Pa winga wa Nte zya kwe Yehova pakawa ukuzevya kwa mucinzi ni lyasi lino likafuma mwe Baibolo. Pa nsizi yi lyasi kungawako ukuzevya pano pangawa ni vyakulya. a E Yesu wazanilwe ku winga wuno walinji ku Kana pano watalisile vye umulimo wakwe uwa munsi.​—Yohani 2:1-11.

•  Avyani vino vikacitika pano wakuzevya uwinga?

•  Akwinye kuno kukawela uwinga wa Nte zya kwe Yehova?

•  Awaweni wano wangazanwako?

•  Uzye wano wisilwe ku winga wazipizile ukuzwala wuli?

•  Uzye wano wisilwe ku winga wakaletako ni vyawupe?

•  Uzye kuwinga kukawa ukukatusya nu kuminkanya amakapu?

•  Uzye kukawa ukusansa e nawinga ne siwinga e laisi nu tupepala?

•  Ngi paala ni vyakulya vyeni akuno vikawa?

•  Ngu kucina ndi ndwimbo vyeni ako vikawa?

•  Uzye Inte zya kwe Yehova wakazevya uwanda wuno watwaline?

 Ilyasi lya winga acili cintu cimwi icicindame pa winga wa Nte zya kwe Yehova. Lyo-o ilyasi likawavye pa mamineti 30 swinya likalandwa nu mwana witu Inte ya kwe Yehova (e eluda). Likazipa nkaninye swinya likawa alyakuwomelezya likalanda pe vino e Baibolo yingavwa wano wakutwalana ukuwakundana nga nukuwa ninsansa mwi twala lyawo.​—Waefeso 5:33.

 Munsi imvule uwuteko ukazumilizya Inte zya kwe Yehova ukulembesya itwala lyawo ukulingana ni sundo. Nga cawa wo-o pano ilyasi lya winga lyawaya mukusila wano wakutwalana wakalapa imilapo, swinya wakazwikana nama ling’i, wino apilwe insambu zya kulanda ilyasi akawilizya ukuti wa-a nomba wawa amulume nu muci.

 Ne munsi zinji wakazumilizya ukuti wazipizile ukulembesya itwala lyawo kulyanye ku wuteko. Wano wakutwalana wakacita wo-o pano kwasyala amanda matici pa kuti kuwe ilyasi lya winga. Nga cakuti e siwinga ne nawinga watalafile wakakwiza mukulapa pansilo yilyasi lya winga, nga cakuti walafile pano walembesyanga itwala lyawo kuwuteko wangasolapo ukunyocezya ukulapa nanti awe wazipizile ukulanda wulyanye vino walandanga pakulanjizya ukuti walapa kali. Ilyasi likalecelezya nipepo ukuti walenge e Leza apale itwala lyawo ilipya.

 Wa Nte awavule wa kasolapo ukuwovya ing’anda ya wufumu ukuwelamo uwinga wawo nga wasakuyiwovya.  b Lelo nga cakuti wapekinye ukuzevya wazipizile ukusola incende yinji ukwakuwela koko ukuzevya.

 Nga cakuti uwinga wuwezile mung’anda ya wufumu uwili wensinye akawa amuntungwa ukuzanwako ciwe we Nte nanti asawe Nte. Ne nga cakuti kuli ukuzevya, e siwinga ne nawinga awano wakasolapo wano wangazanwako kwe wo-o umuteweto.

 Kweni kutawa isundo ilili lyonsinye lino likalanda pe vino tuzipizile ukuzwala kuwinga pano tukuya kung’anda yawufumu. Lelo nanti ciwe wo-o, Inte zya kwe Yehova wakakwelezya namaka ukukonka ivisinka vya masundo ya mu Baibolo vino vikalanda pamizwalile ukuti yizipizile ukuwa iyamucinzi swinya iyiyanane. Cikazipa nkaninye nga cakuti wensinyene wino wazanwako kuwinga wakonka vyo-o ivisinka vya masundo ya mu Baibolo. (1 Timoti 2:9) Swinya napano kwawa ukuzevyanye, vyonye ivisinka vyamasundo pa mizwalile avino vizipizile ukukonkwa.

 E Baibolo yikatuwomelezya ukuyikundila ukupa ukufuma pansi ya mwezo witu. (Amalumbo 37:21) Inte zya kwe Yehova wakayivwa icete ukupa nga nu kupocelela ivya wila vya pa winga. (Luka 6:38) Lelo nanti ciwe wo-o, Inte zya kwe Yehova wa sipaticizya awantu ukupa ivya wila nanti ukuwilisya amazina yewano wapile ivya wila pa winga. (Mateyu 6:3, 4; 2 Wakorinte 9:7; 1 Peter 3:8) Amuno ukucita wo-o kwapusana na vino Baibolo yikalanda swinya kungalenga na wantu wano wazanilweko kuwinga ukukanayivwa awantungwa.

 Awe, amuno ukuminkanya amakapu kwafumilila ku mipepele ya wufi. c Wa Nte wasikuminkanya amakapu pakupala wano wakutwalana lelo wakawanenavye amazwi amazima swinya aya kuwawomelezya.

 Awe, Muncende zimwi awantu wakasansa e nawinga ne siwinga e laisi, utupepa ni vintu vye vinji ivikoleko. Weni wazumila ukuti ukucita wo-o, kukapa e nawinga ne siwinga ulongo ninsansa swinya vikalenga awikala pa mpindi ntali. Lelo Inte zya kwe Yehova weni wakalewuka vyonsinye vino vingalenga watalike ukucindika imizimu. Co-o casanzyamo nukulanda amazwi yano yalemenkana ni vya mizimu pakupala wanji, amuno ukucita wo-o kwapusana na vino Baibolo yikalanda.​—Ayizeya 65:11.

 Nga cakuti uwinga wukuciticila pa Ng’anda ya wufumu, pasiwa ivyakulya nanti ivya kumwa. Acino wamwi wano wakutwalana wakapekanya incende yinji ukwakuti awantu wize wakalile ivyakulya nu kwizyako pansizi yi lyasi. (Ekawizya 9:7) Nga wapekanya ukuti kwize kuwe ipala, wakapekanyavye iliyanane swinya wakasinincizya ukuti wakupavye wasongo awatici pole.​—Luka 21:34; Waroma 13:1, 13.

 Nga cakuti wano wakutwalana wasolapo ukuti kwizekuwe ukuzevya, aweneconye awano wangasolapo indwimbo nga nukucina. (Ekawizya 3:4) Indwimbo zino wasolapo zizipizile ukuwa inzima zino cila muntu pe wano wakutwalana na kuno wikalila wakunda swinya zino zitanga zipunuzye nawano wazanilweko. Nga cakuti uwinga wukuwela pa ng’anda ya wufumu, imitwe ya ndwimbo zino zikawako zikafuma mwe Baibolo

 Pa mulandu wakuti e Baibolo yitalesya nanti ukuzumilizya ukuwazevya uwanda wuno wamwi watwaline, awatwalane aweneconye awano wazipizile ukusolapo nga wangakuzevya nanti pole. Nga wasolapo ukuzevya, nga wakulonda wakazevyavye aweneco wonganye nanti na walupwa ni viwuza.