•  Uzye wa Nte wakamanya wuli ukuti wangazevyako e holide nanti pole?

•  Uzye wa Nte wano wasizevyako amaholide wacili wakunda walupwa lwawo?

•  Uzye wa Nte wakanenako wanji ukuti watazevyako amaholide?

 Inte zya kwe Yehova pano watani wasolepo nge akuzevya e holide nanti awe, wakatalicila awavwambilizya mu Baibolo. Amaholide nu kuzevya kumwi visikwivwana ni visinka vya masundo ya mu Baibolo, amaholide ya musango wo-o Inte zya kwe Yehova wasizevyako. Yanji yano yasyala e Nte umweneco awino azipizile ukuyisolela nampo nga angazevyako nanti pole. Lelo azipizile ukusinincizya ukuti wasyala nu “mwezo nanti e kampingu muzima kwakwe Leza nakuwantu.”​—Imilimo 24:16.

 Amawuzyo yano yakonkapo ayano Inte zya kwe Yehova wakaikolowozya pano wakupingulapo ngawangazevya e holide nanti awe. a

•   Uzye yo-o holide ipusine na vino Baibolo ikalanda?

   Icisinka ci sundo: “Imfumu e Leza wavwanga wati, ‘Pawukani muwasye wonga, muyipawule kwewoliwo. Mutize muwalemelela ichintu chimwi chino chakandamana.’”​—2 Wakorinte 6:15-17.

   Pa kuti Inte zya kwe Yehovah wayitalusye ku visambilizyo vya wufi vyonsinye vino visikwivwana na vino Baibolo yikalanda, wasizevya amaholide muno mwawa vino vyakonkapo.

   Amaholide yano yafuma kuvisambilizyo na mukupepa twa leza tunji. E Yesu watili: “uwafukamila Imfumu e Leza wako wenganye-nsu awino uwamupakata.” (Mateyu 4:10) Ukukonka koo ukusunda, Inte zya kwe Yehova wasizevyako amaholide ndi vino e Christmas, Easter, nanti May Day, amuno ya yonsinye ama holide yafumilila mukupepa twa leza tunji ukucila pe Yehova, ukulunda pe co-o, wasiyisanzyamo mu maholide yano yakonkopo na yanji amakolaneko.

  •  Kwanzaa. Izina lya kuti Kwanzaa “lyafuma kwi zwi lya mu ciSwahili ilyakuti matunda ya kwanza, lino likapiliula ukuti ‘ivikomwa vyakutalicila.’ Co-o cikalanjilila kuno kwafumilila e holide yakuzevya vino watalicilapo ukusombola yino yalembwa mwi lyasi lya kali ilya wina Africa.” (Encyclopedia of Black Studies) Nanti acakuti wamwi wakalola e Kwanzaa akuzevya kumwi kuno kutakuma Ivyamipepele, ibuku lye Encyclopedia of African Religion likakolanya ko-o ukuzevya ku muteweto wa mu African pano awantu “wakatwala ivikomwa vyakutalicila kwe twa leza ni vikolwe ku kulanjizya ukusalifya,” swinya lyalundako nu kuti: “E Nkwanza nayonye yino we holide ya wina Africa na wina America yasimpwa pe konye ukuzevya.”

  •  Umuteweto we Mid-Autumn. Wo-o “amuteweto wuno wukawelako kukucindika e Leza wa mwezi umwanaci.” E Dictionary yakuti Holidays, Festivals, ne Celebrations of the World Dictionary Yasanzyamo nu lutambi “muno umwanaci akafukamila e leza umwanaci, wino muci Chinese wakati kowtow.”​—Religions of the World​—A Comprehensive Encyclopedia of Beliefs and Practices.

  •  Nauruz (Nowruz). “Ko-o ukuzevya kwafumilila ku cipepelwe ca Zoroastrianism, swinya wakalola ukuti wo-o awuli uwanda wumwi uwucindame wuno wakawikako sana amano pe kalenda ya Zoroastrian. . .  Umuzimu wa Musanya wino wukakwitwa ukuti [Rapithwin], wino wamanyisilwe ukuti wamuwinzile pa nsi ku Muzimu wa Mpepo mumpindi ya mpepo, wanyosile swinya wazevizye ukunyoka kwakwe umusanya pa wanda wa Nowruz ukulingana nu lutambi lwa Zoroastrian.”​—United Nations Educational, Scientific and Cultural Organization.

