Tukakonka vino Baibolo yikalanda pa cililo, ukuwikako navyonye vino twandi tulandepo:

•   Citawipa ukulosya nga cakuti e ciwuza witu wafwa. Awasambi wa kwe Yesu nawonye walosizye pano waciwuza wawo wafwile. (Yohani 11:33-35, 38; Imilimo 8:2; 9:39) Acino,tusilola icililo ukuti ayili impindi yakuzevya nanti ukumwa ipala. (Ekawizya 3:1, 4; 7:1-4) Lelo tukalola impindi yakulosya ukuti ampindi yakulangulucilako wano wafwizilwe.​—Waroma 12:15.

•   Awafwe watamanya icili consinye. Kweni nanti acakuti twakulila ukupusanepusane swinya tukakonka nintambi indekanendekane, tusikonka intambi nanti ukucita ivintu vino Baibolo yitazumilizya, ndi vino awantu wakacita wano wazumila mukuti awafwe wangacita ivintu vimwi kwe wano wali nuwumi. (Ekawizya 9:5, 6, 10) Pe vyo-o vino wakacita pawa nulutambi lwakulinda icitumbi, ukusumba indalama imvule nkaninye pakuzevya icililo na pakwizuka umuyazi, ukupa ivyawila kuwafwe, ukulanda na wafwe, ukuwalenga ivintu, nga navinji vino wakacita kwe namfwilwa nanti kwe wino afwizilwe umuci. Tusikonka zyonsinye zyo-o intambi amuno tukakonka vino Baibolo yalanda ukuti: “Pawukani muwasye wonga muyipawule kwewoliwo. . . . Mutize muwalemelela ichintu chimwi chino chakandamana.”​—2 Wakorinte 6:17.

•   Awafwe walizyulupuka. E Baibolo yikasambilizya ukuti awafwe walizyulupuka swinya impindi yikwiza pano imfwa yitaliwako. (Imilimo 24:15; Ukuwumbulika 21:4) Ukumanyavye ukuti awafwe walizyulupuka, kukalenga tutati twalosya ukucila mucipimo ndi wulyanye vino kwavwile awina Klistu wakutalicila.​—1 Watesalonika 4:13.

•   E Baibolo yikatunena ukuti tuzipizile ukuyicefya. (Imilumbe 11:2) Twamanya ukuti pa cililo asapakutalika ‘ukuyivwa’ nanti ukuyilanjizya ku wantu pa vyuuma nanti iviwuza vino twawa navyo. (1 Yohani 2:16) Tusilonda ukuti ivililo vitu vyawa ivyalulumbi nanti ukukala imbokosi zyamutengo nu kuzwala ivizwalo vyakuti awantu wakumbwa.

•   Tusipaticizya awantu ukucita vino twazumilamo pa lwa vililo. Tukakonka amazwi yakuti: “Swensinye-pyu tuliyiluwululila pa kwe Leza.” (Waroma 14:12) Lelo nanti ciwe wo-o, nga watukolowozya tukawalondololela vino twazumilamo “numuchinzi.”​—1 Peter 3:15.

 Ukwakuwela icililo: Nga cakuti ulupwa lwasolapo ukuti lukulonda kuwe ni lyasi lya cililo, aluno lukasolapo nakuno lukulonda kuwele nilyasi, nampo nga amu Ng’anda ya Wufumu, kuvikulwa vyakulosezyamo nanti ku manda.

 Ilyasi lya cililo: Kukawa ilyasi lya mu Baibolo ilya kusansamusya wano wafwizilwe nu kuwalondololela ukuti awafwe walizyulupuka. (Yohani 11:25; Waroma 5:12; 2 Peter 3:13) Swinya mwi lyasi lya cililo wangalanda na pa miwele imizima yino umulowe walinji nayo, yino yingalenga isuwilo lye wano wizile ku cililo ukuwomelako.​—2 Samueli 1:17-27.

 Cinji acakuti wangimbila nu lwimbo pe vino vyawa mwe Baibolo. (Wakolose 3:16) Pa nsizi yi lyasi kukawa nu kupepa ipepo lyakusansamusya wano wakulosya.​—Wafilipi 4:6, 7.

 Ukupa umutulo nanti indalama: Tusilipilisya awantu nga wiza mukulosya pa cililo swinya tusipoka umutulo.​—Mateyu 10:8.

 Wano wazipizile ukuzanwako: Nawano asa wa Nte nye nawonye wangazanwako ku Ng’anda ya Wufumu kuno kuwezile icililo, wulyanye vino cikawa ku kulongana kunji kuno tukakwata.

 Cila Nte azipizile ukuyisolelapo ukulingana ne kampingu yakwe yino yasambilizwa ne Baibolo nga cakuti angazanwako nanti pole. (1 Timoti 1:19) Lelo kweni nanti ciwe wo-o, tusicitako ivintu vimwi vino wakacita pa vililo vino tukalola ukuti Baibolo yalesya.​—2 Wakorinte 6:14-17.