Awe, swe Nte zya kwe Yehova tusifima icikumi, umulimo witu wukakwavwilizya nu wupe wakuyikundila. Uzye icikumi acani, swinya amulandu ci wuno Inte zya kwe Yehova wasipelela icikumi?

 Isundo lyakupa icikumi nanti ica namba 10 pa vintu vino wumwi wakwata, lyalinji pi Sundo lino Leza wapile awina Israeli. Lelo e Baibolo ikalanda mukulungatikaknye ukuti lyo-o Isundo pano pawa ni Sundo ‘lyakupoka icikumi’ lisiwomba ku wina Klistu.​—Waheberi 7:5, 18; Wakolose 2:13, 14.

 Ukucila ukupa icikumi ni mituulo, Inte zya kwe Yehova wakakolanya awina Klistu wakutalicilapo winya wakacita ivintu viwili pakwavwilizya umulimo wakuwizya. Icakutalicila acakuti wakawomba umulimo wakuwizya uwiilanye. Ne icacitiwili acakuti aweneconye awano wakasangulako mukuyikundila.

 Acino tukakonka vino Baibolo yanena awina Klistu ukuti: “Umtunu wensi wazipila kupa, apela ndimuno akulondela, nanti kukwinuluka pamwi ukuwa namelengania yanji; amuno, Leza wakunda wino akapa mbali nichimwemwe.”​—2 Wakorinte 9:7.