Uzye Inte zya kwe Yehova Wakawomvya Wuli Imisangulo?
Tukawomvya imisangulo kukutunjilila iwungwe nga nimilimo yino yikawombwa mwi wungwe lya kwe Yehova. Tukawomba yo-o imilimo pakuficilisya umulimo uwucindame, uwakwavwa awantu ukuwa awasambi wa kwe Yesu Klistu.—Mateyu 28:19, 20
Tusiwomvya imisangulo mukuwinisya wanji. Cinji tusilipila wa eluda nanti uwili wensinyenye wino akawombako umulimo wumwi mwi wungwe lya kwe Yehova. Swinya Inte zya kwe Yehova wasilipilwa pano wakuwomba umulimo wakuwizya. Wano wakawombela pa misambo na ku maofesi makulu ukuwikakovye nawa mwi wumba lino likatungulula wasifola indalama nanti zimwinye.
Imilimo Yino Tukawomba
Ukusalanganya: Tukapiliwula, ukupulinta nu kutuma, ama Baibolo amavule nkaninye na mabuku yanji cila mwaka ukwasowa ukulipilisya. Wonye avino cawa na kwe Webusayiti yitu iya pa jw.org ne JW Library app, naponye pakazanwa amabuku yitu yano mungakopolola ukwasowa ukulipila.
Ukuzenga nu Kulunjisya: Tukazenga nu kulunjisya amang’anda ya wufumu nivikulwa vinji ivyakupepelamo e Yehova ukuzinguluka insi yonsinye, pakuti amawungwe yawawa nu mwakulumbanizizyamo e Yehova ponga. Wonye avino cikawa na ku misambo na kuma wofesi Yakapiliwula. Umulimo wakuzenga nu kulunjisya vino nyononesile wukawombwa nawawomvi wakuyikundila. Co-o cikalenga iviposwa ukucepako.
Uwutunguluzi: Imilimo yino yikawombwa pa maofesi makulu, mu misambo, mu maofesi ya wakapiliwula ukuwikakovye na wano wakawomba umulimo uwuyiwele, wakatunjililwa ni misangulo yino awanawitu nawankazi ukuzinguluka insi yonsinye wakasangula mukuyikundila.
Ukuwizya: Inte zya kwe Yehova zisifolelapo pa kuwizya ilyasi lizima nu kusambilizya wanji “izwi lya kwe Leza.” (2 Wakorinte 2:17) Lelo ndi wulyanyene vino cawanga ku wina Klistu wakutalicila, wonsinye wano wakasolwa nu kuwasambilizya apano nawano wakayipa ukuwomba, wakawatunjilila ukupitila mukuwapa umwakwikala navino wakalonda muwumi wawo.—Wafilipi 4:16, 17; 1 Timoti 5:17, 18
Ukusambilizya: Ukulongana kwa muputule nu kwa citungu ku katunjililwa nu musangulo wakuyikundila. Namukulundapo tukafumya indwimbo zya kutelezya na mavidyo yano yakalanda pe Baibolo. Swinya kukawa na masukulu ayakusambilizya wa eluda nawano wawa mulimo wampindi zyonsi ukuwawomba icete umulimo wuno wakawomba.
Ukwavwilizya wano waponezilwe nu wusanso: Tukapa ivyakulya, aminzi nu mwakwikala kwe wonsinye wano waponezilwe nu wusanso. Yo-o imilimo yisikwavwavye ‘awasuwilwa wanji’ lelo nawalyanye wano asawa Nte—Wagalatiya 6:10.