Uzye Nga Niza Natalika Ukusambilila Baibolo Mpaka Injize Imbe ne Nte ya kwe Yehova?

LIZYANI

Awe, watanga wamipaticizye munzila iyili yonsinye. Awantu awavule wakakwivwa icete ukusambilila Bibolo nasweswe, lelo wasikwiza namukuwa Inte zya kwe Yehova. a Cino kwawela ukusambilila Baibolo, akumanya vye vino yikasambilizya. We mweneco awemuno ungasolapo ivya kucita. Lelo twamanya ukuti isuwilo lyawa apalwako wemweneco.—Joshua 24:15.

Uzye ningawomvya Baibolo yane pano tukusambilila?

Ee. Cingatenga twakunda ukuwomvya e Baibolo yitu iye New World Translation of the Holy Scriptures, cingawa icete sana nga cakuti mukuwomvya e Baibolo yinu. Swinya nga mungakunda nayo e Baibolo yitu, tungiza tumipe ukwasowa nukulipila. Mungasambilila pi suwilo lya mu Baibolo nukuluwuka ukuwomvya uwupiliwulo we Baibolo uwuli wonsinye.

Amulandu ci wuno mukasambilila na wantu wano wasilonda ukuzumila mwe vino mwazumilamo?

Cino twawikako sana amano, akukunda Yehova wino akalonda ukuti awina Klistu wasambilizyako wanji vino wasambilila. (Mateyu 22:37, 38; 28:19, 20) Tukalola ukuti kutawa icintu icicindame ukulusye pakuwa “swe wawomvi wawuye nu Leza” mukwavwa awantu ukusambilila pe vino Izwi lyakwe likalanda.—1 Wakorinte 3:6-9.
Cinji cino cikalenga, akukunda awina mupalamano. (Mateyu 22:39) Tukawa ni nsansa ukuwuzyako wanji pa vintu ivizima vino tusambilizile.—Imilimo 20:35.

a Tukawalanjilila vino isambililo lye Baibolo likawa, impindi 2023 vino tukatungulula 7,281,212 ukusambilila Baibolo cila mwezi, tukacita vyo kuwantu awavule pa mpindi iyiliyonganye. Lelo nanti ciwe wo-o 269,517, awantuvye awano wabatizizwe nukuwa Inte ya kwe Yehova mwe wowo umwaka.