  •  Shab-e Yalda. Ko-o ukuzevya kukawako pa wanda mumwaka pano kusiwa nkani umusanya, ku ncende zino zyawela ku kambazwa ke kamani mu December. Swinya “ukwasowa nukuvwilika, kwalemenkana nu kupepa kwe Mithra,” e leza wa musanya. Wo-o avino ibuku lyakuti Sufism in the Secret History of Persia likalanda. Calandwa nukuti ncepamwi ko-o ukuzevya kwalemenkana nukupepa kwe wa leza wa musanya uwa wina Roma na wa Greek. b

  •  Ukusalifya. Ndi wulyanyene vino cawa kukuzevya kwe Kwanzaa, ko-o ukuzevya kwafumilila ku kuzevya kuno kwawangako kali pa kusombola ukwakucindika wa leza awalekane lekane. Mukuya kwa mpindi, “zyo-o intambi zya kukali wizile awazileta na mu macalici ya wina Klistu.”​—A Great and Godly Adventure​—The Pilgrims and the Myth of the First Thanksgiving.

   Amaholide yano yakuma ukupepa imizimu nanti ukusuwila mu longo. E Baibolo yikati wano ‘wakapepa twaleza tuno wakutanji tukawapa ulongo, wakakankamula nanti ukukana Yehova’ (Ayizeya 65:11) Wo-o awuli umulandu wuno Inte zya kwe Yehova wasizevezya ama holide yano yakonkapo:

  •  Ivan Kupala. Ibuku lyakuti The A to Z of Belarus likati “Awantu wakalanda ukuti pe wo-o uwanda we [Ivan Kupala], insi yikafumya amaka ye majiki amavule yano nga cakuti we musipe swinya uli nulongo ungawako yamwi. E Ivan Kupala yalinji we holide ya vikolwe, iyakuzevya uwanda pano kusi nkani umusanya ku ncende zya ku kambazwa ke kamani. Kukawako mu June. Lelo nanti ciwe wo-o, e Encyclopedia of Contemporary Russian Culture, yikati “pano wano wazumizile mu vya ntambi wizile awazumila vino awina Klistu wazumizilemo, ko-o ukuzevya wizile awakusanzinkanya nukuzevya kwa mu macalici ukwe Yohani wino wabatizizye Yesu.”

  •  Lunar New Year (Chinese New Year or Korean New Year). “Pe yo-o impindi awantu wakawombesya pano papelezile amaka yawo pakusinincizya ukuti ivintu ivizima vize viwaciticile mwe wo-o umwaka. Swinya wakapa umucinzi kwe twa leza ni mizimu nga nukupepela ukuti ivintu vize viwazipile umwaka wuno wukwiza.” Ukuzevya kwe (Mooncakes and Hungry Ghosts​—Festivals of China) Mukukolanako nukuzevya kwe Korean New Year nakonye “kwawimbamo ukupepa imizimu, intambi zya kuwinga imizimu miwipe nu kusinincizya ukuti ivizima vyacitika mwe wo-o Mwaka Uwupya. Swinya wakapenduzya pakuti wamanye ivizima vino wowo Umwaka Uwupya wulileta.”​—Encyclopedia of New Year’s Holidays Worldwide.

   Ama Holide yano yasimpwa pa cizumilo ca kuti umuzimu wusifwa. E Baibolo yikanda ukwasowa nukupita mu mbali yikalanda ukuti umuzimu wukafwa. (Ezekiel 18:4) Wo-o awuli umulandu wuno Inte zya kwe Yehova wasizevezya ama holide yano yakonkapo yano yakatunjlilila icizumilo ca kuti umuzimu wusifwa.

  •  Uwanda wa Mizimu Yonsinye (Uwanda wa wafwe). Wo-o wukawa awanda “wakucindika awafwe wonsinye” ukulingana ne New Catholic Encyclopedia. “Ukufumilila mu ma 500 C.E ukufika na ku ma 1500 C.E wazumizile ukuti pe wo-o uwanda iviwa, awalozi, ivikole wacula nga na vinji vizanga kwe wano wawacuzyanga pano watani wafwe vizanga.”

