Awe. Inte zya kwe Yehova wasikana ukutotwa insindano. Tukalola ukuti ukutotwa insindano ya kuyicinjilila amulandu wuno umwina Klistu azipizile ukuyipingulilapo umweneco. Wa Nte awavule wakasolapo ukutotwa insindano ya kuyicinjilila.

 Tukalonda imipozezye imizima swinya twacindamika nkaninye vino wano wakavwambilizya imilembo wakuwombesya pakuti wacefyako indwala zino zikakwambucila. Tukasalifya nkaninye vino wa-a awantu wakawombesya maka maka ndi kwapona indwala imbipe.

 Inte zya kwe Yehova wakakonka vino awakucipatala wakunena awantu ukucita. Ku cakulolelako, ukufumilila pano indwala ye COVID-19 yaponela, Inte zya kwe Yehova watwalilila ukuwomvya yo-o webusaiti ukulanda pe vino vingacinjilila awantu. Nu kuwanena ukwivwila vino awa muweko wakuwanena pa kuyicinjilila ku ndwala. Vyo-o ivyewo wakavifumya mu ndimi imvule. Mwe vino wakalanda mwawa, ukukanapalamanam nu kukonka amasundo yano yakalanda pa kuwa ku cintu wavule, ukusamba ku makasa, ukuzwala ama masiki na vinji vino uwuteko wukatunena ukucita.​—Waroma 13:1, 2.

 Pa myaka yino yapitapo, amabuku ya Nte zya kwe Yehova yalanzilepo pe vyo-o ivisinka vya mu Baibolo:

•   Cila muntu awino azipizile ukuyipingulilapo pa mipozezye.​—Wagalatiya 6:5.

   “[Yo-o magazini] yisilanda ukuti umulembo wumwi wazipa ukucila wunji swinya yisinena awantu imilembo ya kuwomvya. Cino yawelako akunena awantu ivisinka pakuti wino waviwazya ayipingulilepo umweneco.”​—Loleni!, February 8, 1987, iya mu Cizungu.

   “Mwemwenye amwe wano muzipizile ukuyipingulilapo mwe weneco nga cakuti mungasolapo ukulaswa insindano na wana winu nanti awe.”​—Loleni!, August 22, 1965, iya mu Cizungu.

•   Cino tukayila ku cipatala amuno twacindika nkaninye uwumi.​—Imilimo 17:28.

   “Wa Nte nga walwile wakaya kwa dokota pa kuti wawavwe. Wakunda uwumi. Wakakwelezya na maka ukukonka vino Amawaliko yalanda swinya wakawombesya pano papelezile amaka yawo pa kuti watantalizye uwumi wawo.”​—Ulupungu lwa kwe Malonda ulwa, July 1, 1975, ulwa mu Cizungu.

   “Inte zya kwe Yehova wasikana umulembo swinya wasikana ukuwapozya. Wakalonda ukuwa nu wumi uwuzima nukuwutantalizyako. Wa Nte wamwi awa dokota, wulyanye vino e Luka walinji, umwina Klistu wino walinjiko mu mpindi zya watumwa. . . . Wa Nte wakasalifya nkaninye pe vino wadokota wakawombesya na vino wayipelesya. Swinya wakasalifya nkaninye vino wadokota wakapozya icete awalwale.”​—Ulupungu lwa kwe Malonda, February 1, 2011, ulwa mu Ciwemba.