Twazana ukuti awantu awavule wano wawa na kuno wakapepa, wakakwivwa icete ukulanzyanya nawo pa vya mwe Baibolo. Kweni twacindika insambu zino cila muntu wawa nazyo, izyakuisolela vino akulonda ukuzumilamo, swinya tusipatichizya awantu ukuti tuwawizizye.

 Pano tukulanda na wantu pa mipepele, tukawa na “kakope nu mucinzi” ku wantu. Cino cikalenga twawa woo amuno avino Baibolo yatunena. (1 Peter 3:15) Tukamanya ukuti awantu wamwi wangakana ilandwe lizima lino tukawizya. (Mateyu 10:14) Nomba tusimanya nga cakuti awantu wangivwa kwe vino twandi tuwawizizye nanti awe, tukakwiza tukumanya vye nga twalanda nawo. Twamanya nukuti ivintu vikapiluka mu wumi wamuntu.

 Ku cakulolelako, impindi zimwi wino twandalilila angawa amupamviwe pano twamutandalila, lelo umuku wunji angiza atemwe ukulanzyanya nawe. Ne impindi zimwi awantu wangawa nintazi, nanti vimwi vingawaciticila icakuti wangalondesya nu kwivwa kwi lyasi ilizima ilya mwe Baibolo. Fwandi tukatandalila awantu imiku imivule.