  •  Qingming Festival (Ch’ing Ming) and Hungry Ghost Festival. Ko-o ukuzevya kuwili kukawelako kukucindika ivikolwe. Ibuku lyakuti Celebrating Life Customs Around the World​—From Baby Showers to Funerals, likati pa mpindi ye Ch’ing Ming “wakakocela awafwe ivyakulya, ivyakumwa nga ni vipepala ivikole imdalama pa kusinincizya ukuti wasi ni nzala, ulusala nga nukusowelwa indalama.” Lyo-o ibuku lyalanda nukuti “mwe wo-o umwezi wa Hungry Ghost, maka maka pano umwezi wukafuma wonsinye, [wano wakazevya wazumila ukuti] pe yo-o impindi pakawa ukulemenkana ukukulu nkaninye pakasi ka wafwe na wano wali nuwumi ukulusye pa mpindi yinji iyili yonsinye. Acino cacindama nkaninye ukucitako vimwi ivyakutonsya awafwe ni vikolwe umwezo.”

  •  Chuseok. Ibuku lyakuti The Korean Tradition of Religion, Society, and Ethics, likati mwe ko-o ukuzevya mwasanzyamo “ukupa ivyakulya ni pala ku mizimu ya wafwe.” Vyo-o ivya wupe vino wakapa vikalanjizya “icizumilo cakuti umuzimu wusifwa lelo wukatwalilila ukuwako kumwi ndi umuntu wafwa.”

   Amaholide yano yakuma ivye magiki. E Baibolo yikati: “Mutize mwize muleka awantu winu wachita imyata yimwi iyamanjelengwe, nanti ukuti choo achamiloza, nanti akupenda mutapenda nanti ukuyisinkanye mutize mwayisinka, mutize muleke wawuzya imizimu mifwe . . . e Leza witu wapata wano wakacita ivyamwatanye woo iviwipe.” (Amasundo 18:10-12) Pakuyitalusya ku vintu vya musango wo-o, uwulozi, muno mwasanzyamo ukupendula intanda (uluwali lwakupendula). Inte zya kwe Yehova wasizevya e Halloween nanti ama holide yano yakonkapo:

  •  Sinhala and Tamil New Year. Ibuku lye Encyclopedia of Sri Lanka lyalanda ukuti “pe ko-o ukuzevya pakawa intambi muno mwasanzyamo ukucita ivintu vimwi pa mpindi yilyalye yino wano wakapenduzya wazana ukuti palicitika nanti ukuleta ivizima.”​—

  •  Songkran. Izina lye ko-o ukuzevya kuno awina Asia wakazevya, kukapiliwula ukuti ‘ukusela’ nanti ‘ukupiluka.’ Pe wo-o uwanda wakalya ni vyakulya swinya wano wakapenduzya pa vyakunkolelo wakazevya wo-o umuteweto nga cakuti umusanya wasela mwi wumba lya ntanda lino wakakwita ukuti zodiacal constellation of Aries.”​—Avino ibuku lyakuti Food, Feasts, and Faith​—An Encyclopedia of Food Culture in World Religions.lyalanzile.

   Ukuzevya kuno wakazevya pamulandu wakukonda amasundo ya kwe Musa, nanti acakuti yalesile ukuwomba pano Yesu wayipile ukuwa inzuwi. E Baibolo yikati: “E Yesu ayili mpelelecezya yamasundo.” NWT (Waroma 10:4) Awina Klistu wacili wakazanamo ivizima mu masundo ya kwe Musa yano Yehova wapile awina Isreali. Lelo nanti ciwe wo-o, wasizevyako imiteweto yino wazevyanga pe yoyo impindi pano wakonkanga amasundo ya kwe Musa, maka-maka yino yalandanga pe Mesiya wino awina Klistu wasuwila ukuti wiza kali. E Baibolo yikati “Ivintunye vyoo vyonsi avizungani vyavye ivyavintu vino vilipona; ukuwa ichintu chikulu we Klistu.” (Wakolose 2:17) Pamulandu wakuti imilondele ya kwe yo-o imiteweto yaficiliswa kali swinya yasyanzyamo ni ntambi zino zisikwivwana na vino Baibolo yaikalanda, Inte zya kwe Yehova wasizevya imiteweto yino yakonkapo:

  •  Hanukkah. Wo-o umuteweto wawuzevyanga pa kwizuka vino awa Yuda wapile itempile kwe Yehova mu Yerusalemu pa muku waciti wili. Lelo nanti ciwe wo-o, e Baibolo yikalanda ukuti e Yesu wizile awa we Simapepo Mukulu “Ihema [nanti, itempile] lino akapyunga mwenemo lyakulisya lyachindama lyalusya; lyeni litazengwa nawantu, kuno akulikuti lizi alyamunsi moo.” (Waheberi 9:11) Fwandi ku wina Klistu, itempile lya kumuzimu alino lyapyana itempile lya mu Yerusalemu.

