Amulandu ci Wuno Inte zya kwe Yehova Wasilandilapo pe Vimwi Vino Wakawawipizya?

Inte zya kwe Yehova wakakonka vino Baibolo yikalanda ukuti asakwevyonsi vino wazipizile ukwasuka nga ca kuti wakuwawipizya nu kuwapumya. Ku cakulolelako, e Baibolo pa milumbe yikati: “Ndi ukusunda umuntu mututuwale uwacilumba, ye alikutuka.” (Imilumbe 9:7, 8; 26:4) Munzila yakutalika ukupokota pa vintu vino vitayine vyo watuwipizizyevye, tukawika amano kukusecelesya Leza.​—Amalumbo 119:69.

Ukwasowa nukuvwilika, kwawa “impindi zyakumyalala nimpindi zyakuvwanga” (Ekawizya 3:7) Tukakwasuka awantu wano wakavwambisya ukumanya icisinka, tukataluka kwe vino vingalenga tutalike ukupokota. Tukakonka icakulolelako ca kwe Yesu, vino wasambilizyanga nga na wina Klistu wakutalicila.

● E Yesu asitela ayasukepo pano wamuwipizizye pa nkwelelo ya kwe Pilato. (Mateyu 27:11-14; 1 Peter 2:21-23) Cinji acakuti asitela ayasukepo na pano wamuwipizizye ukuti walinji we cakolwa swinya umumilicisye. Lelo wasusile ukupitila mu vicitwa, nukulingana ni cisinka ci sundo icakuti: “Amano yakwe Leza yalanjizwa mumilimo yakwe kuno ayakusimichila.” (Mateyu 11:19) Lelo nanti ciwe wo-o, pano impindi nzima yafisile, wizile ayasuka wano wamupumyanga mukuyicefya.​—Mateyu 15:1-3; Marko 3:22-30

E Yesu wanenile awasambi wakwe ukuti watati wakwivwa uwuwi pamulandu ni vya kuwawipizya. Walanzile ukuti: “Mwe walongo pano wawasoweka, swinya wawayimvya, wawavwanjila nivintu vyonsi iviwipe uwufi uwutupu muno mukakonka nene.” (Mateyu 5:11, 12) Lelo wawanenile nukuti, nga cakuti intazi zyamusango wo-o zyawapa ulongo lwakuwizya, walinji nukuficilisya uwulayo wakwe uwakuti: “Ndiwapa amazwi namano yano awalwani winu watalifungula chimwi nanti ukukana chino mwavwanga.”​—Luka 21:12-15

● Umutumwa Paulo wasunzile awina Klistu ukutaluka ku mimpazi miwipe na wa lwani wawo. walanzile pa mpokoto zyamusango wo-o ukuti “visi nachimwi avyavye.”​—Taitasi 3:9; Waroma 16:17, 18.

● Umutumwa Peter wawomelezizye awina Klistu ukuti wacinjilila isuwilo lyawo. (1 Peter 3:15) Lelo waweni nukuti wazipizile ukucita wo-o ukupitila mu vitwa asa mumazwi. Walemvile ukuti: “mumyalalike ukuvwanga kuwipe ukwawantu watumpe muwalanjizye imilimo mizima.”​—1 Peter 2:12-15.