Uwufi: Wa Nte watazumila mukuti wa dokota wangawavwa, acino wakakana imipozezye yonsinye.

 Icisinka: Swe Nte zya kwe Yehova tukalonda ukutupozya icete ni ndupwa zitunye. Ndi tulwile, tukaya kwa dokota wano wamanya ukupozya swinya wano wakalepuka ukwasowa ukuwomvya uwazi. Tukasalifya nkaninye pa kulunduluka kuno kuli mu vya cipatala. Conye acino calenzile ukuti wavwambe inzila zyakuwapozezyamo ukwasowa ukuwomvya uwazi amuno walondanga ukuti wakwavwa wa Nte. Nomba pe yo-o watalika ukuwomvya zyo-o inzila zyakupozezyamo na kwe wano asa wa Nte. Ya-a amanda munsi imvule, awantu watalika ukukana ukuwawikamo uwazi amuno wasilonda ukwambula izya ndwala ukupitila mu wazi, ukuwa ni ntazi nanti intazi zinji zino zikawako pa mulandu wakuluvyanya ukupozya.

 Uwufi: Wa Nte wazumila mukuti isuwilo alino lingapozya umuntu.

 Icisinka: Tusipepelelela awantu pakuti wapoole mu cizungusyo.

 Uwufi: Ukuwomvya inzila zinji ukwasowa ukuwomvya uwazi akwamutengo nkaninye.

 Icisinka Impozezye muno musiwa ukuwomvya uwazi, yisisumba ni ndalama imvule. a

 Uwufi: Wa Nte awavule, ukuwikako na wana wakafwa cila mwaka, amuno wakakana ukuwawika uwazi.

 Icisinka: Wo-o awufi uwutifii. Wadokota ilivule wakacita amaopareshoni amakulu ndi vino ayakumwezo, ku mafupa, na kucinsya ivilundwa vya mumuwili ukwasowa nukuwomvya uwazi. b Awalwale, ukuwikako na wana wano wasiwawikamo uwazi, ilivule wakapola zuwanye nge awalyanye wano wawawisile uwazi, impindi zimwi wano wasiwikwa uwazi awano wakapolapo zuwa. c In Kusi nanti wenganye wino wasinincizya ukuti umuntu angafwa ndi watamuwisile uwazi, nanti ukuti nga wamuwikamo atanga afwe.

 Cino cikalenga wakana apa mulandu na vino wazumilamo. E Baibolo mwi Layano Kali na Mwi Layano Pya ikatunena ukuti tuzipizile ukulewuka uwazi. (Intaliko 9:4; Levitikasi 17:10; Amasundo 12:23; Imilimo 15:28, 29) Cinji acakuti e Leza akalola uwazi ukuti awuli uwuminye. (Levitikasi 17:14) Acino tukakana uwazi amuno tukalonda ukwivwila Leza, swinya tukalonda nukumucindika amuno awino watupa uwumi.

 Ku nsizi wa dokota walolanga ngati ukupozya ukwasowa ukuwomvya uwazi kwatala nkaninye, swinya awantu wakafwa. Nomba yo-o impindi waleka ukwelenganya wo-o vino welenganyanga. Ku cakulolelako, mu 2004, e magazini yino yalandanga pa vya wumi yatili “inzila imvule zino tukawomvya pakupozezyako Inte zya kwe Yehova azino tuliwawomvya ko-o kunkolelo kuno tukuya.” d Icipande cino calinji mwe magazini wakuti Heart, Lung and Circulation calanzile wo-o mu 2010 “‘Tutandi tuwapozya Inte zya kwe Yehova ukuwomvya inzila muno mutawa ukuwomvya uwazi,’ twandi twaziwomvya na pakupozezyako wanji.”

 Pe yo-o impindi wadokota awavule insi yonsinye nga wakuwombela pa muntu wakawomvya inzila yakuti uwazi wa mulwale wusakunoneka nkani pano wakumuwombela. Inzila zya musango wo-o izyakupozezyamo wakaziwomvya na mu nsi zinji izipiina swinya na walwale awavule wano awa wa Nte wakavwamba ukuwapozya ukuwomvya zyonye zyo-o inzila.