonsi wenganye nsu ekelewula wino wawa nizina lya kuti Yehova. (Amalumbo 83:18; Ukuwumbulika 4:11) Weleza wa kwe Abrahamu, e Musa, ne Yesu.​—Ukufuma 3:6; 32:11; Yohani 20:17.

2.   Baibolo. Tukalola e Baibolo ukuti mwawa amazwi ya kwe Leza yano walembela awantu. (Yohani 17:17; 2 Timoti 3:1) Vino twazumilamo vikafuma mumabuku yonsinye 66, pano pawa “ilayano kali” ni “layano pya.” E profesa Jason D.BeDuhn walondolozile icete sana pano walemvile ukuti vino Inte zya kwe Yehova “wazumilamo na vino wakacita vikafuma mu Baibolo swinya wasisolela lyankani vino wakulonda Baibolo yilande” a

    Nanti acakuti twazumila mwe vino vyawa mu Baibolo, tusimwamila mbali. Twamanya ukuti iviputulwa vimwi ivya mu Baibolo watavilemvile mukulungatika, lelo vimwi vikawa avimanyilo swinya pakwivwicisya vino yikalanda utazipizile ukupelelavye pa kuwazya, lelo uzipizile ukumanya uwupiliwulo nanti muno walozizye.​—Ukuwumbulika 1:1

3.   Yesu. Tukakonka vino Yesu Klistu wasambilizyanga na vino wacitanga. Swinya twamanya ukuti we kaluwula witu swinya amwana wa kwa Leza. (Mateyu 20:28; Imilimo 5:31) Fwendi swe wina Klistu. (Imilimo 11:26) Lelo nanti ci wo-o, twasambilila mu Baibolo ukuti e Yesu asawe Leza wa maka yonsi swinya kutawa amawaliko yano yakalanjizya ukuti kwawa wa Leza watatu.​—Yohani 14:28.

4.   Uwufumu wa kwe Leza. Uwufumu wakwe Leza awuteko wa kwi Yulu, wutawa mumyezo ya wina Klistu. Wulifumyapo amawuteko ya wantu swinya wulicita vino Leza akalonda ukucitila awantu. (Daniel 2:44; Mateyu 6:9, 10) Wonye avino wandi wucite nombanye, amuno amasesemo ya mu Baibolo yakalanda ukuti tukwikala mu “manda ya kupelelecezya.”​—2 Timoti 3:1-5; Mateyu 24:3-14.

    E Yesu awili Imfumu ya Wufumu wa kwe Leza kwi yulu. Watalisile ukuteka mu 1914.​—Ukuwumbulika 11:15.

5.   Ipusucilo. Inzuwi yacifuta mulandu iya kwe Yesu ayino yatuluwula kuluwembu ni mfwa. (Mateyu 20:28; Imilimo 4:12) Pakuti awantu wize wanoncelemo mu nzuwi ya kwe Yesu, wazipizile ukuwa ni suwilo mwe Yesu apano nu kupilula imiwele yawo nu kubatizwa. (Mateyu 28:19, 20; Yohani 3:16; Imilimo 3:19, 20) Vino umuntu akacita avino vikalanjizya nga cakuti isuwilo lyakwe lya fwa. (Jemusi 2:24, 26) Lelo, ipusucilo litu lisikwiza pamulandu wakuti tukuwombesya, lelo likakwizya pamulandu wa “nkumbu-nkumbu zya kwe Leza.”​—Wagalatiya 2:16, 21.

6.   Iyulu. E Yehova Leza, e Yesu Klistu na wangeli wacisinka avyelewulwa vya ku muzimu swinya wakakwikala kwi yuulu. b (Amalumbo 103:19-21; Imilimo 7:55) Awantu vye watici awali 144,000 awano walizyulupucila kwi yuulu ,swinya waliya wateka ponga ne Yesu mu Wufumu.​—Daniel 7:27; 2 Timoti 2:12; Ukuwumbulika 5:9, 10; 14:1, 3.

7.   Insi. E Leza wapanzile insi ukuti awantu wakwikalamo. (Amalumbo 104:5; 115:16; Ekawizya 1:4) E Leza alilambula awantu wonsinye awacivwila, alileka wikale nuwumi uwuzima swinya waliyikala umuyayaya mwe yonye insi mu paradaise.​—Amalumbo 37:11, 34.

8.   Uwuwipe nu wuyinvi. Uwuwipe nu wuyinvi vyatalisile pano umungeli wa kwe Leza wa pondosile. (Yohani 8:44) We e malayika, wino wakamwita nukuti e “Satana kakwelengula,” wazembelesile awantu wakutalicila ukuti wawe kuluwali lwake, swinya vino wacisile vyalenga awana wawo wayimba. (Intaliko 3:1-6; Waroma 5:12) Pa kumala ilyasi lino Satana walanzile, e Leza waleka iviwipe nuwuyimvi ukuwako, lelo atalilenga vize vitwalilile.

9.   Imfwa. Awantu nga wafwa wakaleka ukuwako. (Amalumbo 146:4; Ekawizya 9:5, 10) Wasiya mukupya mu mulilo.

    E Leza alizyulupula awantu awavule wano wafwa. (Imilimo 24:15) Nomba wano alizyulupula ngawiza wakana ukusambilila inzila zya kwe waliyononwa umuyayaya swinya ataliwazyulupula naswinya.​—Ukuwumbulika 20:14, 15.

