Awe, cila muntu awino wawa ni nsambu zya kuyisolelapo nga kulonda ukupepa Leza nanti pole. (Waroma 14:12) Wa Nte wakasambilizya awana wawo ivisinka vya masundo ya mu Baibolo, lelo nga wakula, aweneco awano wazipizile ukuyisolela nga wakulonda ukuwa Inte ya kwe Yehova.​—Waroma 12:2; Wagalatiya 6:5.

 Wa Nte wakalonda vino vingazipila awana wawo wulyanye vino cawa ku wakwasi wonsinye. Wo-o awuli umulandu wuno wakasambilizya awana wawo vino vingawazipila: ivyakuwomba imilimo, imiwele mizima nga na vino wazumilamo. Wa Nte wazumila ukuti e Baibolo ayino yingawavwa ukuwa nu wumi uwuzima. Acino wakasambilizya awana wawo uwucindami wuno wawamo, ukupitila mukuzanwa nawo mukulongana nukuwasambilizya Baibolo. (Amasundo 6:6, 7) Apano nomba cila mwana ngawakula apano angayisolelapo nga kulonda ukuzumila mwe vino awakwasi wakwe wazumilamo nanti pole.

•  Uzye Inte zya kwe Yehova wakabatizya awana awatici?

•  Uzye wa Nte wakakana awana wawo nga wasolapo ukukana batizwa?

•  Amulandu ci wuno wa Nte wakasendela awana wawo mu mulimo wakuwizya?

•  Uzye wa Nte wakazevya ama holide nanti ukuzevyavye kunji?

•  Uzye wano wakulila mu lupwa lwa Nte zya kwe Yehova wakayivwa wuli?

 Awe. E Baibolo yitalandapo pa kubatizya awana awatici. Ku cakulolelakole, awina Klistu wakutalicila watezile wivwa imbila nzima apano “awasuwila” nukupiluka. (Imilimo 2:14, 22, 38, 41) Acino pakuti wumwi abatizwe, azipizile ukuwa we songo wino angamanya vino Baibolo yikasambilizya nu kuvisuwila. Swinya azipizile lyo kali kali wapingulapo ukuwakwikala ukulingana na vino yikasambilizya. Umutici atange acite vyonsinyene vyo.

 Nga cakuti awana wakula, wangayisolelapo ukubatizwa. Lelo pakucita wo-o, wazipizile ukwivwicisya vino vyawimbwamo mwe vino wakulonda ukupingulapo.

 Awe. Nanti acakuti awakwasi wasikwivwa icete awana wawo nga wakana ukuzumila mwe vino wazumilamo, wakatwalilila ukuwakunda swinya wasileka wuciwuza nawana wawo ukononeka pamulanduvye wakuti wakana ukuwa Inte zya kwe Yehova.

 Twawa ni milandu imilekane lekane yino tukasendela awana mu mulimo wa kuwizya. a

•   E Baibolo yikanena awakwasi ukuti wazipizile ukusambilizya awana wawo ivya kwe Leza nga nukuwasambilizya ukuwamupepa. (Waefeso 6:4) Pamulandu wakuti ukupepa kwitu kwasanzyamo ukulanjizya isuwilo litu ku cintu wavule, wo-o awuli umulandu wuno umulimo wa kuwizya wacindamila ku kusambilizya awana ivya kwe Leza.​—Waroma 10:9, 10; Waheberi 13:15.

•   E Baibolo yikawomelezya awacitici ukuti “mwatumvya izina lya kwe Leza.” (Amalumbo 148:12, 13, King James Version) Inzila yimwi iyicindame iya kulumbanizizyamo e Yehova, akuwanenako wanji pe weliwe. b

•   Awana wakazanamo ivizima nkaninye nga cakuti wakuwizya ponga na wakwasi wawo. Ku cakulolelako, wakasambilila ivyakulanda na wantu awapusane pusane swinya wakawa ni miwele ponga ngati acikuku, uluse, umucinzi nga nukuyicefya. Ukuwizya kukawavwa nukwivwicisya imilandu imilekane lekane iya mu Baibolo yino yikawalanjizya ukuti cino wazumilamo acili icisinka.

 Inte zya kwe Yehova wasizevya ama holide nanti ukuzevya kunji kuno kusisecelesya Leza. c (2 Wakorinte 6:14-17; Waefeso 5:10) Ku cakulolelako tusizevya uwanda wa kukwatwa ne chrismasi vimwi vino vitalandwapo na mwe Baibolo ukuti tuzipizile ukuzevya.