Uwufi: Wa Nte wasizevyako Klisimansi amuno watazumila mwe Yesu.

 Icisinka: Swe wina Klistu, swinya twazumila mukuti ituulwa likafuma vye mwe Yesu Klistu.​—Imilimo 4:12.

 Uwufi: Mukapusanya indupwa wo-o vino mukasambilizya awantu ukuti wakana ukuzevyako Klisimansi.

 Icisinka: Twawikako sana amano ku ndupwa. Awuli umulandu wuno tukawomvezya Baibolo ukwavwa awantu pakuti wakwivwana mu ndupwa.

 Uwufi: Mukayipusula ku vivule amuno pa “Klisimansi” apano tukapako wanji, kukawa umutende munsi, swinya apano tukacitilana ni vizima, acino Klisimansi ikawelako.

 Icisinka: Tukakwelezya kupako wanji nukuwa pa mutende na wantu wonsinye impindi iyili yonsinye asa pa wanda wonga uwuyiwele. (Imilumbe 11:25; Waroma 12:18) Ku cakulolelako, pano tukutungulula ukulongana na pano tukuwizya tukakonka vino Yesu watunenile ukuti: “Mwapochelela uwila, achaleka namwenye kapanji uwila.” (Mateyu 10:8) Cinji tukanena awantu ukuwika amano ku Wufumu wa kwe Leza akuti awuno wulilenga munsi muwe umutende.​—Mateyu 10:7.

•   E Yesu watunenile ukuti twakwizucizya imfwa yakwe, asa wanda wakwe uwakukwatwa awe.​—Luka 22:19, 20.

•   Awasambilizi wa kwe Yesu awakutalicilapo watazevyangako Klisimansi. Ibuku lyakuti New Catholic Encyclopedia likavwanga ukuti “ko-o ukuzevya kwatalisile mu 243 [C.E.],” pansizi ya myaka ukucila 100 ukufumilila pano umutumwa wakulecelezya wafwizile.

•   Kutawa cino cikalanjizya ukuti e Yesu wakwasilwe pa 25 December, swinya nu wanda nkwatwa yakwe watawulumbula na mwe Baibolo.

•   Twazumila mukuti e Leza atazumilizya ukuzevya Klisimansi, amuno yafuma ku ntambi zino wano watapepanga Leza wakonkanga.​—2 Wakorinte 6:17.

 Awavule wacili wakazevya Klisimansi napano wamanyanye ntoo kuno yafumilila akumipepele ya wufi, swinya e Baibolo itazumilizya ko-o ukuzevya. Fwandi awantu wa musango wo-o wangakolowozya ukuti: Amulandu ci wuno awina Klistu wangavwambila ukupatwa pa mulandu vye wakunazevyako Klisimansi?

 E Baibolo ikatunena ukwelenganya ‘nukwelezya ivintu vyonsi.’ (1 Watesalonika 5:21) Ikatusambilizya ukuti tufwile ukukunda sana icisinka. (Yohani 4:23, 24) Kweni twawika amano kwe vino awantu wakatulola na vino wakakwelenganya pe sweswe, lelo cino twawikako sana amano akukonka amasundo ya mwe Baibolo, nanti acakuti wamwi wangatupata.

 Nanti acakuti tusizevyako Klisimansi, twacindika nkaninye wano wakazevyako. Tusiwapaticizya ukuleka ukuzevya.