Iwungwe lya Nte zya kwe Yehova ilya mwe ya-a amanda lyatalisile ku ma 1870. Pe yoyo impindi, awasambi we Baibolo walinji vye akaliwumba akaticinye, wikalanga mupipi ne Pittsburgh, Pennsylvania, mu United States. Wasunkananga lyonsinye ukusambilila sana Baibolo. Walinganyanga vino amacalici yasambilizyanga kwe vino Baibolo ikasambilizya. Vino wasambililanga watalisile ukuvilemba mu mabuku, mwanyuzipepa, na mwamagazini wano tukakwita pe yo-o impindi ukuti Ulupungu lwa kwe Malonda—Luno Lukalanda pa Wufumu wa kwe Yehova.

 Mwi wumba lya wasambi we Baibolo amuno mwalinji nu monsi wumwi uwi zina lya kuti Charles Taze Russell. Nanti acakuti e Russell awino watungululanga pano wasambililanga Baibolo pa mpindi yoyo, swinya nanti acakuti awino watalicizilepo ukuwa e kapituluka mwe magazini wa Ulupungu lwa kwe Malonda, asa wino watalisile imipepele imipya, nanti munzila yinji ukucifoming’a, awe. Cino e Russell na wawuye walondesyanga, akusambilizya awantu vino e Yesu Klistu wasambilizizye nga nukucita vino awina Klistu wakutalicilapo wacitanga. E Yesu awino Watalisile iwungwe lya wina Klistu, swinya awino twamanya ukuti awino watalisile ni wungwe litu.​—Wakolose 1:18-20.