Iwumba lino likatungulula, aliwumba ilitici ilya wina Klistu wano wakatungulula umulimo wa Nte zya kwe Yehova ukuzinguluka insi yonsinye. Imilimo yino wakawomba ayo-o:

•   Wakalolecesya umulimo wakupekanya nu kusambilizya ivya mu Baibolo ukuwomvya amabuku, ukulongana, apano na masukulu ya Nte zya kwe Yehova.​—Luka 12:42.

•   Wakalolecesya pa mulimo wa kuwizya ilyasi ilizima wuno Inte zya kwe Yehova wakawomba ukuzinguluka insi yonsinye, swinya wakasinincizya ukuti umusangulo wuno awantu wakapa kwi wungwe wawomba icete.

 Awa mwi Wumba lino Likatungulula, wakakolanya “awatumwa na wasongo wa mu Yerusalemu” wano walinjiko mu mpindi zya watumwa wano wapingulanga vino Awina Klistu wonsinye wakonkanga. (Imilimo 15:2) Wulyanyene vino awatumwa na wasongo wa mu Yerusalemu walinji, awa mwi wumba lino likatungulula nawonye asantunguluzi zyi wungwe litu. Wakakonka vino Baibolo yikalanda swinya wamanya ukuti e Yehova wasonta e Yesu Klistu ukuwa Umutwe wiwungwe.​—1 Wakorinte 11:3; Waefeso 5:23.

 Ukutalika mu January 2018, wano wawa mwi Wumba Lino Likatungulula awa-a Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, nu mwanawitu Jeffrey Winder. Wa-a wonsinye wakawombela pa Maofesi Amakulu aya Nte zya kwe Yehova mu Warwick, ku New York, mu America.

 Iwumba Lino Likatungulula lyapangwa namakomiti 6 yano yakalolecesya imilimo ya Nte zya kwe Yehova imilekane lekane, swinya awa mwi Wumba Lino Likatungulula wakawa mwe komiti yonga nanti ukucilapo.

•   E Komiti ya Kampanya: Yo-o komiti yikalolecesya pa milandu ya muvilye swinya yikakwavwilizya awanawitu na wankazi wano waponezilwe nu wusanso nawano wakuwacuzya pamulandu navino wazumilamo. Necinji, yo-o komiti ikalolecesya na pavintu vinji vino vyakuma Inte zya kwe Yehova.

•   E Komiti Yino Yikasakamala awa pa Musambo: Yo-o e Komiti ayino yikasakamala wano wakawombela pa Maofesi ya Nte zya kwe Yehova munsi yonsi.

•   E Komiti yakusalanganya: Yo-o e Komiti ayino yikalolecesya pa mulimo wakupulinta, ukusalanganya, nukutuma amabuku yano yakalanda pe Baibolo ku ncende indekane ndekane, swinya ayino yikalolecesya pa mawuzengo ya vifulo vya kupepelamo, amaofesi ya kapiliwula na maofesi ya musambo aya Nte zya kwe Yehova.

•   E Komiti ya Mulimo: Yo-o komiti ayino yikalolecesya pi “landwe zima lyoo ilya Wufumu.”​—Mateyu 24:14.

•   E Komiti ya kusambilizya: Yo-o e Komiti ayino yikalolecesya pa mulimo wakupekanya vino vyawa mu Baibolo vino tukasambilila pa kulongana navino wakasambilizya mu masukulu ya Nte zya kwe Yehova. Swinya, yonye e komiti ayino yikalolecesya nu mulimo wakupenya ivyakuteyelezyako na mavidyo.

•   E Komiti ya Kulemba: Yo-o e komiti ayino yikalolecesya pa mulimo wakulemba amabuku yano yakalanda pa vya mu Baibolo ayapulintwe na yano yawa pa webusaiti, swinya yikalolecesya na pa mulimo wakupiliwula amabuku.

 Wano wawa mwi Wumba Lino Likatungulila wakasunkana cila sabata mukulanzyanya vino amawungwe yakulonda. Pano wakulanzyanya, wakakonka vino Amawaliko yakalanda swinya wakaleka umuzimu uwutele ukuwavwa ukupingula nu mwezo wonga.​—Imilimo 15:25.

 Wa-a awina Klistu awacisinka wano wakakwavwilizya mu makomiti ayi Wumba Lino Likatungulula. (1 Wakorinte 4:2) Wano wakasolwa ukuwomba yo-o imilimo awanawitu wano wamanya ukuwomba icete umulimo wuno komiti yino wawamo yikalolecesya swinya wano wawomba pa mpindi intali. Cila sabata wakazanwa kukusunkana kuno kukawako ukwewano wawa mwe yo-o e komiti. Nanti acakuti wasipingulako pe vino iwungwe likakonka, lelo wakapandako amano awa mwi Wumba Lino Likatungulula. Ne cinji acakuti, wakasinincizya ukuti vino e komiti yino wawamo yipinguzile vyatalika ukuwomba nukulola vino vikupita. Impindi zimwi Iwumba Lino Likatungulula likawatuma ukuti watandalile awanawitu munsi indekane ndekane, swinya wakawanenako ukulanda amalyasi pakusunkana kwa pa mwaka nanti pe programu ye wano wakumala isukulu lya Gileadi.