  •  Rosh Hashanah. Ukulingana ne kalenda wa waYuda, wo-o awuli uwanda wakutalicilako. Mu mpindi zyakukali, pe ko-o ukuzevya wapanga ni nzuwi kwe Leza. (Impendwa 29:1-6) Lelo nanti ciwe wo-o, pamulandu wakuti e Yesu walinji we Mesiya ‘walesizye ukufima inzuwi.’ Acino ukupa inzuwi kusiwomba pe yo-o impindi.​—Daniel 9:26, 27.

•   Uzye yo-o e holide yikatunjilila amacalici ukupepela ponga?

   Icisinka ci sundo ica mu Baibolo: “Nga umusuwizi angalanjililana nikandi wuli? Nga mung’anda yakupepela Leza munginjila amakolanya wuli?”​—2 Wakorinte 6:15-17.

   Nanti acakuti Inte zya kwe Yehova wakawombesya na maka ukuwa pa mutende na wanji nga nukucindika insambu zye wenga nawenga, wakataluka ku kuzevya kuno kungalenga wapepela ponga mwe zyo-o inzila zino zyakonkapo.

   Ukuzevya kwa vipepelwe kuno kukawomelezya awantu wano wazumila muvipusane pusane ukupepepla ponga. Pano e Leza watwite awantu wakwe munsi ya wulayo muno mwalinji inko zino zyalinji muvipepelwe ivipusane pusane, wawanenile ukuti: “Mutaliwazumilizyania nawo pamwi ukuzumilizyania na twaleza twawo. . . . Ndi mwiza mwafukamila twaleza twawo, tulileka mulowe.” (Ukufuma 23:32, 33) Wo-o awuli umulandu wuno Inte zya kwe Yehova wasizevezya ama holide yano yakonkapo.

  •  Loy Krathong. Pe ko-o ukuzevya, “awantu wakasenda amafwa, e kendo nga nu tumiti twakufumya ifungo nuncile awavinyepenkanya ponga ngawasumbila pa luzi. Wazumila ukuti amawato yakasenda amasyamo. Ko-o ukuzevya ukutele wakakuzevyanga kukwizucizya intamba itele lino awaBuddhism wasile.

  •  National Repentance Day. ‘‘Wonsinye wano wakazevya wazumila mumasundo yewano wakati awina Klisitu wacisinka’’. Ukulinga navino awamuwuteko wasenzile amazwi yano yawa mwe nyuzipepa iyakuti The National, a Papua New Guinean. Walanzile ukuti wo-o uwanda “apano pafumilizile amasundo ayawina Klistu ukuzinguluka insi yonsinye.”

  •  Vesak. “Wo-o awuli uwanda wumwi uwucindamisye nkaninye ku wa Buddha. Ko-o ukuzevya kukawa akwa kuzevya inkwatwa ye Buddha, enlightenment, imfwa nanti and death, or attaining of Nirvana.”​—Holidays, Festivals, and Celebrations of the World Dictionary.

   Ukuzevya kuno kwasimpwavye pa ntambi zya vipepelwe lelo kuno kutawa mwe Baibolo. E Yesu wanenile intunguluzi zya mipepele ukuti: “Mwakana ukupechela izwi lyakwe Leza mwakonka imisambilizizye yinu.” Swinya wa wanenile nukuti ukupepa kwawo kwalinji akwavye amuno ‘wasambilizyanga amasambilizyo yamasundo yawantu.’ (Mateyu 15:6, 9) Fwandi pa mulandu wakuti Inte zya kwe Yehova wawikako sana amano kwe ko-o ukusoka, kwawa ivyakuzevya ivilekane lekane ivya mumipepelwe vino wasizevyako.

  •  Epiphany (Three Kings’ Day, Timka, or Los Reyes Magos). Wano wakazevya yo-o e holide wakakwizucizya uwanda wuno wakapenduzya watandalizile e Yesu nanti uwanda wuno e Yesu wabatizizwe. Ibuku lya kuti The Christmas Encyclopedia lyatili Ko-o ukuzevya “kukasanzinkanya ivisambilizyo vya wina Klistu ni vyawantu vino vikapa umucinzi kwe twaleza twa nduzi.” Timkat, ukuzevya kuno kwakolanako na ko-o kuno twalandapo kweni, “kwawa nkaninyene ni visambilizya vya wantu nanti intambi.”​—avino e Encyclopedia of Society and Culture in the Ancient World yalanda.

