E Watch Tower Bible and Tract Society of Pennsylvania asakawungwe ke bizinesi, akakupanjilapo indalama. Ka-a akawungwe kapanzilwe mu 1884, ukulingana ni sundo lya wa Commonwealth of Pennsylvania, ku U.S.A. Wano wakawomvya Watch Tower Bible and Tract Society of Pennsylvania Ante zya kwe Yehova, wakayiwomvya kukutunjilila umulimo wakuwizya, ukusalanganya e Baibolo na mabuku yanji yano yakalanda pe Baibolo.

 Ukulingana na ka-a akawungwe, calenga kuwe ukulemenkana nukuwombela ponga “mu mawungwe, mukusambilizya, na mukwavwilizya,” pano tukuwomba ilyasi ilizima ilya Wufumu wa kwe Leza mwisika lya kwe Klistu Yesu.” Wano wawa mwe ka-a akawungwe witwavyenye, lelo citasintililavye pe vino cila muntu wasangwilanga. Awa mwe ka-a akawungwe na wano wakatungulula wakakwavwilizya awa mwi Wumba Lino Likatungulula ilya Nte zya kwe Yehova.

 Ukulunda pa kawungwe ka Watch Tower Bible and Tract Society of Pennsylvania, Inte zya kwe Yehova wawa nu tuwungwe utuvule mu nsi indekane lekane utwa mwi sundo tuno wakawomvya. Tumwi to-o utuwungwe tukawa na mazina yakuti “Watch Tower,” “Watchtower,” nanti uwupiliwulo wa mazina yamwi pe yanye.

 Tonsinye to-o utuwungwe twalenga tuwombe imilimo imivule ukufuma pano twapanjizilwe, pe yo-o yino tukawomba pawa:

•   Ukulemba nu kusalanganya. Twapulinta ama Baibolo ukucila ku ma 220 milioni, na mabuku yano yakalanda pe Baibolo ku ma 40 bilioni. Amabuku yitu akuno yawa mumvwango indusye pe 900. E webusayiti yitu iya jw.org ikalenga awantu ukuwazya Baibolo ukwasowa ukulipila nanti ukulema incito yakuya mukukala. E Baibolo akuno yawa ukucita mu mvwango indusye 160. Ikakwavwa na wantu ukuzana ivyasuko ku mawuzyo amakole, “Uzye Uwufumu wa kwe Leza Acani?”

•   Ukusambilila. Tukatungulula amasukulu amavule yano yakatusambilizya pe Baibolo. Ku cakulolelako, ukufuma mu 1943, Inte zya kwe Yehova ku ma 9,000 awano wapita mwi sukulu muno kukawa ukusambilila sana e Baibolo lino likakwitwa ukuti Watchtower Bible School of Gilead. Lyalenga wamwi ukuya mukuwomba wumishonari, ne wamwi wakalenga umulimo wakuwizya wawombwa icete. Asa co-o conga, cila Sabata imintapendwa ya wantu, ukusanzyako na wano asa wa Nte, wakawasambilizya pakulongana kuno kukawako mu mawungwe. Tukatungulula na masukulu yakusambilizya wanji ukuwazya nukulemba. Twafumya akalibuku kakusambilizya wanji ukuwazya nu kulemba, kawa mu mvwango 120.

•   Ukwavwilizya wanji. Tukakwavwa awantu wano wakuyimba pa mulandu na masanso, nampo nga ayano yakacitikako pa mulandu na vino awantu wakucukuta nanti awe. Ndi amasanso yano yacitisile mu 1994 ku Rwanda pano kwalinji ukukoma awaTusi, nanti icizumanzi cino cacitisile mu 2010 ku Haiti.

 Nanti acakuti avivule vino twawomba ukuwomvya utuwungwe twa mwisundo tuno tukawomvya, umulimo witu wutasintilila pe to-o utuwungwe. Umwina Klistu uwili wensinye wawa nu mulimo wakukonka vino Leza watunena ukuya mukuwizya nukusambilizya ilyasi ilizima. (Mateyu 24:14; 28:19, 20) Twazumila ukuti e Leza awino akulenga umulimo witu wawombwa icete, twazumila nukuti awino alitwalilila “ukumezya.”​—1 Wakorinte 3:6, 7.