Ee, swe Nte zya kwe Yehova tusikana imilembo, tukazumila nukutupozyanyene. Nanti acakuti tukasunga imiwili yitu icete swinya tukalonda ukuwa nu wumi uwuzima, impindi zimwi tukalwala swinya tukalonda nuwa ‘kutupozya.’ (Luka 5:31) Wa Nte wamwi wakawomba wudokota, wulyanye vino e Luka, umwina Klistu wino walinjiko mu mpindi zya watumwa walinji we dokota.​—Wakolose 4:14.

 Inzila zimwi izya kupozezyamo awalwale zikapusana na masundo ya mu Baibolo, swinya tusizumilizya ukupozya kwa musango wo-o. Ku cakulolelako, tusizumilizya ukutuwikamo uwazi amuno e Baibolo yalesya ukuwomvya uwazi pakuti wumwi apususye uwumi. (Imilimo 15:20) Swinya e Baibolo yalesya ni nzila zyakupozezyamo awalwale zino zyasanzyamo ivya mizimu.​—Wagalatiya 5:19-21.

 Lelo nanti ciwe wo-o, inzila imvule izyakupozezyamo zitapusana na masundo ya mu Baibolo. Acino cila muntu azipizile ukuyisolela vino akulonda. E Nte wumwi angazumila ukumupozya ukuwomvya inzila yimwi, ne winji angasolapo ukukana yoyonye yino umuwuye tezumizile.​—Wagalatiya 6:5.