  •  Umuteweto wakwelenganyavye pe Mariya e Nacisungu. Wakazevya wo-o umuteweto pamulandu wakuzumila mukuti e Mariya e nyina wa kwe Yesu wayile kwi yulu numuwili wakwe wawuntu. Ibuku lyakuti Religion and Society​—Encyclopedia of Fundamentalism likati “Co-o icizumilo citamanyisilwepo ku wina Klistu wakutalicila swinya kutawa icili consinye cino cikalanjizya ukuti cawa mu mawaliko.”

  •  Ukuzevya ukupwililika kwe Mariya Nacisungu wino wapwililisile pano wizile awa ni fumo. Ibuku lye New Catholic Encyclopedi likati “E Baibolo yitalandapo ukuti e Mariya wizile apwililika pano wizile awa ni fumo, lelo acisambilizyovye cino icalici likasambizya.”

  •  Lent. Wo-o uwanda wakuzevya Lent, wukawa awanda wakulapila nga nukufunga. Ukulingana ni buku lye New Catholic Encyclopedia watalisile ko-o ukuzevya “mu ma 300,” lyo papita imyaka ukucila pe 200 ukufumilila pano wamazile ukulemba Baibolo. Lyo-o ibuku lyalanzile nukuti: “pa wanda wakutalicilapo pano wakuzevya Lent, wa simapepo wakalemba icilembo ca musalaba pa mpumi zya wantu wawo ukuwomvya itoyi. Ukucita wo-o kukawizusyako ukuti wazipizile ukulapila. Icalici lya wakatolika lyatalisile ukucita wo-o mu mwaka wa 1091.”

  •  Meskel (nanti, Maskal). E Encyclopedia of Society and Culture in the Medieval World yikati pe Maskel wakazevya “ukuzana umusalaba wacisnika (akuli ukuti pano wapamantizile e Yesu), wakacita wo-o ukupitila mukwasya umulilo nukuwawuzinguluka ko-o lyo wakucina.” Lelo Inte zya kwe Yehova weni wasiwomvya umusalaba pa kupepa.

•   Uzye ko-o ukuzevya kukacindika nkani awantu, akawungwe nanti ivya kumanyilako insi?

   Icisinka ci sundo lya mu Baibolo: “Yaa ayali mazwi ya Mfumu Leza: ‘Ukutipwa ku muntu wino akasuwila muwantu wino akakweyamila kumulawa, napano umwezo wakwe wuli ukutali ni Mfumu Leza.’”​—Jeremiya 17:5.

   Nanti acakuti Inte zya kwe Yehova wakasalifya pe vino awantu wanji wakacita swinya wakawapepelako nukuwapepela, wasizevyako imiteweto yino yakonkapo:

   Ama holide muno mwawa ukupepa wakateka nanti awantu wanji. E Baibolo yikati pamulandu winu, “chisi achizima ukusuwila awantu wano wakafwa. Amuno nga awacani?” (Ayizeya 2:22) Acino, pamulandu wakuti Inte zya kwe Yehova wakakonka nkaninyene amasundo, wasizevyako uwanda wuno imfumu nanti e nafumu uwili wensinye wakwasilwe.

   Ukuzevya fulagi ya nsi. Inte zya kwe Yehova wasizevyako wo-o uwanda amuno, e Baibolo yikati: “Wanane yicinjililani kwe twaleza twawufi.” (1 Yohani 5:21) Awantu wamwi wakalola flagi ukuti asa kaluwi, lelo e Carlton J. H. Hayes walemvile ukuti: “icikulu nkani cino cikalanjizya ukuti umuntu wakundisya nkaninye insi yakumwawo swinya cino wakawomvya na pakupepa insi, we flagi.”

