Swe Nte zya kwe Yehova tusizevyako ya-a amanda yakukwatwa amuno twamanya ukuti ko-o ukuzevya kusisecelesya Yehova. Nanti acakuti e Baibolo yitalanda mukulungatika ukuti tutazipizile ukuzevya amanda ya kukwatwa, vino yikalanda vikalenga atumanya icete vino vyawa mweko ukuzevya na vino e Leza akakulola. Lekani tulandepo pa vintu 4 apano napa visinka vya mumasundo ya mu Baibolo vimwi.

1.   Ukuzevya amanda ya kukwatwa kwafuma kwe wano watapepanga Yehova. Ukulingana ne Funk & Wagnalls Standard Dictionary of Folklore, Mythology, and Legend, ko-o ukuzevya kwafuma kucizumilo cakuti “kwawa imizimu imiwipe yino yingacisa umuntu pawanda wuno wakwasilwe nukuti “ukuwa ponga niviwuza pawanda wuno wakwatizilwe nukumunena amazwi amazima kungacinjilila weyo umuntu pakuti watamusansile ku mizimu imiwipe.” Ibuku lyakuti The Lore of Birthdays likalanda ukuti kunsizi ukulemba uwanda wuno umuntu wakwatizilwepo “kwacindime nkaninye amuno wonye wo-o uwanda awuno wawomvwanga pakupendulila kuntanda,” wawazyanga “vino viliciticila umuntu nanti awantu ukuwomvya amaplaneti ni lanzi nga wavilinganya kuno vyawezile pa wanda wuno umuntu wakwatizilwepo.” Ibuku ilili lyonganye lyalanzile nukuti “wakendulo wano wakawomvya pakuzevya uwanda wakukwatwa, kali wazumizile ukuti wawa na maka yakulenga vino umuntu akulonda ukucitika.”

    Lelo e Baibolo yalesya ukucita amanjelengwe, ivyamajiki nanti ‘ivyamusango wo-o’ (Amasundo 18:14; Wagalatiya 5:19-21) Nakuwa cimwi cino calenzile e Leza ayonone umusumba wa Babiloni apamulandu wakuti awina Babiloni wapendulanga kuntanda, amuno nakonye kwalinji pa kucita ivyamanjelengwe. (Ayizeya 47:11-15) Swe Nte zya kwe Yehova tukalonda ukumanya kuno intambi zimwi zyatuntuka. Lelo co-o citakusula mukuti tukalonda ukumanya kuno cila lutambi lwatuntusile. Cinji acakuti nga twazana ukuti e Baibolo yalandapo vimwi pe lolo ulutambi vino Leza wapata, tukakwivwila vino yalanda.

2.   Awina Klistu wa mu mpindi zya watumwa watazevyangako uwanda wa kukwatwa. Ibuku lya The World Book Encyclopedia lyalanda pe wa-a awina Klistu ukuti “wamanyile ukuti ukuzevya uwanda wa kukwatwa lwalinji alutambi lwa wantu wano watapepanga Leza wa cisinka.” E Baibolo ikalanjizya ukuti vino awatumwa na wanji wano Yesu wasambilizizye wacitanga avino na wina Klistu wonsinye wazipizile wacita.​—2 Watesalonika 3:6

3.   Awina Klistu watazipizile ukuzevya inkwatwa ya kwe Yesu, lelo wazipizile wazevya imfwa yakwe. (Luka 22:17-20) E Baibolo yikati, “uwanda wamfwa wazipa walusya uwanda wankwatwa.” (Ekawizya 7:1) Pano Yesu walinji mupipi nu kufwa lyo wapanga kali izina ilizima nu Leza. Co-o calenzile uwanda wuno wafwile ukucindama ukulusye uwanda wuno wakwasilwe.​—Waheberi 1:4.

4.   E Baibolo yitalandapo ukuti awawovwi wa kwe Leza wazipizile ukuwazevwa amanda yakukwatwa. E Baibolo yalandavye pa wantu wawili wano wazevizye amanda ya kukwatwa kwawo swinya wawa awantu watawombelanga e Leza. Lelo vino vyacitisile pano wa-a wawili wazevyanga amanda ya kukwatwa kwawo vitazifile.​—Intaliko 40:20-22; Marko 6:21-29.

 Wulyanye vino awakwasi awazima wonsinye wawa, wa Nte nawonye lyonsinye wakalanjizya ukuti wakunda awana wawo, swinya wakawapako nivyawila nukwizizya ponga nawo. Wakakwelezya namaka ukukolanya e Leza wino akapa awana wakwe ivizima. (Mateyu 7:11) Awana wa Nte zwa kwe Yehova wasikwivwa uwuwi, yivwani vino wakalanda:

•   “Cikakwivwika icete ukupocelela ivyawila pano usakwenecela nukuti wasi wakupe.”​— Avino e Tammy wino ali ni myaka 12 walanzile.

•   “Nanti acakuti awakwasi wane wasimpa ivya wila pawanda wuno nakwatizilwepo wakampa impindi iyili yonsinye. Natemwa wo-o vino cawa amuno wakampa pampindi yino ntakwenecela nu kwenecela.”​—Avino e Gregory wino ali ni myaka 11 walanzile.

•   “Uzye mukalola ukuti amamineti 10, amasikono amatici, nulwimbo avino vingalenga e parte ukuzipa? Mwize mwize ku ng’anda kumwitu mwize mulole vino e parte yizipizile ukuwa!”​—Avino e Eric wino ali ni myaka 6 walanzile.