Ee! Swe wina Klistu, ni milandu, ayoo, yino yakonkapo:

•   Tukakwelezya ukukolanya e Yesu vino walinji nukukonka vilyanye vino wasambilizyanga.​—1 Peter 2:21.

•   Twazumila mukuti pe Yesu apano peyamila ipusucilo litu, amuno “kusi winji munsi nuwukulu, wino Leza wapa awantu izina lyakwe, wino tungatulilwa mwakwe weliwe.”​—Imilimo 4:12.

•   Umuntu ndi wabatizwa ukuwa Inte ya kwe Yehova, akabatizizwa mwi zina lya kwe Yesu.​—Mateyu 28:18, 19.

•   Tukapepela mwi zina lya kwe Yesu.​—Yohani 15:16.

•   Twazumila ukuti e Yesu awili Umutwe, akuli ukuti awino Leza wapa uwulasi nanti amaka pa muntu wensinye.​—1 Wakorinte 11:3.

 Nomba twapusanako mu vivule nu tuwungwe twa mipepele tunji tuno tukayita ukuti awina Klistu. Ku cakulolelako, twazumila ukuti e Baibolo ikasambilizya ukuti e Yesu Amwana wa kwe Leza, atawa pa Leza watatu. (Marko 12:29; Mateyu 16:16) Tutazumila mukuti kwawa cino cisifwa mu muntu. Tutazumila nukuti e Leza akaya mukoca awantu mumulilo wuno wusizima (Hell) pakuti wacula, amuno patawa nanti pamwi pano Baibolo yalanda wowo. Tutazumila nukuti wano wakatungulula mu vya mapepo wazipizile ukupwa amazina yano yakalenga waloleka ukuti wacindama pe wanji.​—Ekawizya 9:5; Ezekiel 18:4; Mateyu 23:8-10.