10.   Ulupwa. Tukakonka vino e Leza wacisile pitwala lyakutalicilapo. Co-o cikalanjizya ukuti mwitwala muzipizile ukuwavye umonsi wenga nu mwanaci wenga swinya wangalekanavye nga cakuti wenga wacita uwucende. (Mateyu 19:4-9) Twasinincizya ukuti ukupanda amano ukwa mu Baibolo kukakwavwa indupwa ukuwa ninsansa.​—Waefeso 5:22–6:1

11.   Mukupepa kwitu. Tusiwomvya umusalawa nanti iviluwi vinji pano tukupepa. (Amasundo 4:15-19; 1 Yohani 5:21) Vino vyakonkapo avino tukacita pakupepa e Leza :

    •   Ukupepa kwe Leza.​—Wafilipi 4:6.

    •   Ukuwazya nu kusambilila Baibolo.​—Amalumbo 1:1-3.

    •   Ukwelenganyapo sana pe vino tukusambilila mu Baibolo.​—Amalumbo 77:12.

    •   Ukulongana nu kupepa, ukusambilila Baibolo, ukwimbila, ukwasukapo, nu kuwomelezya wa Nte wanji nga nawantu wanji.​—Wakolose 3:16; Waheberi 10:23-25

    •   Ukuwizya ‘ilandwe zima ilya Wufumu.’​—Mateyu 24:14.

    •   Ukwavwa wano wakulonda uwavwilizyo.​—Jemusi 2:14-17.

    •   Ukuzenga nukuzifya Amang’anda ya Wufumu nivifulo vinji vino tukawomvya pa kusambilila Baibolo.​—Amalumbo 127:1.

    •   Ukwavwilizya wano waponezilwe namasanso amakulu.​—Imilimo 11:27-30

12.   Iwungwe litu. Twawa na mawungwe amalekane-lekane swinya mwe cila liwungwe wa eluda awano wakatungulula. Lelo nanti ciwe wo-o, wa eluda wasipanga utumawumba twa wa eluda swinya wasiwafolesya indalama. (Mateyu 10:8; 23:8) Tusipa ica pikumi nanti ukupoka umutulo pano tukulongana. (2 Wakorinte 9:7) Indalama zino tukawomvya pakuwomba imilimo yonsinyene yino tukawomba, zikafuma ku misangulo yino awantu wakasangula mukuyikundila.

     Iwumba Lino Likatungulula, aliwumba ilitici muno mwawa awina Klistu wasongo muvya kwe Leza. Wakawombela ku maofesi makulu swinya awano wakatungulula Inte zya kwe Yehova insi yonsinye.​—Mateyu 24:45.

13.   Vino twalemenkana. Swensinye twazumila muvili vyonganye. (1 Wakorinte 1:10) Tukawombesya na maka pakuti tutawa na kapatulula ka mutundu swinya tusipatulula wanji pamulandu na vino wawa nanti kuno wafuma. (Imilimo 10:34, 35; Jemusi 2:4) Lelo nanti cakuti twalemenkana tusicita ivintu ivili vyonga amuno twakunda ivipusane-pusane. Cila Nte wenga na wenga akayisolelapo ivya kucita umweneco ukulingana ne kampingu yakwe yino wasambilizya Baibolo.​—Waroma 14:1-4; Waheberi 5:14

14.   Imiwele yitu. Tukakwelezya ukulanjizya ulukundo lwa cisinka mwevyonsinye vino tukacita. (Yohani 13:34, 35) Tukakwelezya namaka yitu yonsinye ukukanacita ivintu vino Leza wapata, pano pawa ukuwikwamo uwazi. (Imilimo 15:28, 29; Wagalatiya 5:19-21) Swe wantu wamutende swinya tusilwako inkondo. (Mateyu 5:9; Ayizeya 2:4) Twacindika uwuteko konsinye kuno tukakwikalila swinya tukakwivwila amasundo ya wuteko cikuluvye yatakupinkana na masundo ya kwe Leza.​—Mateyu 22:21; Imilimo 5:29.

15.   Vino tukakwivwana na wantu wanji. E Yesu watunena ukuti: “Uwakunda umuwuyo ndivino wayikunda.” Swinya walanzile nukuti awina Klistu “Wasi awamunsi.” (Mateyu 22:39; Yohani 17:16) Acino ‘tukakwelezya namaka ukucita ivizima kwe wonsinye.’ Lelo nanti ciwe wo-o tusiyisanzya muvikanza vyansi swinya tusilemenkana namacalici yanji pakuti tuwombele ponga. (Wagalatiya 6:10; 2 Wakorinte 6:14) Swinya tukacindika vino awantu wakasolapo ukucita.​—Waroma 14:12.

 Nga mukweti iviwuzyo pe vino Inte zya kwe Yehova wazumilamo, mungawazizyapo navinji pa webusaiti yitu, mungatumila ku mawofesi yitu, mungaya mukulongana pa Ng’anda ya Wufumu mupipi nakuno mwikalila, nanti mungalanda na wumwi e Nte wino wawela kuncende kuno mukakwikalila