Ee, ilivule swe Nte zya kwe Yehova tukakwavwa awantu nga kwawa uwusanso. Tukakwavwilizya uwili wensinye swinya tutawa na kalandawuzi. Tukakonka vino e Baibolo ikatunena pa Wagalatiya 6:10 pano pakati: “Twazipila atulanga tukuchita ivizima kwe wonsi, ukuwa nkani-nkani tuwalutilizya ukuwombela awamuchiwanza chitu mwisuwilo.” Asa co-o conga cino tukacita, tukakwelezya na maka ukuwasansamusya nukuwavwilizya mu vya kwe Leza.​—2 Wakorinte 1:3, 4.

 Nga kwapona uwusanso, waeluda wano wawa mu mawungwe yano yawezile ku ncende kuno kuponezile uwusanso wakalanda na wonsinye wano wawa mwe yaya amawungwe pakuti wasinincizye nga wali icete nanti wakulondekwa uwavwilizyo. Nga wacita wo-o apano wakatuma lipoti kwi ofesi lya musambo ilya Nte zya kwe Yehova pe vino wazanile na vino wacisile penepo pakuti wavwe wano wasansilwe.

 Nga cakuti vino vikulondekwa pakwavwa wano wali muwusanso vivuzile ukulusya pe vino amawungwe yano yawezile kwe yoyo incende yangakwanisya ukupekanya, Iwumba Lino Likatungulula ilya Nte zya kwe Yehova likapekanya vino vikulondekwa. Wonye avino na wina Klistu wakutalicilapo wacitanga pakusakamalana nga kwapona icipowe. (1 Wakorinte 16:1-4) Wano wakawombela pa maofesi ya musambo wakapanga amakomiti yakwavwa wano waponezilwe na masanso. Ya-a amakomiti ayano yakatalika ukulolecesya pa mulimo wakwavwilizya wano wasansilwe nukusinincizya ukuti wensinye wapocelela vino vikulondekwa. Wa Nte ukufuma ku vifulo vinji wakayikudila ukuwomvya impindi yawo ni mpiya kukwavwilizya awina Klistu wawuye.​—Imilumbe 17:17.

 Inzila yonga yino wakawomvyezyamo impiya zino awantu wakasangula nukuzituma ku maofesi ya Nte zya kwe Yehova, amukwavwilzya wano waponezilwe nu wusanso. (Imilimo 11:27-30; 2 Wakorinte 8:13-15) Pa mulandu wakuti wano wakawomba wo-o umulimo wasifolelapo, impiya zino wakasangula zikawa azyakwavwa wano waponezilwe nu wusanso, zisiwa azyakufolesya wano wakuwomba umulimo wakwavwilizya wano waponezilwe nu wusanso. Tukawomvya icete impiya zyonsinye zino awantu wakasangula.​—2 Wakorinte 8:20.