Wa Nte wakawomvwa amaBaibolo amavule pa kusambilila e Baibolo. Wano wakwata e Baibolo ya Amalembo ya Calo Cipya mucitundu cawo, wakawomvya nkaninye yo-o e Baibolo amuno mwawa izina lya kwe Leza, swinya ivyewo vino vyawamo avyacisinka vyapepuka nukwivwa.

•   Izina lya kwe Leza. Mu maBaibolo yanji, watawikamo izina Lya kwe Leza. Kucakuloleko, mwe Baibolo yimwi mwawa amazina ya wantu 70 wano wapiliwuzile e Baibolo, lelo wafunyamo izina lya mweneco we Baibolo, e Yehova Leza!

   Nomba wano wapiliwuzile e Baibolo ya Amalembo ya Calo Cipya, weni wawikamo izina lya kwe Leza monsinye muno lizipizile ukuwa, lelo watawikamo amazina yawo.

•   Ivyewo ivyacisinka. Asa maBaibolo yonsi yano wapiliwula yano yakalanda wulyanye vino e Baibolo yakutalicilapo yalemvilwe. Kucakuloleko, e Baibolo yimwi ikalanda amazwi ya kwe Yesu yano yawa pe Mateyu 16:24 ukuti: “Ndiwumwi akulonda ukunkonka, wazipila ayiwilila umwenecho, asende uwuchingane wakwe ankonke.” Pa myaka imivule, awantu wano watapepanga Leza wakusimichila wawomvyanga uwucingane [umusalawa] ukuwa acakumanyisyako awina Klistu. Pano cafikanga pakasi ka myaka ya ma 299 C.E., awa mu ma calici watalisile ukuwomvya umusalaba nukulanda ukuti amusalaba wa kwe Klistu. Ncepamwi cino calenzile wakapiliwula wawike mwi Zwi lya kwe Leza lyo-o izwi lyakuti uwuchingane”‏ wazumizile ukuti apano Yesu wafwizile. Lelo mu Mawaliko yakutalicilapo yano e Baibolo walembezilwepo, wawomvizye izwi lya kuti “umuti”, asa lyakuti “uwuchingane”. Awuli umulandu wuno mwe Baibolo ya Amalembo ya Calo Cipya pe lyo-o iwaliko pawa amazwi yakuti: “Umuntu ndi akulonda ukunkonka, ayikane umweneco, asende icimuti cakwe ica wuyimvi, apano ankonka.”

•   Yapepuka. E Baibolo yino yapiliwulwa icete yizipizile ukwivwika wulyanye vino Izwi lya kwe Leza lyalemvilwe pakutalicila, swinya yizipizile nukuwa impepuke ukwivwa. Lolani icakulolelako. E Yesu walanzile amazwi yano yawa pe Mateyu 5:3 yano wapiliwula mwe Baibolo ye Diocese of mbala ukuti, “awalongo uwapina mumwezo.” Awantu wasikwivwicisya muno mwasula ya-a amazwi. Nomba mwe Baibolo ya Amalembo ya Calo Cipya yapepuka nkaninye ukwivwa, yavwanga vye yati “awasansa wano wamanya ukuti wakalonda ivya kwe Leza.”

 E Baibolo ya Amalembo ya calo cipya yeni yazipa nkaninye amuno mwawa izina lya kwe Leza, swinya ivyewo vino vyawamo avyacisinka ne cinji acakuti yapepuka ukwivwa. Uwuzima nawunji awakuti, tusikazya. Co-o calenga awantu awavule wawazya yo-o e Baibolo mululimi lwawonye, kumwi nawalyanye wano watanga wakwanisye indalama zyakukalilamo e Baibolo.