Swe Nte zya kwe Yehova tukakwivwa icete nkaninye ukulanzyanya vino twazumilamo na wa mumipepele yinji. Lelo nanti ciwe wo-o tusipepela ponga nawo. E Baibolo yikalanjizya ukuti awina Klistu wacisinka “walimbinkana apaliponga,” swinya vino wazumilamo avino vikalanjizya ukuti mwelimonyene walemenkana. (Waefeso 4:16; 1 Wakorinte 1:10; Wafilipi 2:2) Ko-o ukulemenkana kutasanzyavye ukuzumila mu miwele ponga ngati alukundo, icikuku nukutetela, lelo vino twazumilamo vyasintilila pakumanya icisinka ca mu Baibolo. Amuno akusowa Baibolo isuwilo litu nge lyavye.​—Waroma 10:2, 3.

 E Baibolo yikakolanya ukupepela ponga na wantu wano tutazumila muvili vyonga kukuwa kwi koli lyonga lino litalingine, amuno ukucita wo-o kungonona isuwilo lya mwina Klistu. (2 Wakorinte 6:14-17) Wo-o awuli umulandu wuno e Yesu wakanizye awasambi wakwe ukupepela ponga na wano watazumizile mwe vino wazumizilemo. (Mateyu 12:30) Wonye avino ni sundo lya kwe Leza ukupitila mwe Musa lyalesizye awina Israeli ukupepela ponga ni nko zinji zino zyawazingulusile. (Ukufuma 34:11-14) Mukupita kwa mpindi awina Israeli wacisinka wakanile ukupocelela ukwavwa ukufuma ku walwani wawo amuno ukucita wo-o nga kwalenzile wakwivwana nanti wapepela ponga na wano watazumizile muvili vyonga.​—Ezra 4:1-3.

 Ee. Mu 2023 twamazile ama awala 1,791,490,713 ukulanzyanya ivya mu Baibolo na wantu wa mu mipepele yinji. Ukukolanya umutumwa Paulo, tukavwambisya ukumanya vino ‘awantu wonsinye’ wakakwelenganya na vino wazumilamo pano tuli mu mulimo. (1 Wakorinte 9:19-22) Pano tukulanzyanya, tukakwelezya na maka ukukonka vino Baibolo ikalanda ukuti twalanjizya ‘umucinzi’ kwe wanji.​—1 Peter 3:15.