   Amaholide muno mwawa ukupepa awatakatifu. Uzye avyani vino vyacitisile pano umuntu wino watinanga Leza wakontamizile e Peter? E Baibolo yikati: “Ukuwa Peter amukatusya. amunena ati: ‘katuka, amuno naninye nemuntu awowo.’” (Imilimo 10:25, 26) Wulyanye vino e Peter nawatumwa wanji wakanile ukupocelela umucinzi uwucilemo, avino ni Nte zya kwe Yehova nye pe yo-o impindi wasizevyeko imiteweto yonsinye muno mwawa ukupa umucinzi uwucilemo ku watakatifu, ponga ngati ayo-o yino yakonkapo:

  •  All Saints’ Day. “Pe wo-o umuteweto wakacindika awatakatifu . . . Lelo kuno wafumilila kutamanyikwa.”​—New Catholic Encyclopedia.

  •  Fiesta of Our Lady of Guadalupe. Awa ku Mexico wakazevya wo-o uwanda nga wakwizuka “umutakatifu umwanaci” wino wamwi wazumla ukuti walinji we Mariya e nyina wa kwe Yesu. Wamwi wakalanda ukuti walolesile mucizungusyo mu 1531.​—The Greenwood Encyclopedia of Latino Literature.

  •  Uwanda wakwinika izina (Name Dada). Ibuku limwi lyatili “wo-o uwanda awuli uwanda wuno wakakwinicilapo umwana wino wakwatwa izina lino lyalinji alya mutakatifu. Wakamwinika lyo izina palubatizyo pano acili akanya nanti pakuzevya kuno kukawapo wako pano walanjizya ukuti wazumila mwe vino icalici likasambilizya.” Ibuku ilili lyonganye lyalanzile nukuti “pe wo-o uwanda awantu wakacita ivintu vino vikakwivyana nimipepele”​—Celebrating Life Customs Around the World​—From Baby Showers to Funerals.

   Ukuzevya uwanda wavikanza vyansi nanti amakampeni yakupilula ivintu muwikazi. E Baibolo yikati “chazipa nkani ukusuwila Imfumu e Leza, ukulusye ukusuwila awantu” (Amalumbo 118:8, 9) Inte zya kwe Yehova wasizevyako e Youth Day nanti e Women’s Day nu kuzevya konsinye kuno kwakolanako. Amuno wakalonda acimanyikwa ukuti e Leza mutupunye awino angamala intazi zyonsi zino awantu wonsinye wakapitamo asa wantu awe. Wo-o awuli umulandu wuno Inte zya kweYehova wasizevezyako uwanda wuno amawuteko munsi zimwi wasozile ukuleka ukusenda awantu muwuzya na maholide ayakolaneko. Lelo wasuwila ukuti Uwufumu wa kwe Leza awuno wulimala akapatulula wamitundu swinya wulilenga kuwe umulinganya munsi.​—Waroma 2:11; 8:21.

•   Uzye ko-o ukuzyevya kukacindamicisya insi zimwi nanti icitungu ukucila zinji

   Icisinka ca masundo ya mu Baibolo: ‘E Leza akalinganya awantu wonsi apaliponga. Umuntu wensi wino akamutina nukuchita ivizima vino wakunda, akapocelelwa kwe weliwe.’​—Imilimo 10:34, 35.

   Inte zya kwe Yehova wakunda insi zyawo lelo nanti ciwe wo-o wakakwelezya namaka ukukana zevyako amaholide yamwi yano yangalenga caloleka ngati wacindicisya umutundu wumwi ukulusya wunji nanti insi yawo yacindamisya ukulusya insi zinji. Vimwi vino wasizevyako avyo-o vino vya konkapo.

   Ukuzevya muno mwawa ukucindicisya awasilika. Munzila yakutunjilila inkondo, e Yesu wanenile awasambi wakwe ukuti: “kundanji awalwani winu, swinya nawano wakuwayimvya muwawapepela.” (Mateyu 5:44) Wo-o awuli umulandu wuno Inte zya kwe Yehova wasizevezyako amanda ya wasilika nanti ama holide yano yakonkapo:

  •  Anzac Day. “E Anzac yikakwimililako Australian and New Zealand Army Corps,” ne mwe “Anzac Day mwasanzyamo ukwizuka wano wafwile mu nkondo.”​—Historical Dictionary of Australia.

  •  Uwanda wuno wakakwizuka wano wacisile ivintu ivikulu mu nsi (Veterans Day, Remembrance Sunday, nanti Memorial Day). Mwe yo-o holide mwawa ukucindika nukwizuka “awasilika wano walwanga inkondo na wano wafwile mu zya nkondo zino insi yawo yalwangako.”​—avino ibuku lye Encyclopædia Britannica lyalanzile.

