Swe Nte zya kwe Yehova tukawombesya ukulemenkanya indupwa zitu ni zye wanji. Tukacindika Leza wino watalisile ulupwa. (Intaliko 2:21-24; Waefeso 3:14, 15) E Leza akawomvya e Baibolo pakusambilizya awantu ivisinka vya masundo vino vikakwavwa awantu ukuzingukuka insi yonsinye ukulenga itwala lyawo ukuwa iliwome swinya ilya nsansa.

 Tukawombesya ukukonka vino Baibolo yikalanda, amuno vikatwavwa ukuwa awalume, awaci na wakwasi awazima. (Imilumbe 31:10-31; Waefeso 5:22–6:4; 1 Timoti 5:8) Vino vyawa mu Baibolo vikakwavwa nindupwanye muno mwawa wano wakapepa ukupusanepusane ukuwa ninsansa. (1 Peter 3:1, 2) Lolani vino awatwalane wano umulume wizile awa a Nte ya kwe Yehova walanzile.

•   “Pa myaka 6 iyakutalicilapo mwi twala litu twapokotongavye muno kwacela swinya twalumisyanyangavye umwezo. Nomba pano e Ivete wizile awa a Nte ya kwe Yehova, wandanjizyanga ulukundo nicikuku nkaninye. Wo-o vino wapilusile walenzile itwala litu litasila.”​—Avino wa Clauir wano wakakwikala ku Brazil walanzile.

•   “Pano e wakwane e Chansa watalisile ukusambilila Baibolo ni Nte zya kwe Yehova, namukanizye amuno namanyile ukuti wa Nte wakapawunkanya indupwa. Lelo ukufumilila pano watalicizile ukusambilila Baibolo, nalola ukuti yavwa nkaninye itwala litu.”​—avino wa Agness, awa mu Zambia walanzile.

 Pano tuli mu mulimo, tukanenako wanji pe vino ukukonka amano yano yawa mu Baibolo kungawavwa

•   Ukusola icete uwakutwalana nawe

•   Ukusipicizya mu mwaka wakutalicila pano watwalanavye

•   Ivyakwivwana icete na wakoyi

•   Ivyakuwomvya icete indalama

•   Ukuleka ukupokota

•   Ukusambilila ivya kutetelana

•   Ukusambilizya awana

 Ukulandavye icisinka mpindi zimwi mukawa intazi. Kucakulolelako, e lipoti yimwi iya mu 1998 iya kampani ka Sofres yatili, pa matwala 20, mwitwala lyonga muno muli wenga wino akapepa ku Nte zya kwe Yehova, mwawanga intazi nkaninye nga cakuti wenga wasolapo ukuwa Inte ya kwe Yehova.

 E Yesu wasambilizizye ukuti wano walinji nukuwakonka vino wasambilizyanga, walinji nukuwawa ni ntazi mu lupwa. (Mateyu 10:32-36) E Will Duran wino wasambilila pilyasi lyakali walanzile ukuti, pano uwuteko wa ci Roma watekanga “awina Klistu wawapile umulandu wakulekanya indupwa.” a Swinya wonye avino ni Nte zya kwe Yehova wawa mwe ya-a amanda. Uzye co-o cikupiliwula ukuti Inte zya kwe Yehova wakapawunkanya indupwa?

 Pano icilye ca European Court of Human Rights capingulanga umulandu wakulekanya indupwa wuno wapile Inte zya kwe Yehova, wa lupwa wano asa wa Nte zya kwe Yehova ilivule awano wakaleta intazi amuno “wakakana ukuzumila nukucindika insambu zino e lupwa lwawo wakwata izya kupepa kuno akulonda nukuwacita vino wazumilamo.” Icilye calanzile nukuti: “Yo-o intazi yazeka nkaninye mu ndupwa zino zikapepa ukupusanepusane swinya wonye avino cawa na kwe wano wakawa a Nte zya kwe Yehova.” b Nanti acakuti Inte zya kwe Yehova wakawacuzya kwa lupwa lwawo, wakakwelezya na maka ukukonka vino Baibolo ikalanda ukuti: “Mutize muwalandula.  . . Muwalemasya ukwikala umutende nawantu wonsi.”​—Waroma 12:17, 18.

 Wa Nte wakakonka vino Baibolo yikalanda pa kutwalwa nanti ukutwalila “mumfumu ntupu,” akuli ukuti ukutwalwa kwe wino wazumila mu vilivyonga. (1 Wakorinte 7:39) Lyo-o isundo lyawa mwe Baibolo swinya likawomba. Kucakulolelako, ibuku limwi ilya mu 2010 ilye Journal of Marriage and Family lyalanzile ukuti “awatwalane wano wakapepa ukuli konga swinya wazumila nivili vyonga,” wakakwivwana nkaninye. c

 Inte zya kwe Yehova wasiwomelezya wa Nte wanji wano watwalwa kwe wano asawa Nte ukusya wawakwawo. E Baibolo ikati: “Ndi umu Klistu umonsi ali numuchi entasuwila nga ndi watima ukwikala nawe, kusikwezya ayize amuwinge. swinya ndi umwanachi umu Klistu watwalwa kumonsi muntasuwilwa, lelo ndiwatima nawe umwanachi weyo kusikwezya asya umulume.” (1 Wakorinte 7:12, 13) Inte zya kwe Yehova wakakonka lyo-o isundo.