Tusiyisanzya mu milandu ya mitecele ye yo-o insi, pa mulandu na vino twazumilamo pe vino Baibolo yikasambilizya. Tusiwapo ni vifulo nanti ukupanga e kampeni mu tuwungwe utwavikanza vyansi, tusivotela akawungwe nanti umuntu uwili wensinye swinya tusikatucilapo uwuteko. Twazumila ukuti e Baibolo ikalondolola icete cino tutazipizile ukuyisanzizya mumilandu yamitecele ya nsi.

•   Tukakonka icakulolelako ca kwe Yesu, wino wakanile ukumuwika pawufumu. (Yohani 6:15) Wasambilizizye awasambilizi wakwe ukuti “wasi awamunsi” swinya wawanenile nukuti watazipizile wayisanzya muvikanza vya nsi.​—Yohani 17:14, 16; 18:36; Marko 12:13-17.

•   Tukakonka vino Yesu watunenile pa Wufumu wa kwe Leza pano watili “Nilandwe zima lyo-o ilya Wufumu wamwiyulu liliwalandwa munsi yonsi, liwe achipanichisyo kumyiko yonsi; ngapano insilo iyize.” (Mateyu 24:14) Pa mulandu wakuti tukakwimililako Uwufumu wa kwe Leza swinya tukawizya nukuti Uwufumu wuli mukwiza, tusiyisanzya mumilandu ya mitecele yansi iyili yonsinye.​—2 Wakorinte 5:20; Waefeso 6:20.

•   Pamulandu wakuti tusiyisanzya mumilandu ya mitecele ya wantu, twawa nuwuntungwa wakuwizya ilyasi ilizima pa Wufumu wa kwe Leza ku wantu wano wasuwila sana mutuwungwe twavikanza vya nsi. Vino tukalanda nukucita vikalanjizya ukuti twasuwila kuno Uwufumu wa kwe Leza awuno wulifumyapo intazi zyonsinye munsi.​—Amalumbo 56:11.

•   Pamulandu wakuti tutawa mukawungwe kavikanza vyansi akali konsinye, twalemenkana mukuwombela Leza munsi yonsinye. (Wakolose 3:14; 1 Peter 2:17) Awa mumipepele wano wakayisanzya muvikanza vyansi watalemenkana nanti katicinye.​—1 Wakorinte 1:10.

 Ukutontela uwuteko. Nanti acakuti tusiyisanzya mumilandu ya mwe yo-o insi, lelo tukatontela uwuteko. Wonye wo-o avino e Baibolo ikalanda ukuti: “wilamuntu awatontela wakateka wonsi.” (Waroma 13:1) Tukakonka amasundo ya wuteko, tukalipila imisonko na vino uwuteko wukatunena ukucita pakuzifyako imikalile ya wikalansi. Tusicita icili consinye cino cingalanjizya ukuti tukulonda ukufumyapo uwuteko, amuno tukakonka vino Baibolo yikalanda ukuti tuzipizile ukuwapepelako “izyamfumu nawakapanzya,” Nkani nkani nga wakuwombela pe vimwi vino vingakuma insambu zino twakwata izya kupepa e Leza.​—1 Timoti 2:1, 2.

 Tusilesya wano wakalonda ukucitapo cimwi mu milandu yamitecele. Kucakulolelako, tusiponya ivimvulunganya nga kuli ukusola intunguluzi swinya tusilesya nawantu wano wakulonda ukusola intunguluzi.

 Uzye twaleka yanye amanda ukuyiwika mumilandu ya mitecele yansi? Awe. Awatumwa na wina Klistu wakutalicilapo nawonye watayisanzyanga mumilandu yamitecele yansi. Ibuku limwi lyatili. “Nanti acakuti wamanyile ukuti wazipizile ukuwacindika awa muwuteko, awina Klistu wakutalicilapo watayisanzyanga mumilandu ya mitecele.” Ibuku nalinji lyalanzile pa wina Klistu wakutalicilapo ukuti “watawanga nicifulo muvikanza vyansi.”

 Uzye wo-o vino tusiyisanzya mumilandu yansi cikapiliwula ukuti tukalonda ukukatucila uwuteko? Awe. Swewikala nsi awamutende wano awa muwuteko watazipizile nukutina ukuti tungawakatucila. E lipoti iya mu 2001 iya National Academy of Sciences iya mu Ukraine yalanzile umulandu wuno tusiyisanzizya mumilandu ya mitecele yansi ukuti: “awantu wamwi watatemwa wo-o vino wa Nte wasiyisanzya mu milandu yamitecele yansi, swinya acino calenzile ukuti uwuteko wanazi na ma komyunisist ukuwawapa wa Nte imilandu. Lelo, napalyanye pano uwuteko wa Soviet wawacuzyanga, wa Nte “watwalilizilevye ukuwa awikala nsi wacivwila. Walinji awacisinka, wawombelanga ponga mu mafamu na mu twampani swinya walinji awamutende.” Yo-o e lipoti yalanzile nukuti namwe yanye ya-a amanda vino Inte zya kwe Yehova wazumilamo na vino wakacita vikalanjizya ukuti “wasilonda ukukatucila uwuteko.”