   Ukuzevya vino vyacitisile mu nsi nanti uwanda wuno insi yaposile uwuntungwa. E Yesu wanenile awasambi wakwe ukuti: “Wasi awamunsi ndivino naninye insi ne wamunsi” (Yohani 17:16) Nanti acakuti Inte zya kwe Yehova watemwa ukusambilila pa malyasi yakali aya munsi yawo, wasizevyako ama holinde ndi vino ya-a yano yakonkapo:

  •  Australia Day. Ukulingana ni buku lyakuti Worldmark Encyclopedia of Cultures and Daily Life likati, yo-o e holide wakayizevya pakwizucizya “uwanda wumwi mu 1788 pano umusilika wa ku English wanyamuzile e flagi ya nsi ya Australia nukulanda ukuti, yo-o insi yandi yayiteka.”

  •  Guy Fawkes Day. Pe wo-o uwanda “wakazevya nukwizucizya vino e Guy Fawkes ni wumba lya Wakatolika wano wamutunjililanga waposilwe ukukoma Imfumu James I na wamukawungwe ka English government mu 1605.”​—A Dictionary of English Folklore.

  •  Ukuzevya uwanda wuno insi yaposile uwuntungwa. E Dikishonari yimwi yatili “wo-o awanda wakuzevya wuno wasola pakuti wakwizuka uwanda wuno insi yaposile uwuntungwa.”​—avino e dikishonari ye Merriam-Webster’s Unabridged Dictionary yikalanda.

•   Uzye mwe yo-o e holide mwawamo imiwele uyiwipe?

   Icisinka ci sundo lya mu Baibolo: “amuno yawa ampindi ntali pano mwanda mukachita vino imintamany Leza yikachita. Wakonkanga ukulungana nukulonda kuwipe, uukukolwa, nutuwukutwe, nukung’wa kwakuyitopwa, mbali numwata wuwipe uwakupepa amakolania.”​—1 Peter 4:3.

   Ukulingana na co-o icisinka ci sundo ica mu Baibolo cino twalandapo, Inte zya kwe Yehova wasizevyako ama holide muno wakamwensya ipala nanti muno mukawa ivyongo. Wa Nte wakunda nkaninye ukuwa ponga ni viwuza swinya mpindi zimwi wangasolapo nukumwa ipala ponga nawo mukulinga. Wakawombesya na maka ukukonka vino Baibolo yikasambilizya ukuti: “Chonsi chino ukucita, chonsi chino ukulya pamwi ukung’wa, amulanga mukuchitila vyonsi mukucindamika Leza.”​—1 Wakorinte 10:31.

   Wo-o awuli umulandu wuno Inte zya kwe Yehova wasizevyako amaholide muno mukawa imiwele yino Yehova wapata swinya yino Baibolo yalesya. Pe ko-o ukuzevya, pawa nukuzevya kwa waYuda kuno wakakwita ukuti Purim. Ibuku lyakuti Essential Judaism likati kali wazevyanga Purim pakwizuka vino awa Yuda waluwuzilwe mu ma 400 lyo Yesu atani ayize mu nsi. Pe yo-o impindi ko-o ukuzevya “wakupilula swinya wakakwita ukuti Mardi Gras nanti Carnival,”. Pano wakuzevya, “awonsi wakazwala ivyakuzwala vya wanaci swinya kukawa ukumwa ipala nukupanga icongo.”

 Ee. E Baibolo yikasambilizya awantu ukukunda nga nukucindika indupwa zyawo asamulandu na vino wazumilamo. (1 Peter 3:1, 2, 7) Icisinka acakuti, nga wumwi wawa Inte ya kwe Yehova, waleka nukuzevyako ama holide yamwi, walupwa wamwi wangivwa nkaninye uwuwi nukufulwa. Swinya mpindi zimwi wangalola nukuti apondocezile ulupwa. Wo-o awuli umulandu wuno Inte zya kwe Yehova awavule wakanena walupwa lwawo ukuti wawakunda swinya wakawalondololela icete nkaninye umulandu wuno wasizevezyako, swinya wakatandalila ni ndupwa zyawo pano kusi ukuzevya.

 Awe. Wamanya ukuti cila muntu azipizile ukuyisolela ivyakucita. (Joshua 24:15) Inte zya kwe Yehova “wacindika nkaninyene awantu wonsinye” asamulandu na kuno wakapepa.​—1 Peter 2:17.