Ukukunda Leza na wantu avino vikalenga ukuti Inte zya kwe Yehova wakwivwa icete ukunenako awantu wonsinye pi lyasi lizima ilya mu Baibolo, ukuwikakovye na wano walanzile ukuti “Ntakulonda ukwivwa.” (Mateyu 22:37-39) Ukukunda Yehova akuno kukalenga twatontela isundo lya mwana wakwe ilya “kuwizya Ilandwe zima.” (Imilimo 10:42; 1 Yohani 5:3) Pakucita wo-o, tusiyavye umuku wonga lelo tukanyocelako imiku imivule wulyanye vino wakasesema wa kwe Leza wacitanga. (Jeremiya 25:4) Pa mulandu wakuti twakunda awantu wanji, tukakwelezya na maka ukuwawizizya “ilandwe zima lyoo ilyawufumu” kwe wonsinye, ukuwikako nawalyanye wano pakutalika wakanile.​—Mateyu 24:14.

 Tukazanamo ivizima nga cakuti twanyocela kwe wano pakutalicila wakanile. Lolani imilandu yitatu:

•   Awantu wakacinta.

•   Mu ng’anda iyili yonganye mukawa nawano wakulonda ukwivwa

•   Awantu wakapiluka. Ivintu mu nsi, nga na vino vikacitika mu wumi vikalenga wamwi ukutalika ukuvwambisya nkaninye “Ukumanya ivya kwe Leza” nukulondesya ukumanya ivya mu Baibolo. (Mateyu 5:3) Nawalyanyene wano wakananga pakutalika wangapiluka, wonye avino calinji na kwe Paulo.​—1 Timoti 1:13.

 Lelo nanti ciwe wo-o, tusipaticizya uwili wensinye ukwivwa ilyasi lizima. (1 Peter 3:15) Twazumila ukuti cila muntu wawa ni nsambu zyakuyisolelapo umweneco pa lwa kupepa.​—Amasundo 30:19, 20.