Inte zya kwe Yehova wazumila ukuti amazwi, na masundo ya kwe Leza yano yawa mu Baibolo yangatwavwa ukupingulapo ukucita vino vingamusecelesya swinya vino vingatuzipila. (Ayizeya 48:17, 18) Asa swewano twapanga ya-a amasundo, lelo tukayakonka. Lolani vino Baibolo yalandapo pi lyasi lino lyakuma ukuvwambana. a

•   Itwala litazipizile ukusila. (Mateyu 19:6) Pamulandu wakuti ukuvwambana akuno kukalenga awantu ukutwalana, Inte zya kwe Yehova wakalola ukuti ukuvwambana kwacindama nkaninye.

•    Wano wazipile ukuvwambana awasongo wano wakulonda ukutwalana. Wa-a wantu wano “wacila pacimo cawutici,” akuli ukuti wano wacizile imyaka ya wutici pano umuntu akakwivwa sana inyengwa.​—1 Wakorinte 7:36.

•   Wano wakuvwambana wazipizile ukuwa awasimbe. Awantu wamwi wano walekana ukulingana nisundo, e Leza asiwalola ukuti awantungwa ukutwala nanti ukutwalwa na swinya, amuno amasundo yakwe yakati itwala lingasilavye nga cakuti vye wenga wacita uwucende.​—Mateyu 19:9

•   Awina Klistu wano wakulonda ukutwala nanti ukutwalwa wazipizilevye ukutwalana nu muntu wino wakapepa nawe. (1 Wakorinte 7:39) Inte zya kwe Yehova wakalola ukuti lyo-o isundo lisilanda pamuntu wino wacindika imipepele yitu, lelo amuntu wino akacita vino Inte zyakwe Yehova wazumila swinya azipizile nukubatizwa no kuwa Inte ya kwe Yehova. (2 Wakorinte 6:14) Ukufuma nakali e Leza wanena awantu ukutwalana nawano wawa mwi wungwe ilili lyonga. (Intaliko 24:3; Malakayi 2:11) Wano wakavyambilizya pa vintu wazana ukuti lyo-o isundo licili likawomba napeyonye impindi. b

•   Awana wazipizile wakwivwila awakwasi wawo. (Imilumbe 1:8; Wakolose 3:20) Ku wana wano wakakwikala pa wakwasi wawo, lyo-o isundo likasanzyamo nukuti wazipizile ukwivwila vino awakwasi wawo wakulanda pakuvwambana. Ndi vino icimo cino awakwasi wangazumilizizyapo umwana wawo umonsi nanti umukazyana ukutalika ukuvwambana na wumwi, apano nivintu vinji vino wangamuzumilizya ukucita.

•   Ukukonka ya-a amasundo yano yawa mu Baibolo, wa Nte aweneconye awano wangasola impindi yakuvwambana nu muntu wakutalika ukuvwambana nawe. Wo-o avino amazwi ya kwe Leza yano yakatutungulula yakalanda ukuti: “Amuno wila muntu wazipila ukuyicendela ichisendo chakwe umwenecho.” (Wagalatiya 6:5) Lelo nanti ciwe wo-o, wano wakulonda ukutalika ukuvwambana wakakolowozyako wa Nte wasongo mu vya kwe Leza wano wangawapandako amano.​—Imilumbe 1:5.

•   Ivivule vino wamwi wano wakavwambana wakacita vyawa aluwembu. Ku cakulolelako e Baibolo yikatulesya ukucita uwuzelele. Co-o cisanzyamo ivivule ukucila na pa wuzelele, mwasanzyamo, ukulemalema ku vilundwa vya wukwasi ivya kwe wino mutatwalana nawe pakuti umale inyengwa, ukufyompana ivilundwa vya wukwasi nanti ukulalana kuntungu. (1 Wakorinte 6:9-11) Swinya wano watatwalana watazipizile ukucita vino vingawaletela inyengwa amuno vyo-o “avyawunyali” swinya visisecelesya Leza. (Wagalatiya 5:19-21) E Baibolo yalesya nu kulanda kuwipe muno mwawa “ilyasi lya nsoni”.​—Wakolose 3:8.

•   Umwezo awicenjezya. (Jeremiya 17:9) Wungaleka umuntu ukucita ivintu vilyanye vino wamanyanye nto, ukuti vyawipa. Pakuti imyezo yawo yitawasovizye, wano wakuvwambana watazipizile wawavye wowili kuno kusi nawantu, amuno wangaluvyanya. Pakuyicinjilila, ncepamwi wangasolapo ukuti wawa ponga na wantu wano wawa ni miwele imizima nanti ukusola umuntu uwakuti wawa nawe pano wali na wino wakavwambana nawe. (Imilumbe 28:26) Awina Klistu awasimbe wano wakulonda ukutwala nanti ukutwalwa wamanya ukuti citacipa nanti katicinye ukuvwambana numuntu pa intaneti, maka maka wino watamanyana nukumanyana.​—Amalumbo 26:4.